Nakkutilliinermik Ingerlatsivik Isumaginninnermut, Suliffeqarnermut Nunamullu Namminermut Naalakkersuisoqarfimmi immikoortortaqarfiuvoq, makkua nakkutilliivigisassaralugit

• Kommunit inunnik isumaginninnermi inatsisit malillugit ingerlatsinerat
• Nunatsinni isumaginninnerup iluani ulloq unnuarlu paaqqinniffiit

Nakkutilliinermi Ingerlatsiviup nakkutilliilluni sulinera inatsisit uku aallaavigalugit ingerlavoq

• Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 11, 12. november 2001-meersoq, §§ 1 & 3 (kingusinnerusukkut allanngortinneqartoq)
• Meeqqat tapersorneqarnissaannut Inatsisartut inatsisaat nr. 20, 26. juni 2017-meersoq, §§ 9-11
• Inuit innarluutillit tapersersorneqarnissaannut Inatsisartut inatsisaat nr. 13, 12. juni 2019-imeersoq, §§ 64-68
• Isumaginninnermi suliassaqarfimmi nakkutilliisarneq pillugu Namminersorlutik Oqartussat nalunaarutaat nr. 49, 31. august 2021-imeersoq

Pisortat suliaqarfiini pingaarnertut nakkutilliineq
Nakkutilliinermik Ingerlatsivik oqaloqatigiinneq atorlugu kommuunit isumaginninnermi inatsisit malillugit sullissinerinik pingaarnertut nakkutilliisarpoq. Nakkutilliineq kommunit qitiusumik ingerlatsiveqarfiini, aammalu illoqarfiini nunaqarfiinilu pisarpoq. Nakkutilliineq suliatigut inatsisitigullu suliassaqarfimmi misissuiffigineqartussami innuttaasut pillugit sulianik aalajangersimasunik arlalinnik tigusinikkut misissuinikkullu ingerlanneqartarpoq, tamatumanilu suliat inatsisitigut piumasarineqartut malillugit ingerlatsivigineqarnersut aammalu isumaginninnermi suliassat suliarineqarnerisa pitsaassusiat misissorneqartarlutik. Nakkutilliinerit kommunenut siumoortumik ilimasaarutigeqqaarlugit ingerlanneqarsinnaapput, kisiannili aamma nalunaarutigeqqaarnagit ingerlanneqarsinnaasarlutik.

Nakkutilliinermik ingerlatsivik kommunini ataasiakkaani minnerpaamik ukiumut ataasiarluni pingaarnertut nakkutilliinermik ingerlatsisassaaq, ukiullu kommuninut qinigaaffiup sisamaasut iluanni illoqarfiit tamarmiusut nakkutilliiartorfigisussaallugit.

Nakkutilliisarnernit nalunaarusiat naammassineqareeraangamik Naalakkersuisut nittartagaanni saqqummiunneqarlutik “Saqqummersitat” ataannut ilineqartarput.

Ulloq unnuarlu paaqqinniffinnik nakkutilliineq
Nakkutilliinermik Ingerlatsivik oqaloqatigiinneq atorlugu aamma ulloq unnuarlu meeqqanut paaqqinniffinnut Namminersorlutik Oqartussat aammalu kommunit ingerlassaannut, kiisalu Namminersorlutik Oqartussat inuit innarluutillit ulloq unnuarlu angerlarsimaffittut neqeroorutaannut nakkutilliiartortarpoq. Ulloq unnuarlu meeqqanut paaqqinniffinnut namminersortunit ingerlanneqartunut aamma nakkutilliiartortoqartarpoq. Nakkutilliiartornerit tamatigut paaqqinniffiit ulluinnarni ingerlatsinerannut perorsaanikkullu qanoq periuseqarnerinut sammiveqartarput.

Paaqqinniffinnut nakkutilliiartornerit siumoortumik ilimasaarutigeqqaarlugit ingerlanneqarsinnaasarput, kisiannili aamma siumoortumik nalunaarutigeqqaarnagu pisinnaasarlutik.
Paaqqinniffinnik nakkutilliinermi nalinginnaasumik najoqqutassiat aammalu najugaqartunut ataasiakkaanut iliuusissatut/katsorsarneqarnissamut pilersaarutit aalajangersimasut misissorneqartarput, misissuinermilu
Isumaginninnermi suliassaqarfimmi nakkutilliisarneq pillugu Namminersorlutik Oqartussat nalunaarutaanni piumasaqaatit/sammisassat arfineq-pingasut aalajangersaavigineqareersut nalilersuiffigineqartarlutik.

Nakkutilliisarnernit nalunaarusiat naammassineqareeraangamik Naalakkersuisut nittartagaanni saqqummiunneqarlutik “Saqqummersitat” ataannut ilineqartarput.

Attavissat
Nakkutilliinermik Ingerlatsivik oqarasuaat +299 34 50 00 atorlugu sianerfigineqarsinnaavoq ulluni ataasinngornermiit tallimanngorneq ilanngullugu nal. 09.00-ip aammalu 16.00-ip akornanni. Taassuma saniatigut qarasaasiakkut allaffigineqarsinnaavoq ugguuna soctilsyn@nanoq.gl

Qarasaasiakkut allalluni saaffiginninnerit (saaffiginneqqaarnerit) tamarmik tassunga nassiunneqartassapput, tassanngaanniit suliamik sullissisumut ingerlateqqinneqartarmata, tassanngaanniillu akissuteqarfigineqartussaallutik.