Ukiuunerani 2024-mi tuttunniarnissamut aamma umimmanniarnissamut piffissaliussat pisassiissutillu pillugit tusarniaaneq
Matumuuna Ukiuunerani 2024-mi tuttunniarnissamut umimmanniarnissamullu piffissaliussat sumiiffinnilu tuttutassiissutit kiisalu umimmattassiissutit pillugit siunnersuutit tusarniutigineqarput.
Aqutsiveqarfiit Qaanaaq aamma Ittoqqortoormiit immikkut nalunaarfigineqarput.
Marsimi 2018-imi Pinngortitaleriffimmiit Piniarfik 2-mi (Sisimiut-Kangerlussuaq) pisortatigoortumik qulimiguulimmik tuttunik aamma umimmannik kisitsisoqarnikuuvoq, taamatullu Piniarfik 3-mi (Akia-Maniitsoq) aamma Piniarfik 4-mi (Ameralik) martsimi 2019-imi pisortatigoortumik qulimiguulimmik tuttunik kisitsisoqarnikuulluni. Kisitsinerniit pineqartuniit pisortatigoortumik nalunaarusiat tamarmik naammassineqareerput.
Tuttut
1. Piniarfik Nuussuaq: Aasaanerani aamma ukiaanerani 2023-mi tuttutassiissutinit pisarinngitsuukkat piffissami 29. januaarimiit 2024-mi 18. februaari ilanngullugu piniarneqassapput. Kommune Qeqertalik aamma Avannaata Kommunia suleqatigalugit pisarinngitsuukkat amerlassusaat aalajangerneqassaaq.
2. Piniarfiit sinneri: Piniarfinni sinnerini ukiuunerani tuttunniartoqassanngilaq.
Tunngavilersuutit: Aasaanerani aamma ukiaanerani 2023-mi Piniarfimmi 2-mi (Sisimiut-Kangerlussuaq), Piniarfik 3-mi (Akia-Maniitsoq) aamma Piniarfik 4-mi (Ameralik) qaammatini pingasuni killeqanngitsumik sunngiffimmi tuttunniartoqareerpoq taamatullu qaammatini tallimani killeqanngitsumik inuussutissarsiutigalugu tuttunniartoqareerluni. Piniarfinni pineqartuni Pinngortitaleriffik naapertoglugu tuttut amerlavallaalersimanerat tassunga tunngaviuvoq ikilisaasoqartariaqarluni. Piniarfinni sinnerini ikinnerusunik tuttoqarfiusut qaammatini marlunni killeqanngitsumik sunngiffimmi tuttunniartoqareerpoq taamatullu qaammatini pingajuat qiteqqullugu killeqanngitsumik inuussutissarsiutigalugu tuttunniartoqareerluni. Taamaammat ukiuunerani tuttunniarnissamut immikkut ittumik tunngavissaqanngilaq.
APN-ip kommunit qanimut suleqatigalugit akuersissutinik utertitsisarneq malinnaaffigivaa, utertinneqartannginnerat taamatullu pisanik nalunaaruteqartannginneq piniartunut ataasiakkaanut akuersissutinik qinnuteqarsinnaanissamut ukiuni aggersuni kinguneqassaaq. Erseqqissaatigineqarpoq qamuteralannik, ATV-nik kiisalu qamutinik motoorilinnik allanik atuinermi kommunimi ileqqoreqqusat malinneqassasut, tuttunillu malersuinermi piniarnermilu atornissaat inerteqqutaammat. Assartuutit motoorillit tuttunut minnerpaamik 500 meterinik ungasissuseqassapput.
Umimmaat
3. Aqutsiveqarfik Maniitsoq: Piniarfik 1-imi ukiuunerani killilimmik umimmanniarneq assartuutinik atuiffigeqqusaanngitsoq 29. januaarimiit 18. februaari 2024-mi ilanngullugu sapaatip akunnerini pingasuni ingerlassaaq. Piniarfik 1-mi 100-nik umimmattassiisoqarpoq. Piniarfik 2-mi, Piniarfik 3-mi aamma Piniarfik 4-mi ukiuunerani umimmanniartoqassanngilaq.
4. Aqutsiveqarfik Sisimiut: Aasaanerani aamma ukiaanerani 2023-mi umimmattassanit pisarinngitsuukkat ukiuuneranut 2024-mi piniarnissamut nuunneqassapput piffissami 29. januaarimiit 11. februaari ilanngullugu sapaatip akunnerini marlunni ingerlanneqartussamut. Qeqqata Kommunia suleqatigalugu pisarinngitsuukkat amerlassusaat aalajangerneqassaaq.
5. Aqutsiveqarfik Kangaatsiaq: Aasaanerani aamma ukiaanerani 2023-mi Sisimiut aqutsiveqarfiani umimmattassanit pisarinngitsuukkat ukiuuneranut 2024-mi piniarnissamut nuunneqassapput piffissami 29. januaarimiit 11. februaari ilanngullugu sapaatip akunnerini marlunni ingerlanneqartussamut. Kommune Qeqertalik suleqatigalugu pisarinngitsuukkat amerlassusaat aalajangerneqassaaq.
6. Umimmaqarfik Naternaq: Aasaanerani aamma ukiaanerani 2023-mi aqutsiveqarfinnut umimmattassanit pisarinngitsuukkat kommunikkaartumik ukiuuneranut 2024-mi piniarnissamut nuunneqassapput piffissami 12. februaarimiit 10. martsi ilanngullugu ingerlanneqartussamut. Kommune Qeqertalik aamma Avannaata Kommunia suleqatigalugit pisarinngitsuukkat amerlassusaat aalajangerneqassaaq.
7. Umimmaqarfik Ivittuut: Ukiuunerani umimmanniartoqassanngilaq.
8. Umimmaqarfik Sigguk: Ukiuunerani umimmanniartoqassanngilaq.
9. Umimmaat allat Nanortalimmut nuunneqarsimasut aamma Nuup Kangerluanut ingerlaarnikut eqqissisimatitaapput.
Tunngavilersuutit: Aqutsiveqarfik Ivittuuni: Ukiuni kingullerni umimmannik inunnik aalajangersimasunit ikinnerpaaffiliinikkut kisitsisoqartarnera tunngavigalugu ukiuunerani 2024-mi umimmanniartoqassanngilaq. Ivittuuni umimmaat maannakkut amerlavallaannginnerat tunngavigineqarpoq.
Aqutsiveqarfik Sisimiut-ni: Aasaanerani aamma ukiaanerani umimmattassat misilittakkat tunngavigalugit tamakkerneqartanngillat, taamaammat pisarinngitsuukkanik ukiuuneranut nuussisoqassaaq.
Aqutsiveqarfik Kangaatsiaq-mi: Aasaanerani aamma ukiaanerani Sisimiut aqutsiveqarfiani umimmattassat misilittakkat tunngavigalugit tamakkerneqartanngillat, taamaammat pisarinngitsuukkanik ukiuuneranut nuussisoqassaaq.
Aqutsiveqarfik Maniitsoq-mi: Aqutsiveqarfik Maniitsoq-mi umimmaat 2018-mi qulimiguulimmiit kisinneqarput. Kisitsineq marsimi ingerlanneqartoq malillugu umimmaat siornamut naleqqiullugu immamiit uuttorlugu qatsinnerusuni takuneqartarput (agguaqatigiissillugu 700 meterinit qutsinnerusuni), sumiiffiillu pineqartut neriniarfittut pitsaannginnerusutut nalilerneqarput. Umimmannik akornusiinnginnerunissaq siunertaralugu Pinngortitaleriffiup inassutigaa aqutsiveqarfimmi assartuutinik motorilinnik atuineq minnerpaaffimmiitinneqassasoq.
Piniarfik 2-mi immikkut aamma taamaattoqartartoq ikinnerpaaffiliinikkut kisitsinerni paasineqareerpoq. Piniarfik 2-mi, Piniarfik 3-mi aamma Piniarfik 4-mi kulavaat ilumioqartut akuttusigaluttuinnartut piniartut aamma nakkutilliisut ukiuni kingullerni oqariartuutigaat. Kulavaat ilumioqartut taamatullu norraat amerliseqqinnissaat siunertaralugu Pinngortitaleriffiup inassutigaa Piniarfik 4-mi ukiuunerani umimmanniartoqassanngitsoq, tamannalu APN-imit taperserneqarpoq.
Piniartut atuisullu ilisimasaat malillugit aqutsiveqarfimmi umimmaat ukiuni kingullerni takuneqartartut ikiliartorput, tamannalu ukiuunerani umimmanniarnerup assartuutit motoorillit atuiffiusup umimmaqatigiinnut ajortunik kinguneqartarneranut takussutissaavoq. Tamanna aamma martsimi 2018-imi qulimiguulimmik kisitsisoqarnerani paasineqarpoq, taamani nunaminertani assartuutinik motoorilinnik ingerlaarfigineqarsimasuni umimmannik takussaasoqanngilaq.
Piniartut atuisullu Kangerlussuarmeersut ilisimasaat malillugit ukiuni kingullerni pisarnermut naleqqiullugu nittaannerujussuusarpoq, tamannalu pillugu pingaartumik ukiuulernerani 2023-mi nunaminertarujussuit sermeqartiterlutik uumasullu taamaalillutik pisarnertut neriniarsinnaasimanatik. Tamanna kulavaat ilumioqartut ukiuni kingullerni akuttusigaluttuinnarnerannut peqqutaaqataasimasinnaavoq.
APN-miit erseqqissaatigineqarpoq qamuteralannik, ATV-nik kiisalu qamutinik motoorilinnik allanik atuinermi kommunimi ileqqoreqqusat malinneqassasut, umimmannillu malersuinermi piniarnermilu atornissaat inerteqqutaammat. Assartuutit motoorillit umimmannut uumasunut minnerpaamik 500 meterinik ungasissuseqassapput.
Tusarniaanermut piffissarititaavoq januaarip 15-at 2024 ilanngullugu.
Ilanngussaq 1: Nunap immikkoortuini piniarnissamut piffissat pisassiissutillu.
Ilanngussaq 2: Kalaallit Nunaata kitaani tuttunut Piniarfik 1-11.
Ilanngussaq 3: Kalaallit Nunaanni umimmaqatigiit.
Ilanngussaq 4: Maniitsup Aqutsiveqarfiani umimmannut Piniarfik 1, 2, 3 aamma 4.
Ilanngussaq 5: Umimmaqarfik Sisimiut kommunip aalajangersagai ilanngullugit.
Ilanngussaq 6: Umimmaqarfik Naternaq.
Ilanngussaq 7: Tuttoqarfik Nuussuaq.