Nunanut Allanut, Inuussutissarsiornermut Niuernermullu Naalakkersuisup Vivian Motzfeldt-ip nunatsinni angalaarnissaa

Nunanut Allanut, Inuussutissarsiornermut Niuernermullu Naalakkersuisup Vivian Motzfeldt-ip  nunatsinni angalaarnissani 19. – 22. august 2022 aallarnerlugu nunatta kujataa angallavigissavaa.  

Nunatsinni kaajallaalluni angalanerup siunertaraa takornariartitsinermik inuussutissarsiutilinnik naapitsisarnissaq, Nunatsinni Takornariartitsinermut Periusissiap inaarsarneqarneranut atatillugu, kiisalu inuussutissarsiortut isummersuutaannik tusarniaaneq takornariartitsinermut inatsimmik nutaamik ilusilersuinermut atatillugu. 

”Maanna takusinnaareerparput amerlasuut nunatsinnut tikeraartarnerat, taamaattumillu piffissaalluarpoq Nunatsinni Takornariartitsinermut Periusissiap piareernissaanut, taamaasilluta piareersarluarumalluta ukiuni tulliuttuni tikeraat takornariartut suli amerlanerulernissaannut. Tamatumalu saniatigut uannut pingaaruteqarpoq takornariartitsineq pillugu inatsisissamik suliaqarnerput, aqqutissiuussisussamik periarfissanik qularnaarisinnaanissatsinnut nunatsinni najugaqartut suli annerusumik matumani ingerlatsinernik piginnittuunissaannut. Nunatsinni kaajallaallunga angalassaanga takornariartitsinermik inuussutissarsiortut oqariartuutaat tusarniaavigisinnaajumallugit, sulianik ingerlatseqqinnitsinni pitsaanerpaanik tunngavissaqarsinnaajumalluta”, taama oqarpoq Nunanut Allanut, Inuussutissarsiornermut Niunernermullu Naalakkersuisoq Vivian Motzfeldt.

Aggustip 21-anni Qaqortumi ulloq naallugu takornariartitsisarneq pillugu workshop-imik ingerlatsisoqassaaq, inuit 30-init amerlanerusut Nunatta Kujataaniit sumiiffinnit amerlasuuneersut peqataaffigisaannik, siunissami takornariartitsinermik ineriartortitsinitsinni anguniakkat oqallisigiumallugit iliuusissanillu katersiumalluta.

Nunanut Allanut, Inuussutissarsiornermut Niuernermullu Naalakkersuisoq nunatsinni angalaassaaq aasap sinnera ukialeqqaarneranilu.

Annertunerusunik paasisaqarumagaanni Nunanut allanut, Inuussutissarsiornermut Niuernermullu Naalakkersuisoqarfik attavigineqarsinnaavoq ugguuna; isiin@nanoq.gl imaluunniit Naalakkersuisup allattaatsigut, Arnaruluk Lundblad email: alun@nanoq.gl imaluunniit oqarasuaatikkut +299 34 56 82