AtuartigukSisimiut aamma Kangerluarsuk Tulliup akornanni aqqusinermut ASN akuerineqarpoq
Nassiussisuuvoq: Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik
Naalakkersuisut Sisimiuniit Kangerluarsuk Tullermut aqqusernup sananeqarnissaanut ingerlanneqarnissaanullu ASN-imut akuersissut akueraat, aammalu imeqarfiup killeqarfiata iluani immikkut ittumik akuersissuteqarlutik. Akuersissut aamma immikkut ittumik akuersissut Qeqqata Kommunianut, suliassami sanatitsisuusumut tunniunneqarpoq.
ASN-imut akuersissuteqarnerup aamma imeqarfiup killeqarfianut immikkut ittumik akuersissuteqarnerup kingunerisaanik Sisimiut aamma Kangerlussuup akornanni aqquserniornermi suliassat kingulliit maanna suliarineqarsinnaalerput.
- Nuannaarutigaara Sisimiut aamma Kangerlussuup akornanni aqqusineq sivisuumik kissaatigineqartoq maanna piviusunngorsinnaalermat. ASN-imut akuersissut aamma imeqarfiup killeqarfianut immikkut ittumik akuersissut inuussutissarsiutinik ineriartortitsinerup aamma imeqarfitsinnik avatangiisitsinnillu illersuinerup ataatsikkut ingerlanneqarsinnaanerinut assersuutissaalluarput, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.
Akuersissut aamma immikkut ittumik akuersissut piumasaqaatitalerlugit tunniunneqarput
ASN-imut akuersissut aamma imeqarfiup killeqarfianut immikkut ittumik akuersissut arlalinnik piumasaqaatitaqarput. Piumasaqaateqarnermi aqqusernup sananeqarnerata ingerlanneqarneratalu avatangiisinut isumannaatsumik ingerlanneqarsinnaanissaat, aammalu Sisimiuni imermik isumalluuteqarfiup mingutsinneqannginnissaa qulakkeerneqassapput.
ASN-imut akuersissut atuarneqarsinnaavoq, uani
Imeqarfiup killeqarfianut immikkut ittumik akuersissut atuarneqarsinnaavoq, uani
Annertunerusumik paasisaqarusunnermi attaveqarfissaq:
Immikkoortortaqarfimmi pisortaq Karen Anne Arleth, oqarasuaat 345465-imut imaluunniit e-mail knar@nanoq.gl aqqutigalugu
[Paasissutissat]
| ASN-imut akuersissut sunaana? ASN tassaavoq Avatangiisinut Sunniutissanik Naliliineq. Sanaartugaq ASN-iliornissamut pisussaaffeqarfiusoq ASN-imut nassuiaammik suliaqarnissamut pisussaaffeqarfiuvoq. ASN-imut nassuiaat suliassami avatangiisinut sunniutissat pingaarnerit tulleriiaarlugit saqqummiunneqarnerinik imaqassaaq, tamatumalu peqatigisaanik pinaveersaartitsissutinik, avatangiisinut kingunerluutissanik pinngitsoortitsisussanik tikkuaaffiussalluni. Naalakkersuisut ASN-imut nassuiaat tunngavigalugu suliassaq ASN-iliortussaatitaaffiusoq akuerineqassanersoq isummertussaapput. Imeqarfiup killeqarfianut immikkut ittumik akuersissut sunaana? Tatsit imeqarfigut kaajallallugit imeqarfiup killeqarfiinik taasanik aalajangersaasoqartarpoq. Imeqarfiup killeqarfiata iluani imermik imerneqartussamik minguitsumik pilersuinissaq qulakkeerniarlugu suliassat arlalippassuit inerteqqutigineqarput. Naalakkersuisut ilaanneeriarlutik imeqarfiup killeqarfiata iluani suliassanut immikkut ittumik akuersissuteqarsinnaapput, tamanna inuiaqatigiinni pissutsinut annertuumik pingaaruteqarpat. Imeqarfiup killeqarfianut immikkut ittumik akuersissut piumasaqaatinik, erngup imerneqartussap mingutsinneqarnissaanik pinaveersaartitsinernik imaqartarpoq Inatsisit - Atortut ilaasa avatangiisinut sunniutaannik nalilersuineq aamma avatangiisinik nakkutilliinermut akiliutit pillugit Namminersorlutik Oqartussat nalunaarutaat nr. 5, 27. marts 2013-meersoq - Avatangiisit innarlitsaaliorneqarnissaanik Inatsisartut inatsisaat nr. 9, 22. november 2011-meersoq (pingaartumik kapitali 6 aamma kapitali 8) |