Nassuiaatit, periusissiat piitsaaliuinermilu suliniutit Meeqqanut, Inuusuttunut Ilaqutariinnullu tunngasut.

Susassaqarfiit: Suli atualinngitsut, Meeqqat inuusuttullu atugarliortut, Ilaqutariit meerartallit, Pitsaaliuineq, Meeqqanut inuusuttunullu isumaginnineq, Meeqqat pillugit Oqaaseqartartoq Meeqqallu pillugit Siunnersuisoqatigiit.

Inatsisit:
- Meeqqat tapersersorneqarnissaannut Inatsisartut inatsisaat, takuuk Namminersorlutik Oqartussat inatsit pillugu nalunaarutaat nr. 6 1. juuni 2022-meersoq
- Danmarkimi Kalaallit Nunaannilu neqeroorutini ulloq unnuarlu najugaqarallarneq pillugu nalunaarut.
- Ilaqutariit inatsiseqartitaanerannut suliassaqarfik
- Kommunit akunnerminni akiliiffigeqatigiittarnissamut pisussaaffii pillugit Inatsisartut peqqussutaat
- Oqartussaasoqarfiit assigiinngitsunik suliallit isumaginninnermi suliassat pillugit suleqatigiinnissaannut Inatsisartut peqqussutaat
- Isumaginninnermik suliassaqarfimmi pissaanermik atuineq pillugu inatsit
- Naartunermi, erninermi meeravissiartaarnermilu sulinngiffeqartarneq pillugu inatsit
- Qimarnguiit pillugit nalunaarut malittarisassallu

Isumaqatigiissutit:
Meeqqat pisinnaatitaaffii pillugit Naalagaaffiit Peqatigiit isumaqatigiissutaat, naalagaaffiup Danmarkip Naalagaaffiit Peqatigiit Meeqqat pillugit Ataatsimiititaliaannut nalunaarusiortarneranut nalilerneqartarneranullu peqataasarnissaq tamatuma malitsigaa

Aqutsisunut Allattoqarfik:
Immikkoortortaqarfiup naalakkersuisoqarfimmi nalinginnaasumik sullissineq sulisunullu HR-imut suliassaqarfik kiisalu nutsigassat attaveqaqatigiinnermilu suliassat isumagisarivai, tassunga ilanngullugit Naalakkersuisup, Naalakkersuisut Inatsisartullu atugassaasa pitsaassusaannik qulakkeerinninneq. Aammattaaq allattoqarfiup naalakkersuisoqarfimmi pisortamut kiffartuussinerit assigiinngitsut, ataatsimiinnernut il.il. atatillugu ataqatigiissaarinerit isumagisarai.

Inatsisilerinermut suliassaqarfimmi kiisalu naalakkersuisoqarfimmi tamarmi oqartussaqarfimmilu aningaasaqarneq Aqutsisunut Allattoqarfiup aammattaaq isumagisaraa. Meeqqanut, Inuusuttunut Ilaqutariinnullu isumaginninnikkut inatsiseqarnermut suliassaqarfiup iluani inatsisiliornermi aallussisumik peqataasarnissaq tamatumunnga ilaavoq, matumani nassuiaasiornerni inatsisilerinikkullu apeqqutinik nalinginnaasumik suliaqarnerni. Kiisalu inatsisiliornermut suliassat Meeqqat pillugit Oqaaseqartartumut aamma Meeqqat pillugit Siunnersuisoqatigiivinut tunngasut. Aammattaaq meeqqanut inuusuttunullu suliniutissanut naalakkersuinikkut aalajangerneqarsimasunut aningaasaqarnikkut misissueqqissaarnermik kiisalu atortussanik allanik ikorfartuutaasinnaasunik suliaqarnerit.


Suliassaqarfiit Assigiinngitsut Akornanni Suliniutinut Malittarinninnermullu Immikkoortortaqarfik
Meeqqanut, inuusuttunut ilaqutariinnullu kiisalu pitsaaliuinermut suliassaqarfimmut isumaginninnikkut aaqqissuusseqqinnernut atatillugu periusissat ineriartortitsinermullu suliassat immikkoortortaqarfiup isumagisarai.


Isumaginninnermut Aqutsisoqarfik:
Suliassaqarfiit:
Isumaginninnermut suliassaqarfimmi ingerlatsinermut ineriartortitsinermullu suliassat Isumaginninnermut Aqutsisoqarfiup isumagisarai: Nuna tamakkerlugu meeqqanut inuusuttunullu paaqqinnittarfiit aamma innarluutilinnut ulloq unnuarlu neqeroorutit ingerlanneqarnerat, kommuninik suleqateqarluni isumaginninnikkut suliffeqarfiit allilerneqarnissaat, inuuniarnikkut ajornartorsiutinik pitsaaliuineq katsorsaanerlu, kommuninut, suliffeqarfinnut il.il. ilitsersuinerit pikkorissartitsinerillu.
Isumaginninnermut Aqutsisoqarfik meeqqat tapersersorneqarnissaannut inatsit kiisalu inuit innarluutillit tapersersorneqarnissaannut inatsit naapertorlugit tapiissutit pillugit suliani inunnut kommunit aggulunneqarsimanerisa avataani najugalinnut isumaginnittoqarfittut atuuffeqarpoq.
Isumaginninnermut Aqutsisoqarfiup meeqqanut inuusuttunullu suliassaqarfiup kiisalu innarluutilinnut suliassaqarfiup iluani isumaginninnikkut aaqqissuusseqqinnermut suliassat aqutsinermut tunngasut taamatuttaaq suliassat kommuninit ikorfartorneqartut aamma isumagisarai