Missingiutit tusarniaaffigineqarnerat: Uunga siunnersuut: Aningaasarsianit akileraarutit pillugit inatsisip allanngortinnissaa pillugu Inatsisartut inatsisaat

Tusarniaanermi akissuteqaammik nassiussinissamut killiliussaq tassaavoq: tallimanngorneq ulloq 7. juli 2023.

Siunnersuummut oqaaseqaataasinnaasut uunga e-mailimut nassiuteqquneqarput: oed@nanoq.gl cc-lugu pnil@nanoq.gl

Eqikkaaneq
Siunnersuut aningaasarsianit akileraarutit pillugit Inatsisartut inatsisaannut assigiinngitsunik allannguutitaqarpoq. Siunnersuummi uku pingaarnerupput:

• 2023-mut aningaasaqarnermut inatsisissatut isumaqatigiissummut atatillugu Kalaallit Nunaanni nunanit allanit aningaasaliiffigitittarneq pilerinarnerulersinniarlugu pingaarnermik erngup nukinganut akuersissutinik suliarinnittussarsiornermik, tamatumanilu suliffissuaqarfiit nukissiornermik pisariaqartitsisunut aningaasaliinermik, power-2-x-imik nioqqutissiornermik, aatsitassarsiornermik aamma sermimik imermillu tunisassiornermik, kiisalu inatsisissatut siunnersuut suliniutinik arlalinnik imaqarpoq:
  
  • Tamatumani ingerlatseqatigiiffiit ilaatigut kapitali 3 b naapertorlugu akileraarusiiffigitinnissamut periarfissaqassapput, tamatumanilu aningaasarsianit akileraarutit pillugit Inatsisartut inatsisaanni akileraaruseeriaaseq ilaatigut allannguuteqarpoq: Ingerlatseqatigiiffiit kapitali 3 b ilaasut, iluanaarutinik agguaassinermi ilanngaateqassannginnerat, iluanaarutinik tunniussineq iluanaarutit akileraarutaannut nutaamut ilaatinneqarnissaat, ingerlatseqatigiiffillu ingerlatseqatigiiffiit pigisanit iluanaarutinik akileraaruteqanngitsumik piginnittunut akiliisinnaanissaat kapitali 3 b-mi akileraarut pillugu atulersinneqarpoq.
  • Annikitsumik aningaasalersuisarnermut inatsit oqilisarneqassasoq siunnersuutaavoq.
  • Amigartoorutit atorneqanngitsut nuunnissaannut pisinnaatitaaneq piumasaqaatit ilaanni ukiut tallimanit ukiut qulinut sivitsorneqassasoq siunnersuutaavoq.
• Sulisup il.il. angalaneri sulisumit akilerneqartut tunngavitsigut akileraaruteqassanngitsut siunnersuutaavoq. Tamatuma saniatigut maanna maleruagassaq (§ 19) akeqanngitsumik angalanerit akileraarusertarnerat, ilaannarmik akeqanngitsumik angalanerit kiisalu angalanerit ilaannut 2.000 kr.-mik malittarisassaq atorunnaassasoq siunnersuutaavoq.
• Kalaallit Nunaanni ingerlatseqatigiiffinnut, nunani allani akiitsulinnut, erniatigut akilertagaannut 25%-mik akileraarutinik ilaatigut unerartitsisarnissaannut, nunani allani akiligassaqarfinnut pisartunut, erniatigut akileraarutitaqassasoq siunnersuutaavoq. Tamannili akiligassaqarfik 15% ataallugu erniatigut akileraarusertarpat, imaluunniit akiligassaqarfiup nunaq najugarisaani akileraartarnerup atorunnaarnissaanik imaluunniit oqilisarnissaanik maleruagassanik, marloqiusamik akileraartarnissamut isumaqatigiissuteqartoqanngippat atuutissaaq.
• Ingerlatseqatigiiffiit pigisat nalillit isumakkeerneqanngitsuni (iluanaaruteqarnermi isumakkeerinerit) umiarsuarnik, timmisartunik pigisanillu aalaakkaasunik tunniussinermi iluanaarutinik isumakkeersinnaanerat atorunnaassasoq siunnersuutaavoq.
• Ingerlatseqatigiiffiit pigisat nalillit ilaasa tuniniarneqarneranit iluanaarutit assingusumik pigisaq nalilimmik (pissarsiareqqinneq) pissarsinermeersut isumakkeerneqarnissaat inatsisitigut atulissasoq siunnersuutaavoq.