AtuartigukInuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Inatsisinik atuutsitsinermut immikkoortortaq
Naalakkersuisoqarfimmi inatsisinik atuutsitsinermut immikkoortortap qanimut danskit oqartussaasut suleqatigai, pinerluttulerinermi inatsisitigut aamma pinerluttaalisitsinermut inatsisitigut inatsisiliornermut atasuni. Suleqatigiinnermi tamatumani siunertaavoq inatsisilerinermik suliassaqarfiup Naalakkersuisut pingaartitaannik takorluugaannillu tunngaveqartumik tulleriiaarinikkut aaqqissuussiviginissaa.
Innuttaasut inatsisigut isumannaatsumik inissisimanissaat nunani naqisimaneqanngitsumik naalakkersugaasuni qitiusarpoq.
Tamatumani pineqarpoq toqqissisimasutut misigisimanissaq, aqqusinikkut ingerlanermi, naatsorsuutigisinnaallugulu politiit akulerukkumaartut inatsisit unioqqutinneqassappata. Eqqartuussiviit arlaannaannulluunniit atasuussanngillat, inatsisillu atuuttut naapertorlugit pineqaatissiisassallutik. Pinerluffigineqarsimasut pingaartillugit isiginiarneqassapput. Kisiannili ilutigisaanik unnerluutigineqartut isumagineqarneranni inuit pisinnaatitaaffii pillugit isumaqatigiissutit Kalaallit Nunaata akuersissutigisimasai malillugit ingerlatsisoqassalluni.
Inuk eqqartuunneqarluni pineqaatissinneqaraangat innuttaasut naatsorsuutigisinnaassavaat eqqartuussinerup pinerluttunik isumaginnittoqarfimmit piviusunngortinneqarnissaa. Pinerluttulerinermik Isumaginnittoqarfiullu aamma suliassaraa ikiorsiisassalluni pinerluuteqarsimasut pineqaatissiinerup kingornagut iperagaanerminni inuunermut pinerlunniarfiunngitsumik uteqqissinnaanissaat. Tamatumani suliat qularnaarumallugit inatsisilerinermik immikkoortortap politiit, eqqartuussiviit pinerluttunillu isumaginnittoqarfik qanimut suleqatigai - kisiannili aamma suleqatissat naleqquttut allat inatsisilerinermut attuumassuteqartut, tamatumani aamma isumaginnittoqarfik.
Inatsisinik atuutsitsinermut suliassaqarfimmi ilaavoq Kalaallit Nunaanni eqqartuussiveqarnermut siunnersuisoqatigiit. Siunnersuisoqatigiit pilersinneqarsimapput Eqqartuussiveqarneq pillugu kommissionip isumaliutissiissuteqareerneratigut, suleqataaffigissallugulu ataqatigiissaarineq Namminersorlutik Oqartussat aamma danskit oqartussaasuisa akornanni suleqatigiinneq, pinerluttulerinermut eqqartuussiveqarnermullu pissutsiniittuni suliassat. Namminersorlutik Oqartussat saniatigut eqqartuussiviit, Pinerluttunik Isumaginnittoqarfik, Politiit, kommunit, danskit inatsisinik atuutsitsinermut ministeriaqarfiat, danskit Domstolsstyrelsiat aamma universitet-imi ilisimatooq allallu siunnersuisoqatigiinni sinniisoqarput.
-
Suliassaqarfiit
Inatsisilerinermik suliassaqarfimmi pingaarnertut suliassat suliassaqarfiillu tulliuttut ilaapput:
Pinerluuteqarnermut inatsisit, matumani aamma eqqartuussivinnik, politiinik, pinerluuteqarsimasunik isumaginnittoqarfimmik aamma danskit Justitsministeriaqarfiannik suleqateqarneq.
Kalaallit Nunaanni eqqartuussiveqarnermut siunnersuisoqatigiit.
Inatsisilerinermik suliassaqarfik angerlaanneqarnikuunngilaq. Tamanna tunngaviusumik isumaqarpoq akisussaaffik danskit oqartussaasuiniittoq, matumani aamma danskit Justitsministeriaqarfianni. Naalakkersuisoqarfiup danskit oqartussaasui suleqatigai piviusunngortinniarlugit Naalakkersuisut aamma Inatsisartut inatsisinik atortitsinermi naalakkersuinikkut kissaataat.
Inatsisinik atortitsinermut atatillugu inatsisit tamanut takusassiarineqartarput danskisut, elektroniskiusumik taaguutip matuma iluani ’Grønland’, uani: www.lovtidende.dk.
Inatsisit kalaallisut suliarineqarnerinik nassaassaqarpoq elektroniskiusunik Naalagaaffiup Kalaallit Nunaanni sinniisoqarfiata Rigsombudsmand-eqarfiup quppersagaani, inatsisit ataanni.