AtuartigukUkiaru Sarfaq Ittuk illoqarfinnut amerlanerusunut angalassaaq
Naalakkersuisup Erik Jensenip Arctic Umiaq Linemi pisortaaneq Jens-Jakob Sandgreen ataatsimeeqatiginikuuaa, tassanilu 2023-p ukiaani angallassinissamik pilersaarut nutaaq saqqummiunneqarluni.
Nassiussisuuvoq: Ineqarnermut Attaveqaasersuutinuullu Naalakkersuisoqarfik
Ukioq manna angallassinissamik pilersaaruteqarnermi bilitsissanik Arctic Umiaq Linep tuniniaanissani qanittumi ammaanniaraa, ataatsimiinnermi Jens-Jakob Sandgreenip paasissutissiissutigaa.
Sinerissami nalinginnaasumik angallasseriaatsimi Arctic Umiaq Line upernaaru, angalasoqarnerpaasarfianilu sapaatip akunnerani ullut tamakkerlugit angallassisassamaarpoq. Ulluni arfineq-marlunni angallassigasuarnermik ilallugu septembarip 15-ianiit novembarip 17-iata tungaanut nunap iluani angallassisoqarnissaa, sapaatip akunnerini pingasuni angallassinissamik ataatsimut pilersaarummik taallugu angallassisoqarnissaa, ukioq manna nutaartatut periarfissaalissaaq.
Ulluni 14-ini nunap iluani angallassinissamik pilersaarummi tulliuttut ilanngunneqarput: Upernavik, Uummannaq, Qasigiannguit, Kangaatsiaq, Itilleq/Igaliku, Narsarsuaq kiisalu Nanortalik.
Nunat tamalaat akornanni timmisartuussisarneq malillugu Narsarsuaq tikinneqartassasoq aamma pilersaarutigineqarpoq.
Ulluni 14-ini nunami angallassilluni, ullunilu arfineq-marluusuni angallassigasuarnissamik pilersaarutaalluni ulluni 21-ni angallassinissamik pilersaarut nutaaq, 2024-mi immaqa ingerlateqqinneqarsinnaassalluni siullermik misiliutaassasoq eqqarsaatigineqarpoq.
Tassunga tunngatillugu Naalakkersuisoq Erik Jensen ima oqaaseqarpoq: ”Imaatigut angallassinermi killissaasut isiginiarneqaratik periarfissaasut isiginiarneqassasut ukiut arlallit ingerlanerini annertuumik kissaataanikuuvoq. Nanortallip, Kangaatsiap, Qasigiannguit, Qeqertarsuup, Uummannap Upernaviullu tikinneqartarnissaannut periarfissat misissorneqassasut, innuttaasut politikerillu kissaatiginikuuaat. Taamaattumik 2023-p ukiaani imaatigut angallassinissamik pilersaarummik misiliilluni allannguiniarneq, siunissami imaatigut angallassinissamut siunnerfileeqataasinnaammat assut nuannaarutigaara. Taamaattumik 2023-mi ukiakkut angallassinissamik pilersaarutip allannguuteqarnera ukiunut tulliuttunut pilersaarusiornissamut sunniuteqartussaammat, allannguut angalasussanit tigulluarneqassasoq kaammattuutigaara.”
Arctic Umiaq Linemi pisortaaneq Jens-Jakob Sandgreen ima oqaaseqarpoq: ”Ulluni 14-ini nunap iluani angallassinissatsinni illoqarfinni sivisunerusumik talinngasassaagut, assersuutigalugu Aasianni akunnerni sisamani talinngariarluta, Qeqertarsuarmi aamma akunnerni sisamani talinngariarluta, unnuami Qasigianngualiariarluta akunnerni marlunni talinngariarluta akunnerni arfineq-pingasuni Ilulissani talinngassaagut, tassanngaanniillu unnuami Uummannamut Upernavimmullu angallassissalluta. Taamatut angallasseriaaseqarnissatsinni neriuppugut takornarialerinerup ineriartortinneqarnissaanut nutaamik tunngavissaliorsinnaassalluta.”
Pilersaarut tamakkiisoq akigititallu annerusumik paasisaqarfigerusukkaanni, Arctic Umiaq Linep nittartagaa innersuussutigineqarpoq.
Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl