Tusarniaaneq – sinerissap qanittuani saarullittassiissutit qaleralittassiissutillu pillugit 2025-mi pisarineqarsinnaasut tamarmiusut
Saarullinnut Total Allowable Catch (TAC)-p aalajangersarneqarneranut atatillugu tusarniaanermut allakkiaq matumuuna saqqummiunneqarpoq.
Tusarniaanermut akissutit qallunaatuut kalaallisuullu tunniunneqarnissaannut piffissaliussaq tassaavoq ulloq 02-12-2024, uunga nassiunneqassaaq apn@nanoq.gl
Akissuteqannginneq siunnersuummik nassiunneqartumik akuersinertut isigineqassaaq. Tusarniaanermut piffissaliussap sivitsorneqarsinnaanera periarfissaanngilaq.
Saarulliit
Tusarniaaneq una Kalaallit Nunaata Kitaani 2025-mi saarullinnut TAC-mut tunngavoq.
Kalaallit Nunaannut tamarmut saarulliit pillugit siunnersuinermut ersarinnerusumik itisiliineq pillugu Avataasiornermi aalisakkat aalajangersimasut pisarineqarsinnaasut pillugit tusarniaanermi allakkiaq innersuussutigineqarpoq. Kalaallit Nunaanni sinerissap qanittuani saarullinniarnermi TAC-issatut siunnersuutip Kalaallit Nunaanni saarullinniarnermi aqutsinissamut pilersaarut siunnersuutiineqartoq aallaavigaa, tusarniaassutigineqareersoq Naalakkersuisunillu akuerineqarnissaa utaqqimaarneqartoq.
Kalaallit Nunaata Kitaa
ICES-imit sinerissap qanittuani suffisartunut ataatsimut 2025-mi pisassiissutissat 4.455 tonsit sinnissanngikkaat inassutigineqarpoq, tamannalu 2024-mit 1.360 tonsinik qaffariaataavoq. Siunnersuinermit inassutigineqarpoq pisassiissutit taakku 4.455 tonsiusut immikkoortunut marlunnut avinneqassasut, tulleriinneri malillugit Nuup avannaani (2.151 tons) kiisalu Nuuk kujagaani (2.304 tons) pisassanngortillugit.
Saarullinnut aqutsinissamut pilersaarummik suleqatigiit sinerissap qanittuani TAC eqqartorneqarput. Sinerissap qanittuani siunissami aalisarsinnaanerup qulakkeernissaa siunertaralugu piffissap ingerlanerani TAC-ip annikilliartuaartinnissaa ilalerneqarpoq. Suleqatigiit taamatut periuseqarnermik ingerlatseqqinniarlutik aalajangerput, taannalu sananeqaatitigut agguataarneri, pisanut kisitsisit siunnersuinerlu tunngavigalugit periusaalluni. Periaatsimi siunertarineqarpoq ilaatigut aalisarnerup suffisartut assigiinngitsut aalisarneqarnissaannik isiginninniarneq, kiisalu ilaatigut siunissaq isigalugu siunnersuinerup qanillattornissaa inuiaqatigiinni suliffissaqartitsiniarnermi aningaasaqarneq isiginiarlugu. Kitaani sinerissap qanittuani TAC-mut aalajangersaanissamut siunnersuut periaatsimit tassannga tunngaveqarpoq.
Siunnersuineq, TAC aamma pisassiissutinik ilanngaanerit pillugit ineriartornernut takussutissiaq pillugu ilanngussaq 1 takuuk.
Takussutissiaq 1. Kitaani sinerissap qanittuani saarullinniarnermi pisassiissutissanut siunnersuut (tonsinngorlugit)
Tunu
Tunumi saarullinniarnermit paasissutissat pigineqartut annikippallaarneri pissutigalugit sinerissap qanittuani saarullittassiissutit pillugit ilisimatuussutikkut siunnersuisoqanngilaq. Siunnersuutigineqarpoq Tunumi saarullinniarneq pisassiissutitaqanngikkallassasoq sinerissap qanittuani saarullinniarnermi paasissutissat katersorneqartut annertunerulernerisigut peqassuseq ilisimasaqarfigineqalersinnaammat.
Qalerallit NAFO 1B – 1F aamma Tunu
Qaleralinnut Total Allowable Catch (TAC)-p aalajangersarneqarneranut atatillugu tusarniaaneq saqqummiunneqarpoq.
Sinerissap qanittuani qaleralinniarnermi TAC-issatut siunnersuut sinerissap qanittuani qaleralinniarnermi aqutsinissamut pilersaarutissatut siunnersuummit maanna tusarniutigineqartumit aallaaveqarpoq, tusarniutigineqareerpat Naalakkersuisunit akuerineqarnissaa utaqqimaarneqartoq.
Aqutsinissamut pilersaarut aalisarnerup inuiaqatigiinnut siunissaq ungasinnerusoq isiginiarlugu aningaasaqarnikkut annerpaamik pissarsissutaasinnaanera qulakkeerniarlugu, tassani pingaartinneqarluni qaleraliit nungusaataanngitsumik atornissaat kiisalu aalisagaqatigiit siunissamut ungasinnermut nungusaataanngitsumik pissarsissutaasinnaanerat qulakkeerniarneqarluni. Taamaattumik aqutsinissamik pilersaaruteqarnermi anguniarneqarpoq TAC-p siunissami aqutsiveqarfinnit tamani ilisimatuussutsikkut siunnersuinermut naapertuutsinneqalernissaat.
Aqutsiveqarfinnut 1B (Sisimiut), 1C (Maniitsoq), 1D (Nuuk), 1E (Paamiut) aamma 1F-imut (Qaqortoq) qalerallit pillugit ilisimatuussutsikkut siunnersuineq ukiunut marlunnut 2025-2026-mut atuuppoq. Siunnersuineq siornarnit allannguuteqanngilaq.
Aqutsiveqarfinni marluusuni, tassa Qaanaami Tunumilu paasissutissanut tunngaviit ilisimatuussutsikkut siunnersuinermi atorneqarnissaannut naammanngillat. Ilisimatuussutsikkut siunnersuinerup tapersernissaanut paasissutissatigut tunngaviit naammalernissaasa tungaannut aqutsiveqarfinni taakkunani pisarineqarsinnaasut tamarmiusut mianersornissamut tunngavik tunngavigalugu aalajangersarneqassaaq.
Aqutsiveqarfimmut pilersaarutip atuunnerani (2025-2029) pisarineqarsinnaasut tamarmiusut aalajangersimasut, 2024-mi pisarineqarsinnaasunut tamarmiusunut atuuttut malillugit aallaaviatigut aalajangersarneqartarput. Aalisarnerup ineriartornera ukiut tamaasa malinnaaffigineqartassaaq TAC-millu aalajangersaanermi ukiumut nalunaarusiamik nalilersuineq pisassaaq.
Tunumi aqutsinissamut pilersaarut naapertorlugu sinerissap qanittuani qaleralittassat aqutsinissamut pilersaarutip atuunnerani (2025-2029) pisarineqarsinnaasut tamarmiusut aalajangersimasut, 2024-mi pisarineqarsinnaasunut tamarmiusunut atuuttut malillugit aallaaviatigut aalajangersarneqartarput. Aalisarnerup ineriartornera ukiut tamaasa malinnaaffigineqartassaaq TAC-millu aalajangersaanermi ukiumut nalunaarusiamik nalilersuineq pisassaaq.
Aqutsiveqarfinni allani TAC ilisimatuussutsikkut siunnersuineq aallaavigalugu pisarineqarsinnaasut tamarmiusut aalajangersarneqassapput, taamaattorli TAC ukiumiit ukiumut annerpaamik 10%-imik nikerarsinnaasarpoq.
Takussutissiaq 3 takuuk, siunnersuineq, TAC kiisalu pisassiissutinit pisat ineriartorneri takuniarlugit.
Qalerallit Qeqertarsuup Tunua, Uummannaq aamma Upernavik (Immikkoortoq 47)
Aqutsiveqarfinnut Upernavik, Uummannaq aamma Qeqertarsuup Tunuanut qalerallit pillugit ilisimatuussutsikkut siunnersuineq ukiunut marlunnut 2025-2026-mut atuuppoq. Ukiut 2023-2024 sanilliullugit siunnersuinerit allannguuteqarput, tassa Qeqertarsuup tunuanut siunnersuineq 20 %-imik qaffanneqarmat, Upernavimmi 4,43%-k appariarpoq, aamma Uummannammi 9,3%k appariarluni. 2025-mi pisarineqarsinnaasut 2024-mut pisarineqarsinnaasut aallaavigalugit aalajangersarneqassapput. TAC-t ilisimatuussutsikkullu siunnersuinerup assigiinngissutaat annertuvoq. Aqutsinissamut pilersaarutikkut TAC-p ukiumut minnerpaamik 5 %-imik naleqqussarnissaa anguniarlugu TAC siunnersuinerlu siunissami ataqatigiinnerutillugit aalajangersarneqassapput. Taamaattoq aalajaatsuunissaq qulakkeerniarlugu TAC-p ukiumit ukiumut nikerarnera annerpaamik 10 %-iusinnaavoq.
Qeqertarsuup Tunuanut pisassiissutit 10.600 tonsiunissaat siunnersuutigineqarpoq.
Uummannamut pisassiissutit 9.650 tonsiunissaat siunnersuutigineqarpoq.
Upernavimmut pisassiissutit 9.300 tonsiunissaat siunnersuutigineqarpoq.
Siunnersuineq, TAC aamma pisassiissutinik ilanngaanerit pillugit ineriartornernut takussutissiat 5-7 takukkit.
