Naalakkersuisut atuisut ulluinnaannut ikiuupput

Ulluinnaat akisunerulertut tamatta malugivarput. Tamatumunnga pissutaavoq nunarsuarmi nioqqutissat pingaarutillit pissarsiariniarnerisa ajornarsinikuunerat. Pingaartumik Ukrainemi sorsunneq kiisalu coronap nunarsuaq tamakkerlugu tunillaassuunnerata kinguneri ineriartornermut tamatumunnga sunniuteqarput.

Naalakkersuisut maanna pingaarnermik nerisassat akitsortinnaveersaarniarlugit suliniuteqarput.

Naalakkersuisut, Royal Arctic Line-mut suliffeqarfiup assartuinermi akigititaasa appartinnissaat pillugu isumaqatigiissuteqarnissamut Aningaasaqarnermut Akileraartarnermullu Ataatsimiititaliamit akuersissut pivaat. Isumaqatigiissummi, avannamut nassiussanut uuliap akianut tapiliussaq 2022-p sinnerani appartinneqassasoq siunertaavoq. Suliniut nillataartunut qerisunullu containerinut, nerisassanik avataanit eqqussinermi atorneqartunut pingaarnermik sammiveqarpoq.

Akit apparneqartut assartukkat nillertunut 1. september 2022-mit kingumut atuuttumik kiisalu assartukkat allat sinnerinut 1. oktoberimit, ukiup naanissaata tungaanut atuuttussamik eqqunneqassapput. Akit apparnerat kingumut atuuttumik eqqunneqarnerisigut aamma nunaqarfinnut avinngarusimasunullu ukiamut nioqqutissat nassiunneqareersut ilanngunneqassapput.

Aningaasaqarnermut Naligiissitaanermullu Naalakkersuisoq, Naaja H. Nathanielsen, ima oqaaseqarpoq:

”Ikiuutit inuiaqatigiiulluta iluaqutiginerpaasatta ilaannut ersiutaavoq, tassa ikorfartoqatigiinneq. Taamaattumik suliniummut matumunnga, innuttaasorpassuarnut ukiumut annertuumik sunniuteqarsinnaasoq pillugu Aningaasaqarnermut Akileraartarnermullu Ataatsimiititaliap kiisalu partiit tunuliaqutaasut tapersersuinerannut qujaniarlunga periarfissaq una atorusuppara. Nunarsuarmi inissisimaneq ilungersunarpoq, tamannallu qaangerniarutsigu, qaninnerulluta inissisimasariaqarpugut. Naalakkersuisut sinnerlugit nioqqutissanik eqqussuisunut ersarissumik naatsorsuuteqarpunga, akit apparnerat atuisunut toqqaannartumik ulluinnarni nioqqutissat akikillinerisigut iluaqutaatinneqassasoq.”

Royal Arctic Line A/S-p pisortaa Verner Hammeken oqarpoq:

”Nukissiornermut akit qaffasissut pilersitaannik aningaasat naleerukkiartornerata annikillisarnissaanut Naalakkersuisut suliniuteqarnerannut ikiuussinnaanini Royal Arctic Linep tulluusimaarutigaa. Kalaallit Nunaanni atuisartunut iluaqutaaniartussatut isumaqatigiissutigisatsinnut aaqqiissummut aningaasat annertuut atorpavut. Maanna neriuutigaarput, nioqqutissanik eqqussuisartutta taamatut tatiginartumik qulakkiissagaat, aaqqiissut tamanna atuisartunut apuutissagaat.”

Assersuut:
Suliniut tassa imaassaaq, Århusimit Nuummut nillataartunut/qerisunut containeri 40 fodsi nalinginnaasumut assartuinermi aki 80.729 kr.-nit 63.352 kr.-nut appassasoq, tamanna 21,5 procentimik akip apparneranik isumaqarpoq.

Containeri 40 nalinginnaasoq angallavimmi tassani 58.045 kr.-nit 51.928 kr.-nut appassaaq, tamanna 10,5 procentimik akip apparneranik isumaqarpoq.

Akimik appaanerit nunanit allanit Kalaallit Nunaata avannaanut assartuinerit tamanut kiisalu containerit angissutsit tamanut atuuppoq. Royal Arctic Linep akit nutaat piaarnerpaamik saqqummiutissavai. (Saniatigut tusagassiutinut nalunaarummut matumunnga ilanngussaq takuuk).



Attavigiuk:

Naalakkersuisumut allatsi Jeanette Petersen,
Toqq/direkte 265476
jelp@nanoq.gl