Kalaallit Nunaannut bil-ersinnaanermut allagartaq (kørekort-i) pillugu nalunaarummut missingiut pillugu tusarniaaneq
Kalaallit Nunaannut bil-ersinnaanermut allagartaq (kørekort-i) pillugu nalunaarummut missingiut matumuuna tusarniaassutitut Færdselsstyrelsen-imit nassiunneqarpoq.
Tusarniaanermut piffissaliussaq, ullormi 2. juli 2024-imi killeqarpoq.
Ilaatigut atuagarsornermut misilitsinneq, allattariarsornermik misilitsinnerup ingerlanneqartalersinnaanera aammalu ilinniartut misilitsittut arlallit ataatsikkoortillugit ingerlanneqartarsinnaanera pillugit maleruagassat aalajangersassallugit, nalunaarummut missingiummik siunertaavoq.
Aammattaaq, qallunaat bil-ersinnaanermut allagartaat (kørekort-ii) Kalaallit Nunaanni akuerisaanissaat pillugit maleruagassat, nalunaarummut missingiummik atuutilersinneqarput.
Nalunaarutip imarisaanik itisilerineq
1. Allattariarsorluni atuagarsuutinik misilitsinerit
Atuagarsornermut misilitsineq allattariarsorluni misilitsinnertut ingerlanneqarsinnaasoq, aammalu ilinniartunit ataatsikkut arlalinnit peqataaffigineqartumik ingerlanneqarsinnaasoq, nalunaarummut missingiummi aalajangersarneqarpoq. Misilitsinnerit oqaluttariarsornertut aamma kisimiilluni misilitsinnertut ingerlanneqartarnissaat, maannamut maleruagassani aalajangersagaavoq, tamannalu politiini isumalluutinik annertuumik atuinernik kinguneqartarluni.
Taamatuttaaq allattariarsorluni misilitsinnermik atuutilersitsineq, ilinniartunik assigiiaarnerusumik naliliinermik nassataqassaaq.
2. Kalaallit Nunaanni qallunaat bil-ersinnaanermut allagartaannik (kørekort-iinik) akuersineq
Qallunaat bil-ersinnaanermut allagartaasa (kørekort-iisa) Kalaallit Nunaanni akuerineqarnissaannut piumasaqaammik nalunaarummut missingiummi aalajangersaasoqarpoq.
Siunissami, Kalaallit Nunaanni najugaqaleraangami, qallunaat bil-ersinnaanermut allagartaanik (kørekort-ianik) pigisaqartumut, Kalaallit Nunaanni bil-ersinnaanermut allagartartaarnissaq pillugu piumasaqaateqartassanngitsoq tamatuma kingunerissavaa.
3. Annikinnerusunik allannguutit
Taaguut ”Politimester-i”, ”Kalaallit Nunaata Politiivi”- nut allanngortinneqarpoq, soorluttaaq ”Peqqinnissamut aamma Avatangiisinut Pisortaqarfik”, ”Peqqinnissamut Naalakkersuisoqarfik”-mut allanngortinneqarluni. Aammattaaq, aaqqissuisoqarnikkut iluarsiissutinik annikinnerusunik nalunaarummut missingiummi suliaqartoqarpoq.
Inuussutissarsiornermut aammalu innuttaasunut, aningaasaqarnikkut allaffissornikkullu kingunerisassai
Nalunaarut Kalaallit Nunaanni aamma Danmark-imi inuussutissarsiornermut aammalu innuttaasunut, aningaasaqarnikkut kinguneqassanngitsoq, nalilerneqarpoq. Atuagarsornernut misilitsinnissamut utaqqisarnissaq annikinnerulissammat, allannguutit Kalaallit Nunaanni innuttaasunut ajunngitsumik sunniuteqassasut nalilerneqarpoq.
Allat
Ulloq 1. august 2024 nalunaarut atuutilersinneqassasoq, siunnersuutigineqarpoq.
Oqaaseqaataasinnaasut, j. nr. (allakkiap normua) 2024-632517 ilanngullugu allallugu, kingusinnerpaamik ulloq 2. juli 2024, ankg@fstyr.dk cc.-eerlugu (ilanngullugu nassitsivigalugu), styrelsen-ip (Aqutsisoqarfiup) hovedmailadresse-anut (pingaarnertut allaffigineqartarfianut) info@fstyr.dk-mut nassiunneqassasut, Færdselsstyrelsen-imit (Angallannermut Aqutsisoqarfimmit) qinnutigineqarpoq.
Missingiummut apeqqutaasinnaasut, Anna Kyhl Gøtske-mut mail-imut ankg@fstyr.dk-mut imaluunniit info@fstyr.dk-mut anngunneqarsinnaapput.
Tusarniaaffigineqartut allattorsimaffiat kakkiunneqarpoq.
Ministereqarfinninngaaneersuunngitsut tusarniaanermut akissutit, tusarniaanerup kingorna ’Tusarniaanermut Nittartartakkami’ tamanut saqqummiunneqarumaarput. Tusarniaanermut akissuteqarnermi, pineqartup tusarniaanermut akissutaa aamma attavigineqarnissamut paasissutissat ilanngullugit nassiunneqartut, tusarniaanerup kingorna tamanut saqqummiunneqarnissaat isumaqataaffigineqartarpoq.
Nalunaarummut missingiummut tunngassutillit taamaallaat, tusarniaanermut akissutit suliarissallugit Færdselsstyrelsen-i imminut pisinnaatippoq.
Færdselsstyrelsen-ip nutaarsiassaqartitsivia, maleruagassat atuutilersinneqartut pillugit paasissutissanik imaqarpoq. Nutaarsiassaqartitsivimmut ilanngunnissaq, Færdselsstyrelsen-ip nittartagaani pisinnaavoq.