Uunga siunnersuut: Inuussutissarsiutigalugu aalisartut, inuussutissarsiutigalugu piniartut inuussutissarsiutigalugulu nunalerinermik ingerlataqartut aallarteqqinnissamut tapiiffigineqartarnerat pillugu inatsisartut inatsisaata allanngortinnissaa pillugu Inatsisartut inatsisissaattut siunnersuut
Siunnersuummut oqaaseqaataajunnartussat kingusinnerpaamik Aalisarnermut Piniarnermullu Naalakkersuisoqarfimmeeriissapput:
5. juli 2024, nal. 16.00
Siunnersuummut oqaaseqaatit ajornanngippat kalaallisut qallunaatullu allallugit mailikkut uunga nassiunneqassapput: APN@nanoq.gl aamma thra@nanoq.gl cc-rlugu imaluunniit allakkatigut uunga:
Aalisarnermut Piniarnermullu Naalakkersuisoqarfik
Imaneq 1A, 701
Postboks 269
3900 Nuuk
Siunnersuut aamma Naalakkersuisut tusarniaanermut nittartagaani takuneqarsinnaavoq uani: https://naalakkersuisut.gl/Hoeringer?sc_lang=kl-GL
Siunnersuutip tunuliaqutaa
Inuussutissarsiutigalugu aalisartut, inuussutissarsiutigalugu piniartut inuussutissarsiutigalugulu nunalerinermik ingerlataqartut aallarteqqinnissamut tapiiffigineqartarnerat pillugu inatsisartut inatsisaat 2004-meersuuvoq kingornalu allanngortinneqarnikuunani. Silap pissusaa annertusisamik unammillernarsimmat aallarteqqinnissamut tapiiffigineqarnissamut inatsisip allanngortinnissaa pisariaqalersimavoq, inatsimmi inuit pineqartut ajornannginnerusumik aningaasatigut ikiorserneqarsinnaanngorlugit. Siunnersuuteqarnikkut silap pissusaa pissutigalugu aammalu ajunaarnersuartut ittumik pisoqartillugu inuussutissarsiortut naammaginartumik isertitaqarunnaarlutik sunnerneqartut inatsimmi ilaatinneqalissapput.
Siunnersuut 2024-mi aningaasanut inatsimmik tunngaveqarpoq, tassa konto pingaarneq 51.01.04, Aallarteqqinnissamut tapiissuteqartarneq, Aningaasaqarnermut Akileraartarnermullu Ataatsimiititaliap tamatumunnga akuersiteqqaarlugu oqaasertaliussatigut aalisartunut, piniartunut nunalerisunullu silap pissusaa pissutigalugu tassanngaannaq tamakkiisumik imaluunniit annertuumik inuussutissarsiutikkut isertitaqarunnaartunut aningaasatigut ikiorserneqarnissamut periarfissiimmat.
Oqaasertaliussat malittarisassat nutaat inissinnissaasa tungaannut ikaarsaariarnermi utaqqiisaasumik aaqqissuussaapput.
Ajoquserneq, annaasaqarneq, napparsimaneq imaluunniit sulisinnaannginneq namminersortut imaluunniit pisortat tapiissutaannit assigisaanniluunniit matussuserneqarsinnaagaangata imaluunniit matussuserneqarnissaannut periarfissaagaangat Naalakkersuisut aallarteqqinnissamut siunertarineqanngitsumik tapiisinnaannginnerat aamma siunnersuutikkut peerniarneqarpoq.
Tassunga atatillugu aallarteqqinnissamut tapiissuteqarnissamut qinnuteqarnermut killiliussaq atuutsilerneqassaaq aammalu pisut immikkuullarissut ilaasa tapiiffigineqaqattaarsinnaanerannut amerlassusaat qummut killilerneqassallutik.
Inussiarnersumik inuulluaqqusillunga
Aalisarnermut Piniarnermullu Naalakkersuisoqarfik
E-mail: apn@nanoq.gl
Oqarasuaat: +299 34 50 00