AtuartigukInuunerissaavik Steno Kalaallit Nunaat sanaartorlugu aallartinneqalerpoq
Nassiussisuuvoq: Peqqissutsimut Naalakkersuisoqarfik
Naalakkersuisut aningaasaateqarfiullu Novo Nordisk Fondip suleqatigiinnerisa kingunerisaanik, Inuunerissaavik Steno Kalaallit Nunaat maanna sanaartorlugu aallartinneqalerpoq. Qitiusumik sullissivimmik sanaartornissamut aningaasaliisuuvoq aningaasaateqarfik Novo Nordisk Fonden. Sivisujaamik isumaqatigiinniareernerup kingorna nunatsinni sanaartugassanik suliaqartartoq Permagreen isumaqatigiissusiorfigineqarluni sanaartortussanngorpoq. Illussamik 2500 m2-isut annertutigisumik sanaartornissamut siunnersuusiortuupput illussanik titartaasartut Friis & Moltke, Rambøll aamma Permagreen.
Qitiusumik sullissivik Nuummi Dronning Ingridip Napparsimmavissuanut ungasinngitsumi qatserisarfitoqqap toqqavikuani sanaartorneqassaaq. Tassunga inissinneqarneragut, sullissiviup Napparsimmavissuullu akornanni qanimut suleqatigiinnissaq, atuisunut iluaqutaasussaq, qulakkeerneqarpoq. Inuunerissaavik Steno Kalaallit Nunaat nunatsinni Peqqinnissaqarfimmut ilaasoq, qitiusumik sullissivittut tassaassaq nunarput tamakkerlugu diabetesimik-, pualluummiik anigugassaanngitsumik (KOL) nappaatilinnut, qaffasissumik taqqanut naqitsinilinnut tamanut iluaqutaasussamik, qitiusumik nakorsartiffiullunilu paasisimasaqarfiussaaq.
Meeqqanut, Inuusuttunut, Ilaqutariinnut Peqqissutsimullu Naalakkersuisoq Mimi Karlsen ima oqaaseqaateqarpoq:
” Diabetes type 2- mik nappaateqartut, nappaatillu allat inooriaatsimut attuumassuteqartut ukiuni kingulliuinerusuni amerliartornerat, inuiaqatigiinni misigineqarpoq, taamaammat Inuunerissaavik Steno Kalaallit Nunaannik nutaamik sanaartornikkut suliniutigineqarnera innuttaasuni inuunerup naleqassusaata pitsannguuteqartinnissaat nuannaarutigaara.”
Ineqarnermut Attaveqaqatigiinnermullu Naalakkersuisoq Erik Jensen ima oqaaseqaateqarpoq:
” Isumaqatigiissuteqarnikkut Inuunerissaavik Steno Kalaallit Nunaannik innuttaasut pisariaqartitaannik pilersueqataasumik pilersitsinissaq qulakkeerneqarpoq. Permagreenimik suleqateqarluarnikkut sanaartornissamut sapinngisamik pitsaanerpaamik isumaqatigiissuteqarsinnaaneq iluatsippoq, isumaqatigiissut uanga nammineq naammagisimaarluinnarpara”.
Qitiusumik sullissivimmik sanaartorneq 2022-imi aasakkut aallartinneqassaaq 2024-imilu naammassinissaa naatsorsuutigineqarluni.
Attavissaq: Pisortaq Tina Amondsen, Kalaallit Nunaanni Peqqinnissaqarfik: tiam@peqqik.gl