Aalisarsinnaanermut akuersissutit pisassiissutillu pillugit Namminersorlutik Oqartussat 2023-mut nalunaarutaat
Aalisarsinnaanermut akuersissutit pisassiissutillu pillugit Namminersorlutik Oqartussat 2023-mut nalunaarutaat pillugu missingiut matumuuna tusarniaassutigineqarpoq. Pilersaarutigineqartutut atuutilerfissaa august-ip qeqqa 2023.
Tusarniaassutigineqartut ilanngussat makkuupput:
- Uunga siunnersuut: Aalisarsinnaanermut akuersissutit pisassiissutillu pillugit Namminersorlutik Oqartussat 2023-mut nalunaarutaat
Siunnersuut ilaatigut inatsisilerinermi teknikikkut pissuseqarpoq, qitiutinneqarporlu nalunaarummik atuaruminarnerusumik pilersitsinissaq, taannalu paasiuminarnerussaaq, kiisalu Aalisarnermut Piniarnermullu Naalakkersuisoqarfimmi sulianik ingerlatseriaaseq paasiuminarnerulersinneqassalluni. Tamatuma saniatigut innuttaasut maanna inatsisitigut inissisimanerini allannguinernik siunnersuut aamma imaqarpoq.
Innuttaasut maanna inatsisitigut inissisimanerannut pingaarutillit pillugit allannguinerit uani erseqqissaatigineqarput:
1. Akuersissut ull. 1. december nallertinnagu atorneqarsimanngippat, tassa aalisartoqarsimanngippat, qaammatisiutit ukiuisa tulliani akuersissummik tunineqarsinnaanermut pisinnaatitsineq atorunnaassaaq. Tamanna akuersissummi takuneqarsinnaalissaaq. Tamatumani immikkut akuersissuteqarnissamik periarfissaq atuutilertussaavoq. Takuuk § 21.
(Tamatumani siunertaavoq aalisartut ingerlataqanngitsut aalisarnermit ilaajunnaarsinnissaat)
2. Aserortoorneq, napparsimaneq, tunitsivissaleqineq il.il. pissutigalugu qaammatisiutit ukiuata siulianit akuersissutip assinganik tunineqarnissamik pisinnaatitaajunnaarnikunut immikkut akuerineqarnissamik periarfissaq nutaaq. Takuuk § 21 imm. 3
3. Aalisartunut angallammi sulinikuusunut inuussutissarsiutigalugu akuersissummik pissarsinissamut immikkut akuerineqarnissamik periarfissaq nutaaq. Takuuk § 24.
4. Inuusuttunut aalisartunut qanoq ukioqarnissamik piumasaqaatip allanngortinnera, taamaalillutik inuusuttut 15-inik ukioqalereernerminni qinnuteqarsinnaanngortillugit. Inuusuttut aalisartut taamaalillutik umiatsiaaraq aalisaatertik pigisariaqanngilaat. Taannali suli inuussutissarsiornermut akuerineqarsimasariaqarpoq.
5. Misileraalluni aalisarneq pillugu paragrafit nutaat, tassani ersarissarneqassammata misileraalluni aalisarnermik pilersitsinermi akuersissutinillu tunniussinermi aqutsinikkut ingerlatseriaaseq. Takuuk kapitali 7.
6. Attartornermi isumaqatigiissutit pillugit immikkoortoq nutaaq. Tassani pineqarput angallatinik nunani allaneersunik attartornermi uppernarsaasiisarnermut piumasaqaatit nutaat, aamma kalaallit angallataannik nunanit allanit attartorneq. Nakkutilliinermik ingerlatsinitsinni nunani tamalaani piumasaqaatit naapertornissaasa isumannaarneqarnissaannut taamatut nutaanik piumasaqaasiortoqarpoq. Takuuk kapitali 8
Tusarniaanermit akissutit kingusinnerpaamik ulloq 31. juli nal. 16.00 mailikkut Aalisarnermut Piniarnermullu Naalakkersuisoqarfimmut nassiunneqassapput, una atorlugu: apn@nanoq.gl
- Tusarniaanermit akissutit nassiunneqartussat kalaallisut danskisullu ingerlanneqarsinnaapput.