Umiarsualivimmiinnermut aamma umiarsuit takornarianik angallassissutit ilaasunik angallassinerannut akileraarutit pillugit Namminersorlutik Oqartussat nalunaarutaannut missingiutip tusarniaassutigineqarnera
Manna umiarsualivimmiinnermut aamma umiarsuit takornarianik angallassissutit ilaasunik angallassinerannut akileraarutit pillugit nalunaarummut nutartigaasumut missingiut tusarniaassutigalugu nassiunneqarpoq.
Umiarsuit takornarianik angallassisut ilaasunik angallassinerannut akileraarut atuutseqqilerneqassasoq, 2023-mut aningaasanut inatsit pillugu isumaqatigiissummi Inuit Ataqatigiit, Siumut, Naleqqap, Demokraatit aamma Atassutip akornanni isumaqatigiissutigineqarpoq.
Umiarsuit takornarianik angallassisut ilaasunik angallassinerannut akileraarutip atuutseqqilernissaa pillugu siunnersuut maannakkorpiaq Inatsisartut 2023-mi ukiaanerani ataatsimiinneranni imm. 23-tut suliarineqalerpoq.
Siunnersuutip pingajussaanneerneqarnissaa ulloq 10. november 2023 pilersaarutigineqarpoq.
Nalunaarummut missingiummi siunnersuutip aalajangersagai aalajangersimasut erseqqissarneqarput.
Nalunaarummut missingiutip siusissukkut naalisarlugulu tusarniaassutigineqarneranut tunngaviusoq tassaavoq, kommuninut avatangiisinut aserfallatsaaliuinermullu akiliutip 1. januar 2024 atuutilereernissaata angumerineqarsinnaanissaanut, kommunit sumiiffinnik akiliutillu annertussusaannik akileraaruseriffimmut nalunaaruteqartussaanerat. Akiliutit annertussusai sumiiffimmit sumiiffimmut nikerartuusinnaapput, kisianni annerpaamik niunermi ataatsimi ilaasumut ataatsimut 50 kr.-nut aalajangersarneqarsinnaalluni.
Akiliummut ilaasut nunamukarnerat apeqqutaasussaanngilaq. Tassunga atatillugu amerlassusissaat aalajangiisuusussaq tassaavoq, umiarsuarmi takornarianik angallassissummi tikittumi niusoqarnerani ilaasut umiarsuarmiittut amerlassusaat.
Kommunit sumiiffinnik aamma akiliutit annertussusaannik akileraaruseriffimmut nalunaarutiginninnissaannut killigititaq kingusinnerpaamik ulloq 1. december 2023-
ussasoq, kommuninut ilisimatitsissummi siunnersuutigineqarpoq.
Tusarniaanermut akissuteqarnissamut killigitinneqarpoq ulloq 14. november 2023.
Tusarniaanermut akissuteqaatit OED@nanoq.gl aqqutigalugu aamma marf@nanoq.gl CC-erlugu nassiuteqquneqarput.