AtuartigukKalaallit Nunaanni biilinik misissuisarneq oqaluuserineqartoq
Nassiussisuuvoq: Ineqarnermut Attaveqaasersuutinuullu Naalakkersuisoqarfik
Kalaallit Nunaanni biilit misissorneqarsimanngitsut ukkatarineqassasut, Naalakkersuisoq Erik Jensen kiisalu transportministeri Trine Bramsen isumaqatigiipput.
Danmarkimi biilit naleqquttumik akuttussusilerlugit misissorneqartartut, Kalaallit Nunaanni misissuinissamut malittarisassaqanngilaq. Sisamanngormat transportministerip Trine Bramsenip kiisalu Naalakkersuisoq Erik Jensenip ataatsimeeqatigeereernerisigut, Kalaallit Nunaanni biilinik misissuisoqartalissasoq isumaqatigiissutigineqarpoq.
Qaammatip uumap ingerlanerani Kalaallit Nunaanni Danmarkimilu atorfilittat, angallannermi isumannaallisaaneq eqqartorniarlugu naapissapput. Kalaallit Nunaanni biilinik misissuisalernissaq, misissueriaaserlu suna naleqqunnerussanersoq naapinnermi eqqartorneqassaaq.
18-it inorlugit ukiulinnut tunngatillugu ATV-nik qamuteralannillu ingerlatsisinnaanermut inatsit Naalakkersuisut aamma eqqartorpaat, soorluttaaq silaannakkut angallattunik nakkutilliivissap Nuup avataaniisinneqarnissaanut periarfissanik ujartuisoqarnissaanik kissaatigineqartoq eqqartoraat.
Naalakkersuisut aalajangerput, angallannermut tunngatillugu Danmarkimit Kalaallit Nunaanniillu naalakkersuisunit inuttalerlugu suleqatigiissitamik pilersitsisoqassasoq, siuariartortitsinissarlu qulakkeerniarlugu killiffissiuilluni ukiumoortumik ataatsimiittarnissaq isumaqatigiissutigineqarluni. Angallannermi malittarisassat pillugit qaninnerusumik suleqatigiinnissaq, ataqatigiissaarinissarlu tamassuma qulakkiissavaa. Tulliani Kalaallit Nunaanni naapissapput.
Ineqarnermut Attaveqaasersuutinullu Naalakkersuisoq Erik Jensen:
”Kalaallit Nunaanni biilit kingullermik 1999-imi misissorneqarput. Tamanna eqqartorparput, angallannermullu tunngatillugu siunissami qaninnerusumi suliniuteqartoqarnissaa naammagisimaartorujussuuara.”
Transportministeri Trine Bramsen:
”Kinguneqartussamik suleqatigiinnitsinnut Erik Jensen qutsavigerusuppara. Kalaallit Nunaannit suleqatima kissaataanut aaqqiissutissarsiornissarput uannut pingaaruteqarpoq.”
Nordatlantisk Repræsentationip Københavnimi ataatsimiinnerani, Kalaallit Nunaanni politiit aamma sinniisoqarput, ataatsimiinnermilu pitsaasunik siunnersuuteqarlutik.