Pinngitsaalillugit spiralilersortissimasut ikiorneqalerput

Ukiuni 1965-1975 akornanni arnat pinngitsaalillugit spiralilersortissimasut Tusaannga attavigineratigut katsorsarneqarsinnaanngorput.

Pisoq nuanninngitsoq, niviarsiaqqat arnallu namminneq angajoqqaavilu akuersineqanngitsut spiralilersuinerat suliarineqaleruttorpoq. Arnat pinngitsaalillugit spiralilersortissimasut psykologimit imaluunniit tarnip pissusaanik ilisimasalimmit massakkut katsorsarneqarsinnaalerput.  Oqaloqatiginninnerit najuunnikkut periarfissaatillugu pissapput. Allatut oqaloqatiginninnerit videokkut oqarasuaatikkulluunniit oqaluunnikkut pissapput.

-Nammineq ilisimanngisamik akuersissuteqarnikuunaniluunniit spiralilertissimaneq misigisaq amiilaarnartuuvoq, arnarpassuarnullu kingunerluuteqartitsilluni. Tusarnaagassat nangeqattaartut, inuiaqatigiinni nittartakkakkullu oqallisigineqartoq alliartortillugu, arnat nuanninngitsumik nalaataqarnerlussimanerup kingunerisaanik qisuariartarnernit aammalu utersaartoortarnermik misigisaqarlutik nassuiaapput. Taamaattumik arnanut taakkununnga taamani misiginikuusaaminnik suliarinninnissaat tunngavigalugu katsorsartinnissaminnik pisariaqartitsisunut maannakkullu kingunerluutigisanit eqqarsartaatsikkut qisuariartarnerit misigisartagaat pillugit  akeqanngitsumik neqerooruteqarpugut, Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen taama oqarpoq.

Ikiorneqarusunnermi Tusaanngamut sianertoqassaaq, taanna katsorsartinnissamut innersuussissaaq.

Tusaannga oqarasuaataanut 80 11 00-imut sianersinnaavutit:

Ataatsinngorneq-sisamanngorneq:               09:00 - 00:00

Tallimanngorneq:                                           09:00 - 04:00

Arfininngorneq:                                              09:00 - 04:00

Sapaat:                                                          09:00 - 00:00

Paasisaqarnerorusukkaanni Naalakkersuisup allattaanut Frederik Kristiansenimut e-mailianut attaveqartoqassaaq: frek@nanoq.gl imaluunniit oqarasuaataanut: + 299 34 56 85-imut