Tuluit tusagassiorfiat BBC nalunaarpoq Kalaallit Nunaanni arnat akuersiteqqaarnagit naartunaveersaatilerneqartarsimasut

Tuluit tusagassiorfiat BBC nittartakkamini allappoq kalaallit arnat akuersiteqqaarnagit spiralilersorneqartarsimasut allatulluunniit naartunaveersaaserneqartarsimasut.

Peqqinnissaqarfimmi katsorsaanerit tamarmik katsorsarneqartussanit tamanit ilisimasat aallaavigalugit akuerineqaqqaartartussaapput tassa imaappoq katsorsaatigineqartussaq katsorneqartussamit akuerineqaqqaartussaavoq. Tamatuma saniatigut katsorsartittussat katsorsartinnissaq aallartitsinnagu katsorsaatigineqartussap iluaqutissartai ajoqutigisinnaasaalu tassunga ilanngullugit kingunerluutigisinnaasat pillugit erseqqissumik ilisimatinneqartartussaapput.

Suliat pineqartut Nunatta Nakorsaaneqarfianit ilisimaneqanngillat. Taamaakkaluartoq suliaq ilungersunartorujussuartut isigaarput. Akuersititseqqaarnani katsorsaasoqartarsimappat suliassaq ilungersunartuussaaq malitseqartinneqartariaqartoq.

Arnat akuerseqqaaratik ukiuni kingullerni spiralilersorneqartarsimasut allatulluunniit naartunaveersaaserneqartarsimasut naammagittaalliuteqarnissaat kaammattuutigineqarpoq suliassat misissorneqarsinnaaniassammata. Sullissivik aqqutigalugu nalinginnaasumik naammagittaalliuteqarnissaq pissusissamisoornerpaassaaq (https://www.sullissivik.gl/ ). Taamaattorli Nunatta Nakorsaaneqarfianut toqqaannartumik saaffiginnittoqarsinnaavoq.

Naak suliamut pisoqalisoornissamut piffissaliussaq qaangiutereersimagaluartoq suliassat misissussavagut.

Sukumiisumik paasisaqarusukkuit Nunatsinni Nakorsaaneq Henrik L. Hansen oqarasuaatikkut: +299 55 35 61 attavigiuk imaluunniit e-mailikkut henh@nanoq.gl