Kalaallit Nunaata eqqaani aningaasaqarnermut killeqarfiup avataani immami avatangiisit illersorneqarnissaannut inatsisip allannguutissaatut siunnersuut
(Immami sulianiit mingutsitsisarneq pillugu maleruagassiorsinnaanermut piginnaatitsisarneq, tassunga HFO-p umiarsuarnut ikummatissatut atorneqarnissaanut inerteqquteqarneq ilanngullugu)
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup matumuuna naalagaaffimmi oqartussaasut Kalaallit Nunaata eqqaani aningaasaqarnermut killeqarfiup avataani immami avatangiisit illersorneqarnissaannut inatsisip allannguutissaatut siunnersuutaat tusarniaassutigalugu nassiuppaat. Siunnersuut siusinnerusukkut Danmarkimi Avatangiisinut Ministereqarfimmut tusarniaassutigalugu nassiunneqarsimavoq, maannalu aamma taamatut Kalaallit Nunaannut tusarniaassutigineqarluni.
Tunngavigisaq
FN-ip imarsiornermut suleqatigiiffiata ataani Marine Environment Protection Committee-p (MEPC) Issittumi Heavy Fuel Oil-ip (HFO) umiarsuarnut ikummatissatut atorneqarnissaanut assartorneqarnissaanullu inerteqquteqarneq 2021-mi akuersissutigaa. Immami uuliaarluernermik mingutsitsinissap killilersorneqarnissaa pingaarnertut siunertarineqarpoq. Kisiannili aamma HFO-p Issittumi umiarsuarnut ikummatissatut atorneqarnerani silaannarmik mingutsitsinissaq inerteqquteqarnermi killilersorniarneqarpoq.
Inerteqquteqarnerup kingunerisaanik umiarsuit issittumiittut HFO-mik ikummatissatut atuisinnaajunnaassapput imaluunniit ikummatissatut atorneqarnissaa siunertaralugu HFO-mik assartuussisinnaajunnaassallutik.
Inerteqquteqarneq 1. juuli 2024-mi atuutilissaaq. Kisianni umiarsuit qaleriinnik timitallit aatsaat 1. juuli 2029-mi inerteqquteqarnermut ilaatinneqalissapput. Kiisalu Issittumi naalagaaffiit umiarsuarnut, naalagaaffimmi pineqartumi inatsisinik atuutsitsiffiusuni sullissillutik angalanermini namminneerlutik erfalasuminnik atuisunut HFO-mut inerteqquteqarnermik saneqqutsisinnaanissamut immikkut ittumik akuersissuteqarsinnaapput. Immikkut ittumik akuersissut sivisunerpaamik 1. juuli 2029 tikillugu atuutsinneqarsinnaavoq
Inerteqquteqarnermut HFO umiarsuarmut tankilimmut namminermut atorneqartussaatinnagu, HFO-mik umiarsuarni tankilinni usiliunneqarsimasumik assartuussinissaq ilaatinneqanngilaq.
HFO-mik inerteqquteqarnermik atuutsitsilernissamut killiliussaq tassaavoq 1. juuli 2024.
Maleruagassanut nassuiaatit
Inatsisissatut siunnersuut malillugu Kalaallit Nunaanni aningaasaqarnermut killiliussap avataani issittumiittumi HFO-mik inerteqquteqarneq atuutsinneqarsinnaalissaaq. Maanna inatsisini atuuttuni inatsisitigut tunngavissamik erseqqissumik peqanngimmat inatsisissatut siunnersuut pisariaqarpoq. Taamaattumik inatsisissatut siunnersuut piginnaatitsinissamut aalajangersakkami siammasissumik atuuttussamik, nalunaarummik, HFO-mik inerteqquteqarnermut maleruagassanik sukumiisunik imalimmik nalunaarusiornermut atorneqartussatut naatsorsuutigineqartumik imaqarpoq.
Piginnaatitsinissamut aalajangersakkatut nutaatut siunnersuutigineqartup oqaasertalerneqarnera siammasissumik atorsinnaavoq, taamaalillunilu aamma siunissamut qulakkiigaavoq, taamaalluni siunissami pisariaqartitsisoqalissagaluarpat aalajangersagaq allanik nutaanik maleruagassiornissamut tunngaviliisinnaammat.
Erseqqissaatigineqassaaq, imartani avatangiisinik illersuineq pillugu Inatsisartut inatsisaat nr. 15, 8. juuni 2017-imeersoq, sinerissamiit 3 sømilit tikillugit imartamut atuutsinneqartoq inatsisitigut tunngavissamik assingusumik imaqareermat, taassumalu nalunaarummik, HFO-mik inerteqquteqarnermut maleruagassanik sukumiinerusunik imalimmik suliaqartoqarnissaanut atorneqarnissaa naatsorsuutigineqarmat. Taamaattumik imartani sinerissamut qanittuniittuni kangerlunnilu HFO-mik inerteqquteqarnerup atulersinneqarnissaanut Inatsisartut inatsisaata allanngortinneqarnissaa pisariaqartussaanngilaq.
Tusarniaanermi piffissarititaasoq
Tusarniaanermi akissuteqaat kingusinnerpaamik XX-XX-2023-mi Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmut nassiuteqquneqarpoq. Tusarniaanermi akissutaat Naalakkersuisoqarfiup pisortatigoortumik e-mailadressianut nassiunneqassaaq: pan@nanoq.gl.
Inatsisissatut siunnersuut pillugit apeqqutit uunga nassiunneqarsinnaapput: pan@nanoq.gl