Piniarneq pillugu Siunnersuisoqatigiit suleriaasissaata nutaap tusarniutigineqarnera

Matumuuna tusarniutigineqarpoq Piniarneq pillugu Siunnersuisoqatigiit suleriaasiata nutarterneqarnissaanut missingiut. Tusarniaanermut akissuteqarnissamut piffissaliussaq tassaavoq ulloq 5. april 2024 uungalu nassiunneqassaaq: apn@nanoq.gl

Piniarneq pillugu Siunnersuisoqatigiit (PPS) suleriaasiat, Piniarneq aallaaniarnerlu pillugit Inatsisartut inatsisaanni nr. 34, 13. juni 2023-meersumi § 33, imm. 2 naapertorlugu, kingullermik 2017-imi nutarterneqarpoq.
PPS-imut aalajangersimasumik peqataasinnaanngortitsineq periarfissatut ammaanneqarmat, pissusissamisoorpoq tusarniaanerup tamanut ammarneqarnissaa.

Allannguutit pingaarnerit tassaapput:

• PPS-ip siunertaa pillugu § 1 nutaaq ikkunneqarpoq,
• Kommunip sinniisuutitaanut paarlakaajaattarnermik aaqqissuussinermut tunngatillugu ilaasortat § 2-mi erseqqissarneqarput, kommunillu ilaasortatut sinniisuutitaqanngitsut, aalajangersimasumik peqataasinnaanngortinneqarlutik, taasisinnaanatilli,
• Suliffeqarfiit kattuffiillu ataatsimeeqataatitatut toqqarneqarsinnaanissaat ataatsimut isigalugu periarfissanngortinneqarsimavoq, tassunga ilanngullugu ilanngussaq 1-imik pilersitsisoqarsimavoq, tassaniillutillu Piniarneq pillugu Siunnersuisoqatigiinnut ataatsimeeqataatitat allattorsimaffiat, ataatsimeeqataatitanut ataatsimut takussutissap tamatigut nutartersimanissaa qularnaarniarlugu nutarterneqartuarsinnaasoq. Siunnersuisoqatigiit inassuteqarnerisigut imaluunniit Naalakkersuisunut ilaasortap aalajangiineratigut ilanngussaq nutarterneqarsinnaavoq.
• Ataatsimeeqataatitassanut qinnuteqaat, qinnuteqartut piniarnermut aallaaniarnermullu suliassaqarfimmi piginnaasaat kiisalu Naalakkersuisut Siunnersuisoqatigiit katitigaanerannik allannguinissamut tunngavissaat pillugit imm. 5-9 nutaat ikkunneqarput,
• Tamatuma saniatigut § 3-mi Siunnersuisoqatigiit suliassaannut tunngatillugu 2023-mi inatsimmut nutaamut naleqqussaasunik annertuumik erseqqissaasoqarpoq, ilaatigut siunnersuutit suliassanut ataasiakkaanut tunnganatik tamanut ataatsimullu isigisumik sammiveqartarnissaat ilaatinneqarluni,
• § 4-p pisoqqap ilai allakkatigut tusarniaasarnermut tunngasut pissusissamisoornerusumut § 3-mut nuunneqarput,
• § 4-mi ataatsimeeqataatitat piffissaqartoqarpat oqaaseqarnissaannut piginnaatinneqarput,
• § 5-imi qulequtaa ilaatigullu siulittaasup KNAPK-mit, TPAK-mit aamma kommuninit tulleriiaarlutik qinigaasarnissaa, siulittaasuutitaqarnerlu ukiuni marlunni sivisussuseqarnissaa erseqqissarneqarput. Tamatuma saniatigut siulittaasup tullersortaata suliassai erseqqissarneqarput,
• § 6-imi oqaluuserisassatut siunnersuutit tunngavilersorluarsimasarnissaat ilanngussassallu attuumassutillit ilanngunneqartarnissaat kiisalu tamanut ataatsimullu isigisumik sammiveqartarnissaat ilanngunneqarput,
• Aalajangikkat eqikkarneri naalakkersuisut.gl-imi kalaallisut danskisullu tamanut saqqummiunneqartassapput.
• Ataatsimiinnerit kalaallisut ingerlanneqartarput, oqalutseqarnissarlu qinnutigineqarsinnaalluni.
• § 7-imi: Siunnersuisoqatigiinni ilaasortat sulinerannut atatillugu Siunnersuisoqatigiit aningaasartuutigisaat kattuffimmit oqartussanilluunniit ilaasortap sinniisuutitaaffigisaanit akilerneqartassapput, siullermut sanilliullugu allannguutaavoq aammalu Aalisarneq pillugu Siunnersuisoqatigiinni suleriaatsimut naleqqussaanerulluni,
• § 8-mi allassimasut inatsimmut nutaamut tunngatillugu naleqqussarneqarput, taamaalillutik Naalakkersuisut suleriaaseq, tassunga ilanngullugit allannguutit aalajangersartassavaat, tamannalu Aalisarneq pillugu Siunnersuisoqatigiinni suleriaatsimut naleqqussaanerulluni,
• Allannguinerit allat annikitsuupput oqaatsitigulluunniit iluarsiinerullutik.