AtuartigukSisimiuni Peqqinnissaqarfik Qeqqani qitiusumik napparsimmaviup allanngortiterlugulu allilernissaa aallartinneqassaaq
Nassiussisuuvoq:
Inatsisartut Aningaasaqarnermut akileraartarnermullu Ataatsimiititaliaata 2022-imi juunip ulluisa 29-ianni Peqqinnissaqarfik Qeqqani qitiusumik napparsimmaviup allanngortiterlugulu allilernissaanut, Sisimiuni BJ Entreprisimit ingerlanneqartussamut, katillugit 114 mio. koruuninik atugassiinissamut Naalakkersuisut innersuussutaat akuersissutigaat. Qaammat una sanaartortoqaleriissaaq sanaartornerullu 2024-ip qiteqqunnerani naammassinissaa naatsorsuutigineqarpoq.
Sisimiuni Peqqinnissaqarfik Qeqqani qitiusumik napparsimmavik ullutsinnut naleqqukkunnaarpoq nutartertariaqalerlunilu. Allanngortiteralunilu allilerinikkut pissutsit ullutsinni eqqiluisaarnissamut piumasaqaatinut naapertuuttunngorlugit pitsaanerulersinneqassapput.
Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen ima oqaaseqaateqarpoq:
”Sisimiuni Peqqinnissaqarfik Qeqqani qitiusumik napparsimmavik piffissami sivisuumi nutartigassaasimavoq. Ullumikkut pissutsit napparsimasunut naleqqukkunnaarsimapput sullivimmilu avatangiisit pitsaassusaannut tunngatillugu unammilligassiillutik. Napparsimmaviup allanngortiterlugulu allilerneragut, napparsimasunut sulisunullu avatangiisinik nutaaliaasunik pilersitsissaagut. Sisimiuni innuttaasut qitiusumillu immikkoortumi innuttaasut allat Peqqinnissaqarfimmik naapitsinerup toqqissinartutut misiginissaa, ataatsimiititaliap akuersineragut qulakkeersinnaanngugarput pisariaqartippaat”.
Ineqarnermut Attaveqaqatigiinnermullu Naalakkersuisoq Erik Jensen ima oqaaseqaateqarpoq:
” Sisimiuni Peqqinnissaqarfik Qeqqani qitiusumik napparsimmavimmik allanngortiteralunilu allilerinissamik piviusunngortitsineq suliniutissatut salliunneqarpoq. Napparsimmavimmi pissutsit ullutsinni peqqissaanermut sullivimmilu atugassarititaasunut tunngatillugu piumasaqaatinut naapertuukkunnaarsimapput. Taamaammat Naalakkersuisoqarfiit akimorlugit suleqatigiilluarnikkut BJ Entreprise-millu suleqateqarluarnikkut suliniutip naammassisussanngornera maanna nuannaarutigaara.”
Napparsimmavik nutaanik nutaaliaasununik- ilaatigut pilattaaveqalissaaq, ernisarfeqalissaaq, piartortunut immikkut aaqqisuussanik ineqalissaaq kigutileriveqalerlunilu.
Qitiusumik napparsimmavimmi peqqissaasutut pisortaasoq Nukánguak´ Heilmann ima oqarpoq: Immikkoortortap uninngaviusartup nutarterneqarnissaa taamaalillunilu napparsimasunut atugassarititaasut malunnaatilimmik pitsannguuteqarnissaat nuannaarutigaara.
Annertunerusumik paasisaqarusunnermi saaffigineqarsinnaavoq Naalakkersuisumut allatsi, Frederik Jakobsen Kristiansen, Toqq.: +299 34 56 85, mail: frek@nanoq.gl