AtuartigukNaalakkersuisoqarfimmi pisortamik nutaamik atorfinitsitsineq
Nassiussisuuvoq: Naalakkersuisut Siulittaasuata Naalakkersuisoqarfia
Natuk Lund Olsen Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi nutaatut pisortanngussaaq.
Natuk Olsen 43-nik ukiulik Naalakkersuisoqarfimmi pisortatut nutaatut atorfinitsissallugu Naalakkersuisut aalajangersimapput. Maannakkut Namminersornermut Immikkoortortaqarfimmi pisortatut atorfeqarpoq - atorfik 2017-imili atorfigilersimavaa. Taamatuttaaq Nunalerineq pillugu Siunnersuisoqatigiinni siulittaasuuvoq.
Natuk Lund Olsen inuiaat kulturianni oqaluttuarisaanerannilu bacheloritut Ilisimatusarfimmi ilinniarsimavoq kiisalu antropologimi naalakkersuinikkullu oqaluttuarisaanermi kandidatitut Aarhus Universitetimi ilinniarsimalluni. Tamatuma saniatigut kalaalimerngit pillugit Ph.d-nngornialeruttorpoq. Taamatuttaaq Nunatta Katersugaasiviani Allagaateqarfianilu katersugaasivimmi pisortatut atorfeqarsimavoq.
"Natuk Lund Olsenip suleqatiginissaa qilanaaraara. Pikkorissuullunilu nutaanik eqqarsartaaseqarpoq aamma suliassaqarfimmi annertuumik ilisimasaqarluni kiisalu politikkimut paasisimasaqarluni", Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund oqarpoq.
”Tamatumunnga atatillugu Mette Skarregaard Pedersen naalakkersuisoqarfimmi pisortatut ukiuni kingullerni arfineq-marlunni tunniussaanut annertuunut qutsavigerusuppara. Mette suliassaqarfimmut pikkorissuuvoq, tatiginartoq Naalakkersuisoqarfimmilu pisortatut sulinermini tunniusimalluinnarsimalluni. Tamanik iluatsitsinissaanik ingerlalluarnissaanillu kissaappara", Kalistat Lund oqarpoq.
Natuk Lund Olsenip atorfimmini 1. oktober 2022-mi aallartissaaq.