Angerlarsimaffeqanngitsuuneq pillugu nuna tamakkerlugu nassuiaat – angerlarsimaffeqanngitsuuneq pillugu suliassaqarfimmi suliniutit sullitanik aamma pisinnaatitaanernik aallaaveqartut

Angerlarsimaffeqanngitsuuneq pillugu nassuiaat siunissami inersimasut atugarliortut angerlarsimaffeqanngitsullu pillugit suliniuteqarnissamut aallaaviussaaq. Politikerit, suliamik paasisimasallit innuttaasullu akornanni angerlarsimaffeqanngitsuuneq pillugu nassuiaat ataatsimut paasinninnermik pilersitsissaaq. Nassuiaat Ilisimatusarfik suleqatigalugu suliarineqarpoq.

Nassuiaatip angerlarsimaffeqanngitsunut tunngatillugu pissutsinik pitsanngorsaaniarluni suliniuteqarnissaq periarfississavaa. Angerlarsimaffeqanngitsut amerlinissaat akiorniarlugu pitsaaliuinermut suliniutaasinnaapput kiisalu nassuiaat malillugu angerlarsimaffeqanngitsutut inissisimasutut suussusersineqarsinnaasut innuttaasunut annertunerusumik ikiuisinnaaneq.

Angerlarsimaffeerussinnaaneq aamma angerlarsimaffeqanngitsuuneq pillugu nassuiaat angerlarsimaffeqanngitsuuneq pillugu suliassaqarfimmi pitsanngorsaanissamut sulinermi pingaaruteqarpoq. Nassuiaat angerlarsimaffeqanngitsuuneq sisamanngorlugu agguarpaa, ukununnga: ersittumik angerlarsimaffeqanngitsuuneq, ersinngitsumik/takussaanngitsumik angerlarsimaffeqanngitsuuneq, angerlarsimaffeerunnissamut aarlerinartumiinneq aamma angerlarsimaffeerussinnaaneq. Nassuiaat killiliivoq, innuttaasunut ersittumik angerlarsimaffeqanngitsunut unnuiffissamik amigaateqartunut kiisalu innuttaasunut angerlarsimaffeerunnissamut aarlerinartumiittunut, kisianni angerlarsimaffeqanngitsutut isigineqarsinnaanngitsunut immikkoortillugit.

Ersittumik angerlarsimaffeqanngitsuuneq tassaavoq soorlu inuit silami, majuartarfinni toqqiniluunniit sinittartut. Ersinngitsumik angerlarsimaffeqanngitsuuneq tassaavoq soorlu inuit unnuisarfinni, utaqqiisaagallartumik inissiani imaluunniit ikinngutini, ilaquttani nalunngisaniluunniit unnuisartut. Aamma inuit angerlarsimaffeerussinnaasut ilaatinneqarput. Innuttaasut inuunerminni piffissap ilaani angerlarsimaffeeruttartunut ilisarnaataavoq maannakkorpiaq nammineq isumannaatsumik unnuisarfimmik toqqaanissaminnut nukissaqanngikkallartut, pisinnaatitaaffimmisullu killeqanngitsumik inissisimaffimmiissinnaanatik.

”Angerlarsimaffeqanngitsuuneq pillugu nassuiaat inuiaqatigiittut isiginneriaasitsinnut sinaakkusiivoq. Nassuiaat atorlugu innuttaasut eqimattat sinaakkuserneqarput tamatumalu kingorna angerlarsimaffeerussinnaasut aamma angerlarsimaffeqanngitsut amerlassusaat ikilisarniarlugit suliniutit sullitanik aamma pisinnaatitaanernik aallaaveqartut suliarineqarsinnaalerput” Isumaginninnermut, Suliffeqarnermut Nunamullu Namminermut Naalakkersuisoq, Jess Svane oqaaseqarpoq.

Nassuiaatip aamma ukkataritinniarpaa inuit atugarliortut aamma angerlarsimaffeqangitsuuneq inuunermi assigiinngitsorpassuartigut inissisimanermi takussaasarmat, aamma angerlarsimaffeqanngitsuuneq tassaasoq inuttut inuiaqatigiinnilu ajornartorsiutaammat ataavartoq iliuuseqarfigineqartussarlu. Angerlarsimaffeqanngitsuuneq tassaavoq inuit innuttaasulluunniit piffissap ilaani ajornartoornermik nalaataqartut. Ajornartoornermik nalaataqarneq tassaapput soorlu: inissaasuaneq, aningaasaqarnikkut ajornartorsiutit namminerlu inuunermi ajornartoornerit angerlarsimaffeqanngitsutut inuunermut attuumassuteqakkajuttarlutik.

”Angerlarsimaffeqanngitsuuneq assigiinngitsorpassuarnik imaqarsinnaavoq aamma angerlarsimaffeqanngitsuunerit assigiinngitsorpassuusinnaapput. Naasuiaat inuiaqatigiinni atugarliortuuneq angerlarsimaffeqanngitsuunerlu pillugit paasinninnermut akuersinermullu aammaassissaaq. Nassuiaat atugarliornerit angerlarsimaffeqanngitsuunerillu tamanut saqqumisut ersittullu aqqusinermi takusinnaasagut kisiisa pinnagit allanik peqartoq aamma takutitseqataassaaq. Angerlarsimaffeqanngitsuuneq atugarliortuunerlu suliassaqarfiuvoq Naalakkersuisut assorsuaq pingaartitaat” Isumaginninnermut, Suliffeqarnermut Nunamullu Namminermut Naalakkersuisoq, Jess Svane oqaaseqarpoq.

Nassuiaat suliarineqarpoq Steven Arnfjord suleqatigalugu, Issittumi Atugarissaarneq pillugu Ilisimatusarfimmi pisortaq.

”Assut nuannaarutigaara Ilisimatusarfik suleqatigalugu nassuiaat manna suliarigatsigu. Ilisimatusarnikkut pullaveqarneq pingaaruteqarpoq, taamaalilluta qulakkiissangatsigu, nassuiaatip inuiaqatigiinni piorsarsimassutsikkullu inissisimanerput paarissammagu” Isumaginninnermut, Suliffeqarnermut Nunamullu Namminermut Naalakkersuisoq, Jess Svane oqaaseqarpoq.

Steven Arnfjord oqaaseqarpoq imatut: ”Kalaallit Nunaanni angerlarsimaffeqanngitsuuneq pillugu nassuiaammik amigaateqarsimavugut, taamaasilluta pitsaasumik qilanaarisatsinnillu oqallissinnaanngorpugut angerlarsimaffeqanngitsuunerup eqqumaffigineqarnera annertusillugu. Angerlarsimaffeqanngitsuuneq assigiinngitsorpassuarnik imaqarsinnaavoq aamma inuit angerlarsimaffeerunnerannut pissutaasut amerlasoorpassuupput. Inunnut angerlarsimaffeqanngitsutut inuusunut suliniutit suli amerlanerusut pisariaqartippavut, aamma siunissami inuit taamatut inissisimasut amerlassusaat ikilisarniarlugu inuiaqatigiittut pitsaaliuinermik suliniutit salliutinnissaannut pisariaqartitsivugut”.

Angerlarsimaffeqanngitsuuneq pillugu nassuiaat nuna tamakkerlugu angerlarsimaffeqanngitsuuneq pillugu periusissiamut, Naalakkersuisut 2022-mi saqqummiussassaannut, maannakkut suliarineqartumut pingaaruteqarpoq. Periusissiami siunertarineqarpoq angerlarsimaffeqanngitsuuneq aamma annertuumik atugarliortuuneq pillugit iliuuseqarnermi nutaamik tunaartaliinissaq. Periusissiaq siunissami inersimasunik atugarliortunut angerlarsimaffeqanngitsuunerlu pillugu akiuinermut tunngatillugu sulinermi sinaakkusiissaaq tunaartaliillunilu.

Sukumiinerusumik nassuiaat pillugu takutitassiaaraq alakkaruk

Nassuiaat tamakkiisoq atuaruk.

Erseqqarinnerusumik paasiniaanermi attaveqarfissaq naalakkersuisup allattaa Helene S. Pedersen e-mail: hspd@nanoq.gl oqaruaalluunniit + 299 34 56 11