AtuartigukMúte: Inuusuttut nukittuut takorluuisinnaasut kissaatigaakka
Nassiussisuuvoq: Naalakkersuisut Siulittaasuata Naalakkersuisoqarfia
Inatsisartut ukiaanerani ataatsimiinnerat ullumi tallimanngornermi aallartippoq. Naalakkersuisut siulittaasuat Múte Bourup Egede ataatsimiinneq aallarnerpaa oqalugiarluni oqalugiaamminilu inuusuttut eqqaavai.
”Ukiut tamaasa meeqqat 800-t missigisaat nunatsinni inunngortarput. Nunami kusanaqisumi, eqqissisimanartumi periarfissarpassuaqartumilu inunngortarput. Tunissutillu pitsaanerpaat meeqqanut tunniussinnaasagut tassaapput asanninneq, akisussaaqataaneq nammineersinnaanerlu. Takorluugara tassaavoq meerannguit taakku tamarmik inersimasunngorlutik nunarput nukittorsassagaat alutornarsassagaallu.
Takorluugara tassaavoq meeqqat toqqissisimallutik, akisussaaqataallutik aammalu nunatta ineriartortinneqarneranut peqataallutik peroriartussasut.
Uanga kissaatikka tassaapput inuusuttut nukittuut annertuunik takorluuinissamut sapiissusillit.
Kissaatigaara inuusuttut artornartunik nalaataqaraluaraangamik makeqqinnissamut nukissallit.
Inuusuttut piumassusillit akornatsinneereerput”.
Múte Bourup Egedep inuusuttut sisamat immikkut taavai.
“Claudia Eldevig Eriksen ukiup matuma aallartinnerani aalisariutini naalakkatut naammassisoq. Arnani aaliasariutini naalaganngortuni siullersaavoq ilaminillu angusarissaarnerpaalluni. Inuussutissarsiut ilungersunartoq - aammali pingaaruteqaqisoq - taassuma toqqarsimavaa.
18-inik ukiulik Malik Denbæk Reimer qullukkanik tunisassiorfiliornissaminik takorluukkani piviusunngortinniarlugu sukaruttorpoq. Angutissanilu atortussaminnik piniarsimapput, uangalu qilanaaraara ulloq qullukkanik taakkunannga pisiniarsinnaalerfissara.
Lea Holm nunani allani najugaqarpoq taamaakkaluartoq nunatta inuinik ikiuukkumassusia nunami aallami najugaqarnerata unitsinngilaa. Suliffeqarfiuteqarpoq taaguutilimmik "Seqineq", ilaatigullu aporfinnik qaangiisitsiniarnermik neqerooruteqartarluni.
22-nik ukiulik Rene Salomonsen namminerisaminik illuseqqammerpoq. Meeraanera oqinnerpaajusimanngikkaluartoq Rene-p takorluukkani anguniakkanilu attappai.
Taakku inuusuttut piumassuseqarluartut assersuutissarpassuit ilaannaraat. Takutippaat piumassuseqaraanni sunaluunniit ajornarneq ajortoq” Múte Bourup Egede ilaatigut oqarpoq.