AtuartigukJuullimi pilluaqqussut eqqumiitsuliortumit inuusuttumit titartarneqartoq
Nassiussisuuvoq: Naalakkersuisut Siulittaasuata Naalakkersuisoqarfia
Ukiormanna Naalakkersuisunit juullimut pilluaqqussut 32-nik ukiulimmit Nicoliinnguaq Cortzenimit, ulluinnarni Nicomik taaneqartartumit suliarineqarpoq.
Naalakkersuisut Siulittaasuat Múte Bourup Egede: ”Nicoliinnguaq Cortzen inuusuttuuvoq eqqumiitsuliortutut nutaaliornermini suliaminut aallussilluartartoq. Ukiormanna Naalakkersuisut Juullimut pilluaqqussutaanik suliaqarnissaminut akuersisimammat nuannaarutigeqaara.”
Nicoliinnguaq Cortzen Eqqumiitsuliornermik Ilinniarfimmi eqqumiitsuliortutut ilinniarsimavoq.
Inunnguuserisaminik autistimut ilisarnaateqarnerata soqutigisaminik aallusserusussuseqartilersarpaa tassungalu tunngasunik ilinniartikkusulertarlugu. Inuttaata Japanimiut titartaariaasiinik anime-mik aamma manga-mik soqutigisaqarnerata eqqumiitsuliaani takussutissaqartippaa. Taakkua saniatigut nammineerluni Japanimiusut ilinniarsimavoq Japanimilu angalasimalluni.
”Massakkut Majoriamiittarpunga naammassigukkulu Japanimukarlunga titartakkanik titartaasartutut ilinniarusullunga. Kalaallit Nunaannut uteqqillunga titartaasutut sulilernissara takorluugaraara”, Nicoliinnguaq Cortzen taamak oqarpoq.
Juullimut pilluaqqussut pillugu ima oqaaseqarpoq: ”Qasigiannguit titartarsimavara tassanilu illoqarfiup orpiata inissisimaffigisartagaanut isikkivik takuneqarsinnaavoq. Illut takuneqarsinnaapput. Inuunerma annerpaartaani Ilulissani najugaqarsimagaluarlunga sumi peroriartorsimanerlunga titartakkatigut takussutissiissutiginiarlugu titartarsimavara. Titartakkami illu kajortoq ”Sukkulaaq” takuneqarsinnaavoq. Qasigiannguit pillugit titartaanerit tamaasa ”Sukkulaannguaq” titartakkani ilaajuaannarpoq”, Nicoliinnguaq Cortzen oqarpoq.