Uunga siunnersuut: Ilulissani ukiuunerani imeqarfiup killeqarfiani, UNESCO-p nunarsuarmiunut kingornussarititaani aamma UNESCO-qarfiup killeqarfiani tassunga atasumi angallanneq pillugu nalunaarut

Avatangiisinik innarlitsaaliuineq pillugu inatsisartut inatsisaanni nr. 9-mi, 22. novembari 2011-meersumi, kingusinnerusuttut Inatsiartut inatsisaatigut nr. 16-ikkut, 1. decembari 2021-meersukkut allannguuteqartinneqartumi § 10, imm. 1, nr. 6, 20 aamma 27, § 11, § 28, imm. 3, § 34, nr. 1 og 2, aamma § 56, imm. 1, kiisalu pinngortitamik illersuineq pillugu Inatsisartut inatsisaanni nr. 29-mi, 18. decembari 2003-mi § 39, imm. 5, aamma § 46, imm. 1 aamma 2 naapertorlugit aalajangersarneqarput:

Atuuffia

  § 1.  Nalunaarut manna Ilulissani imeqarfiup killeqarfianut atuutsinneqarpoq.
  Imm. 2.  Nalunaarut manna aamma Ilulissani UNESCO-p nunarsuarmiunut kingornussarititaanut killeqarfinnullu tassunga attuuttunut atuutsinneqarpoq.

Qamuteralaat illiniliuutillu atorlugit angallanneq

  § 2.  Kommunalbestyrelsip tamanut nalunaaruteqarnerani angallavittut illiniliat 4 meterinik silissusillit, ilanngussami takuneqarsinnaasut iluanni qamuteralaat illiniliuutillu atorlugit angalasoqarsinnaavoq.
  Imm. 2.  Imm. 1 naapertorlugu nalunaaruteqartoqassappat, piumasaqaatit uku naammassineqarsimassapput:
1)  Nunap qaava qerisimasoq, apummik qallerneqarsimasoq, aammalu naasunik nunallu qaavanik akornusiisoqarsinnaajunnaarlugu angalasoqarsinnaasoq kommunalbestyrelsimit uppernarsarneqarpat.
2)  Kommunalbestyrelsip illernit angallavissat piareersarsimappagit, aammalu ersarissumik nalunaaqutsersorsimappagit.
3)  Angallannermi kuuit, imeqarfinnik pilersuisuusut ikaarlugit angallattoqalinnginnerani qerisimasut kommunalbestyrelsimit uppernarsarneqarpat.
  Imm. 2.  Angallannermut illiniliamut tungujortumut taarsiullugu angallannermut illiniliap tunguusap sapinngisamik atorneqarnissaa qulakkeerniarlugu kommunalbestyrelsi naammaginartumik iliuuseqassaaq.

  § 3.  Angallannermut illinniliat pisareersarneqarnerini nalunaaqutsersorneqarnerinilu suliassat, illiniliornermi pisariaqartinneqartuniittut kisimik suliarineqassapput.
  Imm. 2.  Ajutoornissaq pinaveersaartinniarlugu kommunalbestyrelsi angallannermut illiniliani illiniliuutit atorlugit ingerlaavartumik manissaasassaaq.

  § 4.  Angallannermut illiniliani ilanngussami takuneqarsinnaasuni angallannerit taamaallaat akuerineqarsinnaapput, piumasaqaatit uku malinneqarpata:
1)  Qamutit assakaasullit nakkutigineqaratik qimanneqassanngillat.
2)  Angallannermi naasut ajoquserneqarsinnaassanngillat, tassungalu ilanngullugu sakkortuumik sangunerit, sukkassarnerit uneriataarnerillu pinaveersaarneqassapput.
3)  Uuliamik tunisassiat akuutissallu allat mingutsitsinissamut ulorianaatillit uninngatinneqassanngillat.
4)  Eqqakkanik qanorluunniit ittunik qimatsisoqassanngilaq.
5)  Akuutissanik avatangiisinut ajoqusiisinnaasunik assartuussisoqassanngilaq, tassanili ikummatissanik angalanermut atugassanik assartuussinerit pineqanngillat.
6)  Qamuteralaat illiniliuutillu mingutsitsisinnaanerup sapinngisamik killilerlugit ilusiligaassapput aserfallatsaalineqassallutillu.
7)  Hydraulikuuliamik pinngortitami arrorsinnaasumik atuisoqassaaq.  

  § 5.  Kommunalbestyrelsi angallattoqarsinnaanersoq pillugu tamanut paasissutissiinissamut pisussaapput.
  Imm. 2. Kommunalbestyrelsi angallannermut, nalunaarummi matumani pineqartumut sukumiisunik piumasaqaateqarsinnaapput, taassumalu ataani angallanneq assartuussinermi siunertanut aalajangersimasunut killilersinnaallugu.
  Imm. 3.  Kommunalbestyrelsi tamanut naammaginartunik ilitsersuissaaq, tassungalu angallannermut illiniliat atorneqarnissaat, mingutsitsinernik nalunaaruteqartarnissaq aammalu mingutsitsisoqartillugu isumaginninnissamut kommunalbestyrelsip upalungaarsimanera pillugit paasissutissiinissat ilaatinneqarput.

Nakkutilliineq misissugassanillu tigusisarneq
 
  § 6.  Kommunalbestyrelsi angallannernik, nalunaarummi matumani pineqartunik nakkutilliissaaq.

  § 7.  Naalakkersuisut kommunalbestyrelsip pisinnaatitaaffiisa suliassaasalu nalunaarut manna naapertorlugu isumagineqarnerinik, aammalu § 8 naapertorlugu imermik misissugassamik tigusarnerit ingerlanneqarnerinik nakkutilliissapput.
  Imm. 2.  Naalakkersuisut kommunalbestyrelsip pisinnaatitaaffiinut suliassaanullu sukumiinerusumik piumasaqaateqarsinnaapput, taakkununngalu piumasaqaatit ukununnga tunngasut ilaapput:
1)  Angallannermut illinilianik piareersaaneq nalunaaqutsersuinerlu.
2)  Inunnut tamanut ilitsersuineq.
3)  Upalungaarsimanermi pilersaarutit aamma mingutsitsinermik akiuiniarluni atortut.
4)  Kommunalbestyrelsi nakkutilliinerata annertussusia ingerlanneqarneralu.

  § 8.  Naalakkersuisut imermik akuiarneqanngitsumik imerneqarsinnaasumillu misissugassanik saniatigut tigusisarnissamut piumasaqaateqassapput. Imermi misissugassat tunngavissallu misissoqqissaagassat amerlassusissaat sukumiisut kommunalbestyrelsimut, Nakorsaaneqarfimmut, Kalaallit Nunaanni Nersutit Nakorsaqarnermut Inuussutissanullu Oqartussaasut, kiisalu Nukissiorfiit siumoortumik tusarniaaffigereernerisigut aalajangersarneqassapput.
  Imm. 2.  Misissugassanik tigusisarneq imermut imerneqarsinnaasumut Namminersorlutik Oqartussat nalunaarutaanni misissugassanik tigisisarnermut piumasaqaatit naapertorlugit Nukissiorfinnit isumagineqassaaq.
  Imm. 3.  Kommunalbestyrelsip Nukissiorfiit misissugassanik tigusisarnermut aningaasartuutaat matussusissavai.

Upalungaarsimaneq mingutsitsinernillu akiuisarneq

  § 9.  Kommunalbestyrelsi mingutsitsisoqartillugu isumaginninnissamut upalungaarsimanermut pilersaarusiussaaq.
  Imm. 2.  Upalungaarsimanermut pilersaarummi mingutsitsisoqartillugu imaluunniit mingutsitsisoqarnissaanut ulorianartorsiortoqartillugu pilertortumik pitsaasumillu suliniuteqarsinnaaneq qulakkeerneqassaaq. 

  § 10.  Suliat nalunaarummut matumunnga tunngassuteqartut mingutsitsinermik kinguneqarpata, tassungalu ilanngullugu uuliamik akuutissanilluunniit imerpalasunik navianaatilinnik allanik mingutsitsisoqarpat, kommunalbestyrelsi pisussaavoq erngerluni mingutsitsinerup pisup salinnissaa qulakkiissallugu.

  § 11.  Mingutsitsisoqartillugu kommunalbestyrelsip piaarnerpaamik Naalakkersuisoqarfik avatangiisinut akisussaasuusoq nalunaarfigissavaa. Aamma imeqarfiup killeqarfiata iluani mingutsitsisoqarpat kommunalbestyrelsi piaarnerpaamik Nukissiorfinnut nalunaaruteqassaaq.

Atuuttussanngortitsinermut aalajangersakkat

  § 12.  Nalunaarut manna xx. xxx 2024-mi atuutilerpoq. 



Namminersorlutik Oqartussat, ulloq xx. xxx 2024



Kalistat Lund
Nunalerinermut, Imminut Pilersornermut, Nukissiutinut Avatangiisinullu Naalakkersuisoq