Isiginnaartitsisutut bacheloritut ilinniagaqalerniarluni piumasaqaatit akuerisaasarnerlu pillugit Namminersorlutik Oqartussat nalunaarutaat

Siunnersuutip 1. juni 2023-mi atuutilernissaa naatsorsuutigineqarpoq. Tusarniaassutigineqartumut oqaaseqaataajunnartut Ilinniartitaanermut, Kultureqarnermut, Timersornermut, Ilageeqarnermullu Naalakkersuisoqarfimmit kingusinnerpaamik 31. marts 2023-mi tiguneqareersimassapput. Oqaaseqaatit emailikkut uunga nassiunneqaqqupput: ikin@nanoq.gl.

Siunertaq
Siunnersuummi Qaffasinnerusumik ilinniartitaanerit pillugit Inatsisartut inatsisaata allanngortinneqarnera pillugu Inatsisartut inatsisaat nr. 15, 1. december 2021-meersumi (Eqqumiitsuliornermik qaffasinnerusumik ilinniarfinni ilinnialernissamut piumasaqaatit,
ilinniarnermut ileqqorissaarnermullu malittarisassat, paasissutissanik nakkutilliineq pissarsiortarnerlu aamma misileraalluni ineriartortitsinermillu suliaqarneq) § 31 a, imm. 2-mi pisinnaatitaaneq pillugu aalajangersakkap atuuttussanngortinneqarnissaa siunertarineqarpoq. § 31 a-mi Naalakkersuisut eqqumiitsuliornermik qaffasinnerusumik ilinniarfinni ilinniartussanik akuerisaasarnermut atatillugu ilinnialernissamut piumasaqaatinik saneqqutsisoqarnissaa akuerisinnaavaat. § 31 a, imm. 2-mi Naalakkersuisut qaffasinnerusumik ilinniarfinni ilinnialernissamut akuerisaanissamullu malittarisassanik erseqqinnerusunik aalajangersaasinnaallutik piginnaatinneqarput. Imm. 2-mi piginnaatitsinissaq pillugu aalajangersagaq nalinginnaasumik eqqumiitsuliornermi qaffasinnerusumik ilinniagaqarnernut atuuppoq. Siunnersuut
nassiunneqartoq isiginnaartitsisarnerni bacheloritut ilinniagaqarneq kisimi ilaatinneqarpoq. Nalinginnaanerusumik siunissamullu nalunaarutip qulakkeerneqarnissaanut qaffasinnerusumik bacheloritut ilinniakkat tamaasa ilanngunneqarsinnaasumik nalunaarusiornissaq eqqornerussanersoq
Naalakkersuisoqarfimmi eqqarsaatersuutigineqarsimavoq. Maannakkut nunatsinni eqqumiitsuliortutut ilinniakkamik qaffasinnerusumik ilinniarnertut immikkoortinneqarsimasumik soqanngilaq. Kisianni qaffasinnerusunik ilinniakkanik allanik pilersitsisoqassappat soorlu nipilersornerup, filmiliornerup assilialerinerulluunniit iluini, taava § 31 a, imm. 1 pisuni tamakkunani aamma atuutissaaq. Eqqumiitsuliornermi qaffasinnerusunik ilinniakkanik amerlanerusunik pilersitsisoqarnissaata tungaanut Naalakkersuisoqarfimmit naleqquttuusorineqarpoq nalunaarut una taamaallaat isiginnaartitsisarnerni bacheloritut ilinniagaq kisimi atuutissasoq. Naalakkersuisoqarfimmit Nunatta Isiginnaartitsisarfia suleqatigalugu nalunaarutissatut siunnersuut ilanngunneqartoq suliarineqarpoq.

Siunnersuutip immikkoortui pingaarnerit

Siunnersuummi immikkoortut pingaarnerit tullinnguuttuni ilanngunneqarput:

- Ilinniakkami ilinniagaqalernissamut piumasaqaatinik aalajangersaanerit.

- Ilinniakkamut akuerisaanissamut misilitsinnissaq tassanilu ingerlatseriaasissaanik aalajangersaanerit.

Siunnersuummut tunngaviusut
UKA 2021-mi Inatsisartut Qaffasinnerusumik ilinniartitaanerit pillugit Inatsisartut inatsisaata allanngortinneqarnera Inatsisartut inatsisaat nr. 15, 1. december 2021- meersoq (eqqumiitsuliornermi qaffasinnerusumik ilinniartitaanerni ilinnialernissamut
piumasaqaatit, ilinniarnermut ileqqorissaarnermullu malittarisassat, nakkutilliineq paasissutissanillu pissarsisarneq aammalu misileraanermut inerisaanermullu tunngasunik suliaqarneq) akuersissutigivaat. Allannguut taanna ilinnialernissamut akuerisaanissamut misilitsinneq taamaallaat tunngavigalugu isiginnaartitsisartunngorniarfimmi ilinniartunik akuersisoqarsinnaalernissaanut inatsisitigut tunngavissamik pilersitsinissamik siunertaqarpoq taamaalillunilu Qaffasinnerusumik ilinniartitaanerit pillugit Inatsisartut inatsisaat nr. 14, 12. juni 2019-
imeersoq naapertorlugu bacheloritut ilinniagaqalernissamut piumasaqaatinit nalinginnaasunit sanioqqutsitsilluni. Taamaalilluni isiginnaartitsisartutut bacheloritut ilinniagaqarnissamut qinnuteqartup eqqumiitsuliornermik piginnaasai aalajangiisuusarput. Qaffasinnerusunik ilinniakkat pillugit inatsimmi allannguutit Nunatta Isiginnaartitsisarfiani isiginnaartitsisarnerni bacheriloritut ilinniakkamik neqerooruteqarsinnaajumalluni isiginnaartitsisarnerni inuussutissarsiutini ilinniakkap atorunnaarsinneqarnissaanik kissaateqarneq tunngavigalugu pilersinneqarpoq.

Aningaasaqarneq
Isiginnaartitsisartutut bacheloritut ilinniakkamik aningaasaliissutit isiginnaartitsisartutut inuussutissarsiutini ilinniakkat aningaasaliiffigineqarnerisa iluini aningaasalerneqassaaq. Nunatta Isiginnaartitsiviani allakkiamini 30. september 2020-meersumi isiginnaartitsisartutut eqqumiitsuliornermi qaffasinnerusumik bacheloritut ilinniagaq Nunatta Karsianut aningaasartuutit annertusinavianngitsut Naalakkersuisoqarfimmut paasissutissiissutigaa, taamaalillutik isiginnaartitsisartutut ukiuni marlunni inuussutissarsiutini ilinniagaq ukiuni pingasuni bacheloritut ilinniakkatut atorneqarsinnaassaaq. Tamanna Nunatta Isiginnaartitsisarfiani ukiut marlukkuutaarlugit ilinniartuuteqalertarneq unitsillugu ukiut pingajussaanni ilinniartuuteqalertarneq kissaateqarnermik pissuteqarpoq, taamaallutik ilinniakkami holdit ataasiinnaasarniassammata. Taamaalilluni annertusaanermi aningaasatigut allaffissornikkullu kingunissaasa ilinniarfik imaluunniit Nunatta Karsia artorsartinneqassanngillat