Nunalerinermik inuussutissarsiuteqarnermut inuussutissarsiutinik siuarsaaneq pillugu nalunaarummut siunnersuutip tamanut ammasumik tusarniaassutigineqarnera.

Matumuuna Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup nunalerinermik inuussutissarsiuteqarnermik siuarsaaneq pillugu nalunaarummut nutaamut siunnersuut tusarniaassutigalugu nassiuppaa. Siunnersuut 4. oktobari 2024-miit 1. novembari 2024-mut tusarniaassutigineqassaaq.

Tusarniaaneq Naalakkersuisut tusarniaanernut iserfissiaatigut tamanut ammasumik saqqummiunneqarpoq, aammalu nunalerinermik inuussutissarsiuteqarnermik soqutigisaqartunut ukununnga nassiunneqarluni:
• Nunalerisutut nalunaarsorsimasut tamarmik toqqaannartumik
• Savaatillit Peqatigiit Suleqatigiissut
• Nunalerinermut Siunnersorteqarfik aamma Innovation South Greenland
• Nunalerinermut Siunnersuisoqatigiit
• Kommune Kujalleq
• Kommuneqarfik Sermersooq
• Sulisitsisut

Tunngavigisaq
Inatsisartut nunalerinermik inuussutissarsiuteqarnermik siuarsaanissamut inatsit nutaaq, 1. Januaari 2024-mi atuutilersoq 2024-mi ukiakkut akuersissutigaat. Inuussutissarsiutinik siuarsaanissamut inatsit nutaaq sinaakkutissatut inatsisiliaavoq, aalajangersakkat sukumiisut aalajangersarneqarnissaannut nalunaarummik nutaamik pisariaqartitsiffiusoq.

Nalunaarusiornermi inuussutissarsiutinik siuarsaanermut aaqqissuussinerup nunalerinermik inuussutissarsiuteqarnermut piareernerunissaa atorneqarsinnaanissaalu siunertarineqarpoq. Nalunaarummi ilaatigut inuussutissarsiutinik siuarsaanissamik siunertaqarfiusuni inuussutissarsiutinik siuarsaanissamut taarsigassarsititsisarnermi kattussinissamut periarfissat ersarissarneqarput.

Allannguutit pingaarutillit
Inuussutissarsiutinik siuarsaanermi siunertat nutaat
Nalunaarummi nutaami inuussutissarsiutinik siuarsaanissamut siunertat nutaat saqqummiunneqarput, taakkununngalu illunut inissiisarfinnut inuussutissarsiutinik siuarsaaneq, kiisalu ataavartumik nukissiutinut inuussutissarsiutinik siuarsaanermut taarsigassarsiat erniaqanngitsut akilersugassaanngitsullu ilaatinneqarput.

Nunalerinermik inuussutissarsiutillit piffissani ulappuffiusuni, soorlu savat erniornerini aammalu savanik katersuinermi sulisussanik pisariaqartinneqartunik pissarsisinnaaneq ajornannginnerulersinniarlugu illunik inissiisarfinnik pisariaqartitsisarput.

Ataavartumik nukissiutit nunalerinermi ikummatissanut aningaasartuutinik annikillisitsisinnaapput, tamatumalu peqatigisaanik silap pissusianik artorsartitsinermut iluaqutaasinnaallutik. Taamaattumik inuussutissarsiutinik siuarsaanermut taarsigassarsiat 50 %-iisa erniaqanngitsutut akilersugassaanngitsutullu taarsigassarsiarineqarsinnaanerannut periarfissiisoqarpoq, taakkulu atorlugit Naalakkersuisut nukissiutinut ataavartunut aningaasaliisarnerit siuarsaaffigineqarnissaat kissaatigaat.

Nunamik pitsanngorsaanerit
Nunamik pitsanngorsaanernut tapiissutit toqqaannartumik tapiissutitut atuutsiinnarneqassapput. Tapiiffissatut siunertaasut nassuiarneqarput, taamaalillunilu siunertanut sunut tapiisoqarnissaa paatsoorneqarsinnaajunnaarsinneqarpoq. Tapiissutit assigiinngitsut akii nalunaarummut ilanngussami aalajangersarneqarput, taakkulu ukiumoortumik atuisunut akinut naleqqersuutit malillugit iluarsineqartassapput, taamaalillunilu tapiissutit aningaasat nalikilliartornerinit ilanngartorneqartassanngillat.

Tamatuma saniatigut qinnuteqartarnerit allannguuteqartinneqarput, taamaalillunilu suliat aallartinnginnerini siumoortumik neriorsuuteqartoqarnissaa qinnutigineqarsinnaalerpoq. Taamaalilluni aningaasat aqukkuminarnerulernissaat, aammalu suliassanut tapiissutissat pisariaqartut tutsinneqarsinnaalernissaat qulakkeerniarneqarpoq.

Qinnuteqartitsisarnerit
Nalunaarummi Nunalerinermut Naalakkersuisoq inuussutissarsiutinik siuarsaanermut qinnuteqaatit qinnuteqartitsinikkut ingerlanneqartarnissaannik aalajangiinissamut periarfissinneqarpoq. Periarfissami tassani aningaasat qinnuteqaatit assigiinngitsut akornanni tulleriiaarneqarsinnaassapput.

Nunalerisutut nutaatut nammineerluni akiligassat
Nunalerisutut nutaatut nammineerluni akiligassanut piumasaqaatit appartinneqarsinnaanerinut periarfissat erseqqissarneqarput, taamaalillunilu nutaatut nunalerisunngortoq, nunalerivimmi piginneqataalersoq periarfissamik tassannga atuisinnaalissaaq. Kisiannili appaaffigineqarnissamut pisinnaatitaaffeqarnermi piginneqataasoq minnerpaamik ingerlatap 33 %-ianik piginnittuussaaq.

Akiitsunik isumakkeerinnittarneq
Aalajangersagaq nutaaq, akiitsut tamakkiisumik ilaannaasumilluunniit isumakkeerinniffigineqarsinnaanerinut tunngasoq atuutsinneqalissaaq. Aalajangersagaq taanna ingerlatamik piginnittut nikinnerinut atuuttussanngorlugu killilerneqassaaq. Akiitsunik isumakkeerinninneq taamaallaat taarsigassarsisoq, piffissap naammaginartup iluani akiitsuminik appartitsinissamut periarfissaqanngippat, aammalu taamaallaat akisussaassuseqanngitsumik niuernerup kingunerisaanik akiitsut pilersimappata atuutissaaq.

Akiligassallit taarserneqartarnerat peerneqarpoq
Inuussutissarsiutinik siuarsaanermut taarsigassarsianut akiligassallit taarsersinnaanerinut periarfissaq peerneqarpoq. Siusinnerusukkut periarfissap taassuma kingunerisaanik taarsigassarsiat, pigisap nalinga sinnerlugu akiitsoqarfiusut piginnittumut nutaamut nuunneqartarsimapput, taamaalillutillu piginnittup aningaasaqarneranut artukkiisarsimallutik. Siunissami pigisap nalinga tunisisup pisisullu akornanni aalajangerneqartalissaaq, immaqa attuumassuteqanngitsumik naliliisitsinikkut, aammalu inuussutissarsiutinik siuarsaanermut taarsigassarsianik nutaanik pilersitsisoqartalissaaq. Tunisinerup kingorna akiitsut sinnerisinnaasaat tunisisumit akisussaaffigineqartalissapput.

Tusarniaanermi killissarititaq
Tusarniaanermi akissuteqaatit kingusinnerpaamik 1. novembari 2024-mi Nunalerinermut, Imminut Pilersornermut, Nukissiornermut Avatangiisinullu Naalakkersuisoqarfimmut pan@nanoq.gl aqqutigalugu nassiuteqquneqarput. Nalunaarummut siunnersuut pillugu apeqqutissaqartoqarpat, nunalerineq@nanoq.gl aqqutigalugu nassiunneqarsinnaapput.