Høring af forslag til: Inatisartutlov om ændring af landstingsforordning om leje af boliger
Matumuuna inissianik attartortitsisarneq pillugu Inatsisartut peqqussutaata allanngortinneqarnissaa pillugu Inatsisartut inatsisaannut siunnersuut (Ineqarneq pillugu Maalaaruteqartarfiup kommunini inissiaatileqatigiiffinnut il.il. aalajangiisinnaatitaanerata annertusitinneqarnera) tamanut ammasumik tusarniaassutigalugu nassiunneqarpoq.
Siunnersuutigineqarpoq, inissiat toqqaannartumik imaluunniit toqqaannanngitsumik Namminersorlutik Oqartussat kommunillu nalinginnaasumik inissiamik pilersuineranni ilaatinneqartut aaqqissuussaanerisa pissusiviusuni allanngortinneqarnerisa malitsigisaanik, Ineqarneq pillugu Maalaaruteqartarfiup aalajangiisinnaatitaaffii annertusitinneqassasut aammalu erseqqissarneqassasut.
Kommunit arlallit inissianut aktiaatileqatigiiffinnik pilersitsisimanerat aammalu pisortat inissiaataannik attartortittakkanik aktiaatileqatigiiffinnut taakkununnga tunniussisimanerat tunngavigalugu tamanna pivoq. Aammattaaq Namminersorlutik Oqartussat illuutileqatigiiffik Iluut A/S pigisaraat.
Tassunga ilanngullugu Kommuneqarfik Sermersuup allanut attartortitseqqinnissaq siunertaralugu Nuummi inissianik amerlanerusunik amerlassusilinnik attartornissaa pillugu Kommuneqarfik Sermersooq inissianik piginnittunut namminersortunut isumaqatigiissuteqarsimavoq.
Taamaattumik aaqqissuussaanerup allanngortinneqarneranut Ineqarneq pillugu Maalaaruteqartarfiup aalajangiisinnaatitaaffiinut attartortitsisarnermut inatsisip naleqqussarneqarnissaa pisariaqarpoq.
Eqqumaffigeqquneqassaaq atuutilernissaanut aalajangersagaq 2022-mi aggustip aallaqqaataanut siunnersuutigineqarmat, 2022-mi upernaakkut Inatsisartut ataatsimiinneranni allannguutissatut siunnersuutip suliarineqarnissaa naatsorsuutigineqarluni.
Siunnersuummut tunngaviusut, taassuma siunertaa imarisaalu pillugit erseqqinnerusunut siunnersuummut nassuiaatit ilanngullugit nassiunneqartut innersuussutigineqarput.
Oqaaseqaatit Ineqarnermut Attaveqaasersuutinullu Naalakkersuisoqarfimmi tiguneqareersimassapput kingusinnerpaamik sisamanngorneq ulloq 17. februar 2022. oqaaseqaatit Naalakkersuisoqarfiup pisortatigoortumik mailianut nassiunneqassapput box909@nanoq.gl imaluunniit uunga:
Ineqarnermut Attaveqaasersuutinullu Naalakkersuisoqarfik
Postboks 909
3900 Nuuk