Inuussutissarsiorneq

Takornariartitsineq
Takornariartitsinermi akuersissutinik tunniussaqartarnikkut aamma inatsisiliornikkut Naalakkersuisoqarfiup sulissutigaa nunatsinni takornariartitsinermik ingerlatsinerup pitsanngorsarneqarnera. Naalakkersuisoqarfik suliaqarpoq takornariartitsinermi periusissiamik nutaamik kiisalu aamma takornariartitsinermut inatsimmik.

Inuussutissarsiutinik siuarsaaneq
Naalakkersuisoqarfiup suliaraa inuussutissarsiutinik suliniutinik siammarsaaneq kiisalu nunaqarfinni inuussutissarsiutinik siuarsaaneq.

Inuussutissarsiornermi siunnersuisoqatigiit
Inuussutissarsiutinik siunnersuisoqatigiinni peqataanertigut, assersuutigalugu Nuummi Imarsiornermi Attaveqaqatigiiffimmi - Nuuk Maritime Network - aamma Kangerlussuup Siunissaa - Kangerlussuaq´s Fremtid - Naalakkersuisoqarfiup inuussutissarsiortut misigisartagaat tusartarpai. Tamanna pitsaanerusunik takussutissiisarpoq inuussutissarsiutit qanoq inissisimanerannik.

Kiffartuussinermi isumaqatigiissutit
Naalakkersuisoqarfiup suliarisarpai qinnuteqaatit aamma kiffartuussinermik isumaqatigiissutinik atortuulersitsisarluni - tunniussisarluni.
Namminersorlutik Oqartussat ullumikkut kiffartuussinermut isumaqatigiissuteqarput Kalaallit Nunaata Ammerivianut, Kalaallit Nunaanni Qitiusumik Tikeraat Ornittagaannut - Greenland Visitor Centre, Innovation Greenland kiisalu aamma Visit Greenland-imut.

Sermeq aamma Imeq
Naalakkersuisoqarfiup suliarisarpai qinnuteqaatit akuersissutinillu - licensinik - tunniussisarluni. Naalakkersuisoqarfiullu aamma sermimut aamma imermut periusissiassaq nutaaq suliaraa, tassanilu immikkut sammineqarpoq nunatsinniit kalaallit sermiutaannik aamma imermik avammut nioqquteqarneq.

Uumassusillit sananeqaataasigut isumalluutit
Naalakkersuisoqarfiup suliarisarpai aammalu malersoqqittarlugit malitseqartitsiviusunik qinnuteqaatit ilisimatusarnermi aamma avammut niueruteqarnissami nunatsinneersunik uumassusillit sananeqaataasigut isumalluutinik. Tamanna ingerlanneqarpoq qularnaarumallugu piujuaannartitsisumik ilisimatusarnikkut Kalaallit Nunaanni ingerlatsisoqarnissaa, kiisalu inatsisinut naapertuuttumik aamma tulluartumik naapertuilluartumillu iluanaarutaasunik avitseqatigiittoqartarnissaa pisuussutit pineqartut iluanaarutaasinnaasumik aningaasarsiutigineqalissappata.

Nunani Avannarlerni aamma EU-mut sammisunik inuussutissarsiornikkut nunarsuullu immikkoortuini naalakkersuinikkut suleqatigiinnerit
Naalakkersuisoqarfik peqataavoq nunat avannarliit naalakkersuisuisa suleqatigiinneranni taaneqartumi nordisk ministerrådssamarbejde atorfillit kommitiivini aamma suleqatigiiffinni assigiinngitsuni peqataanertigut, inuussutissarsiornermut aamma nunarsuup immikkoortuini asigiinngitsuni politikkikkut ingerlatsiviusuni. Kiisalu Naalakkersuisoqarfik aamma peqataavoq EU-mi suleqatigiinnermi taaguuteqartumi EU Interreg NPA-program.

Ussassaarineq aamma inuussutissarsiornikkut sassartaartarneq
Naalakkersuisoqarfik peqataasarpoq ingerlaavartumik ussassaarisarnertigut inuussutissarsiornikkullu sassartaarluni suliniutaasartuni assigiinngitsuni, siunnerfigalugu kalaallit nioqqutissiaasa avammut niuerutigineqarnerisa takoqqusaarutigisarnerat.


Niuerneq

Niuernikkut isumaqatigiissutit aamma niuertut peqatigiinnikkut ingerlatsivii
Naalakkersuisoqarfik peqataavoq niuernermut nunanut allanut isumaqatigiissutissanik sulianillu tamatumunnga attuumassuteqartunik ingerlatsinermi suleqatigalugu Naalagaaffinngornissamut Nunanullu allanut Naalakkersuisoqarfik.

Avammut niuernermut akuersissutit
Naalakkersuisoqarfiup suliarisarpai avammut niuersinnaanermut akuerissutit tunniunneqartarnerat, aningaasarsiutigalugu kalaallit nioqqutissiaannik niuernermi tamarmiusumi atuuttut. Avammut niuersinnaanermut akuersissutit ukiumut ataatsimut atuuttutut tunniunneqartarput.


Nunanik tamalaanik suleateqarnerit

Joint Committee
Naalakkersuisoqarfik nunarput sinnerlugu USA-mik suleqateqarnermik joint committee-mi ingerlatsisuuvoq. Aallussineq inissisimavoq niuernermi aamma aningaasaliisarnermi kiisalu takornariartitsinermi.