Nunat Avannarliit Killiit Ulluat – inuusuttut sammillugit

”Nunat Avannarliit Killiini inuusuttuuneq” qulequtaritinneqarpoq ukioq manna Nunat Avannarliit Killiit Ulluat malunnartinniarneqarnerani, tallimanngornermi septembarip 23-ani 2022 Katuami.

Ukioq manna programmimi sammineqassaaq inuusuttuuneq, pisussarlu tamanut ammasuussaaq nal. 18.30-miit.

18 30-llu akornani ukioqarpit? Taava Nuummi aamma nunani avannarlerni periarfissatit pillugit tusarnaariarit. Nunat Avannarlermioqatigiit suliaat taavalu illit inuusuttutut periarfissatit pillugit aammattaaq Inuusuttut Peqatigiit (Ungetinget), NAPAp SORLAK-llu peqataaffigisaat, pillugit paasisaqarsinnaavutit.

“Nunat Avannarliit Killiit Ulluat” Nunani Avannarlerni Piorsarsimassutsikkut Attaveqaatip (NAPA-p) pilersaarusiorpaa.

“Nunat Avannarliit Killiit Ulluat”-a tunngavia:
”Savalimmiut, Kalaallit Nunaata Islandillu akornanni kulturikkut suleqatigiinnissamut isumaqatigiissut” 1. november 2017-imeersoq naapertorlugu nunani tamani ”Nunat Avannarliit Killiit Ulluat” ukiut tamaasa ingerlanneqartalissaaq. ”Nunat Avannarliit Killiit Ulluat” tassaavoq ukialeqqaarfik Nunani Avannarlerni Killerni oqaluttuarisaanerup kulturillu malunnartinneqarnissaat pillugit toqqarneqarsimasoq, tassunga ilanngullugu nunat akornanni suleqatigiinnerup annertusarnissaa ataatsimooqatigiittutullu misiginissaq.

”Nunat Avannarliit Killiit Ulluat” Nunani Avannarlerni Killerni Siunnersuisoqatigiit kaammattuutaannit nr. 4/2008-meersumit kingornatigullu aaqqissuunneqarsimasumit aallaaveqarpoq.

Annertunerusumik paasisaqarusunnermi Pia Lynge Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik oqarasuaat +299 34 57 06 attaveqarfigineqarsinnaavoq