Piniarneq aallaaniarnerlu pillugit Inatsisartut inatsisaata allannguutissaatut siunnersuummik tusarniaaneq
Aalisarnermut Piniarnermullu Naalakkersuisoqarfiup matumuuna piniarneq aallaaniarnerlu pillugit inatsimmut allannguutissatut siunnersuut tusarniaassutigalugu nassiuppaa.
Allannguutit makkuupput:
- Akiliisitsilluni aallaaniarnermik aaqqissuussisartunut piumasaqaatinik sukaterineq (ukiuni tallimani najugaqartussaatitaaneq) - § 16a
- Akuersissuteqalernissamut immikkut akuersinissamut malittarisassanik naleqqussaaneq - § 10
- Akuersissummik qinnuteqarnermi najugaqarnermut uppernarsaatit sukumiinerusumik aalajangersarneqarnerat - § 13, imm. 7
1-imut) Inatsisartut 2023-mi piniarneq aallaaniarnerlu pillugit inatsisip suliarinerani najugaqarsimanissamut piumasaqaatip ukiunit marlunnit tallimanut sivitsorneqarnissaanut kissaataat Naalakkersuisunit suliarineqaqqittoq matumani allannguutitut siunnersuuteqarnermut tunngaviuvoq. Akiliisitsilluni aallaaniarnermik aaqqissuussisup pisariaqartumik misilittagaqarnissaa, Kalaallit Nunaannut attuumassuteqarluarnissaa, sumiiffimmi piniarfiusumi ilisimasaqarluarnissaa aammalu inatsisip siunertaanut naapertuuttumik nunap piniagassatigut pisuussutaanik pissusissamisoortumik nungusaataanngitsumillu atuineq kiisalu suliffissaqartitsiniarnikkut mianerisassat qulakkeerniarlugit najugaqarnissamut piumasaqaatinik sukaterisoqarpoq.
Aaqqissuussisartut nunap, silap piniarfiillu immikkuullarissusaannut sukumiisumik ilisimasaqarnissaasa qulakkeernerata saniatigut ukiunik tallimanik piumasaqaateqarneq sumiiffimmi piniariaatsit kulturikkullu pingaartitat paasisaqarfiginerulernissaannik ataqqinninnerulernissaannillu siunertaqarpoq, taamatuttaarlu naatsorsuutigineqarluni attaveqaqatigiinnermut tapersersuissasoq aammalu sumiiffimmi attaveqarluarnissamik tatiginninnermillu nukittorsaassasoq tamannalu oqartussanik suleqatigiinnillu sunniuteqarluartumik ataqatigiissaarinermut qitiulluni. Tamatuma saniatigut allannguut atortussiassat aatsitassanit pisut pillugit inatsimmut aammalu aalisarneq pillugu inatsimmut naleqqussaaneruvoq.
2-mut) Sukaterinerup malitsigisaanik § 10-mi immikkut akuersissuteqarnissamut malittarisassat allanngortinneqarput.
3-mut) Najugarisamut uppernarsaammik nassiussineq pillugu aalajangersakkat sukumiinerusumik nassuiarneqarput, aqutsiveqarfimmi akuersissummik qinnuteqarnermi najugarisaq pillugu paatsoorneq pinaveersaartinniarlugu.
Naalakkersuisoqarfiup oqaaseqaatit kingusinnerpaamik 8. august 2024 tigoreersimassavai.