Corona akiorniarlugu nualluummullu akiuussutissat pillugit neqeroorutit nutaat

50-iniit ukiullit tamarmik piffissami qanittumi akiuussuserneqaqqinnissaminnut aamma 65-iniit ukiullit nualluummut akiuussuserneqarnissaminnut neqeroorfigineqassapput.

Akiuussuserneqaqqinnissammut piffissanngorpoq. Sapaatip akunnialui qaangiuppata Corona-mut (Covid-19) aamma nualluummut akiuussusersuinissamik suliniut nutaaq aallartissaaq. Ukiunut kingullernut sanilliullugu tamatumuuna kikkut tamarmik Coronamut akiuussuserneqarnissamik neqeroorfigineqassanngillat.

”Naatsorsuutigaarput ukiaru amerlasuut Corona-mik tunillatsissasut, amerlanerpaalli sakkukitsumik napparsimasapput.  Taamaattumik aalajangerpugut akiuussusersuinissamut neqeroorut inunnut perulunnartumik napparsimalersinnaasunut neqeroorutigineqassasoq. Tassa imaappoq 50-ilereersimasut aamma 50-it ataallugit ukiullit immikkut aarlerinartorsiortut. Ukioq manna akiuussutissaq tunniunneqartoq immikkuualuttunik akiuussusersuissaaq. Siusinnerusukkut coronamik akiuussusersuinermi atorneqartumi assinganik illersuutitaqarpoq tamannalu ilutigalugu tunillaassuuttoq nutaaq Omicron-imut siunnerfeqarnerusumik illersuissalluni", taama oqaluttuarpoq Nunatta nakorsaanera Henrik L. Hansen.

Inuit 50-it ataallugit ukiullit taamaattorli immikkut ulorianartorsiortut peqqinnissaqarfimminnit akiuussusertinneqarnissaminnut qaaqquneqassapput. Nunatta nakorsaanerata neqeroorummik akuersinissaq kaammattuutigaa.

Akiuussutissamut nutaamut akiuussusernissamut minnerpaamik marloriaq tunngaviusumik akiuussusersimanissaq piumasaqaataavoq.

”Inuusukkunnaarsimagaanni imaluunniit immikkut aarlerinartutut inissisimagaanni Covid-19 suli perulunnartumik napparsimalersitsisinnaavoq. Sapaatit akunneri kingulliit ingerlaneranni nunarsuarmi ullormut agguaqatigiissillugu coronamik peqquteqartumik toqquteqartut 2415-iusimapput, qularutigineqassanngilarlu akiuussutissalernikkut toqusut amerlanerpaartaat pinngitsoortinneqarsinnaasimagaluarmata, taamaattumillu inunnut pineqartunut siunnersuutigerusuppara neqeroorut akuerissagaat, taama oqarpoq Nunatta nakorsaanera Henrik L. Hansen.

Covid-19-imut akiuussutissaq taamaallaat killilimmik tuniluunnaveersaartitsisinnaavoq. Omicron tuniluutsillugu tuniluunneq unitsissinnaanngilarput. Tunillaatiavallaarpoq. Taamaattumik ukiaq manna ajoqutit minnerpaaffissaminiitinniarlugit 50-it sinnerlugit ukiullit akiuussusersuinissamut ukkatarineqarnissaat suliniutigineqarpoq.

Aamma oktoberip aallaqqaataaniit 65-iniit qummut ukiullit nualluummut akiuussusersuinissamut neqeroorfigineqassapput. Ukiut marluk killilersuereernerup aamma killilimmik tunillaassuereernerup kingorna ukioq manna nualluummik tunillaassuisoqarnissaa naatsorsuutigineqartariaqarpoq. Nunarsuup kujasissortaani ukiuunerani annertuumik tunillaasuuttoqaqqammerpoq tamatumanilu naatsorsuutigineqarpoq nunarsuup avasissortaani ukialertumi aamma taamaattoqarnissaa.

”Utoqqaat pingaartumik perulunnartumik napparsimalersinnaapput taamaattumillu akiuussuserneqarnissaat innersuunneqarpoq” taama oqarpoq Henrik L. Hansen. Akiuussutissaq tunniunneqarsinnaavoq coronamut akiuussusertinnermi.

Ukiuni kingullerni coronamik tunillatsittut amerlassusaat pissutigalugu katersuunnernut, kiinnamut assiaqutinik piumasaqaateqarnikkut aamma angerlarsimalluni sulisarnissamik piumasaqaateqarnikkut killilersuisoqarnikuuvoq, kisianni ukiumut taamatut killilersuisoqarnissaa ernumassutigineqartariaqanngilaq.

”Naatsorsuutiginngilara killilersuisoqaqqikkumaartoq. Tunillaassuuttut nutaat tuniluutiasuararsuupput taamaattumillu tunillaassuunneq pinngitsoortinneqarsinnaanngilaq, aamma 50-it sinnerlugit ukiullit akiuussusertissimappata napparsimanerat sakkukittuaraassaaq, peqqinnissaqarfimmullu artukkiinissaa ernumassutaasariaqarnani”, taama oqarpoq Henrik L. Hansen.

Akiuussusersuinissamut neqeroorutit oktoberip aallaqqaataata missaani aallartisarneqassapput. Nittartagaq corona.nun.gl atuutilersinneqaqqissaaq najukkamilu akiuussusersuinissamut piffissaq sumiiffillu paasissutissiissutigineqassallutik. Nunaqarfiit ilaat nunaqarfinnut tikeraarnermut atatillugu akiuussusertinnissamut neqeroorfigineqartassapput.