AtuartigukAkiliuteqarlutik takornariartitsisartunut nannunik takusassarsiortitsisartunut – nannunniarnertaqanngitsunut akuersissummik pigisaqarnissamut piumasaqaat
Nassiussisuuvoq: Nunanut Allanut, Inuussutissarsiornermut Niuernermullu Naalakkersuisoqarfik
Naalakkersuisut ulloq 6. marts 2023 akuersissutigaat nannunik piniarneq illersuinerlu pillugit nalunaarut nutaaq, periarfissaqartitsilerpoq takornariartitsilluni nannunik takusassarsiortitsisarnermik neqerooruteqarsinnaalerneq.
Akuersissummik qinnuteqartoqarsinnaavoq Nunanut Allanut, Inuussutissarsiornermut Niuernermullu Naalakkersuisoqarfimmut. Akuersissummik tunineqarsinnaanermut ilaatigut piumasaqaataavoq qinnuteqartup Nunatsinni najugaqavissuunissaa, - tassa aalajangersimasumik Kalaallit Nunaanni najugaqartuunissaq piumasaqaataavoq akuersissummik tunineqassagaanni.
Erseqqissaassutigineqassaaq akuersissummik pigisaqanngikkaanni inerteqqutaasoq akiliuteqartitsilluni nannunniarnerunngitsumik nannunik takusassarsiortitsisinnaaneq.
”Nuannaarutigaara maanna aamma uagut nunatsinni - Kalaallit Nunaanni – nannunik takusassarsiortitsisarnermik takornarianut neqerooruteqarsinnaalernerput, soorlu tamanna aamma nunani allani nanoqarfiusuni atuutereersoq. Taamaasillunilu maanna takornariartartunut misigisassaasinnaasut amerlaneruleqqipput, tamannalu nunatsinni najugalinnut takornariartitsisartunut iluaqutaasussaavoq, akuersissummik peqarlutik immikkuullarissumik misigisassarsiortitsisinnaalersussanut” – taama oqaaseqarpoq Vivian Motzfeldt.
Skema qinnuteqarfissaq akiliuteqartitsilluni nannunniarnertaqanngitsumik nannunik takusassarsiortitsisarnermut sullissivik.gl -imi nassaassaavoq.
Annertunerusunik paasisaqarumagaanni attavigineqarsinnaavoq Nunanut Allanut, Inuussutissarsiornermut Niuernermullu Naalakkersuisoqarfik uani isiin@nanoq.gl imaluunniit Naalakkersuisup allattaa Naasunnguaq Beck Kristensen e-mail: nabk@nanoq.gl imaluunniit oqarasuaatikkut +299 34 56 82