Naalakkersuisoq perorsaasunngorlaat pillugit: Tamatsinnut ulloq pingaaruteqaqaaq

Nunarput perorsaasunik 18-inik pisuunnguallappoq. Kulturip Illorsua Katuaq ullumi maajip 20-ani 2022 nuannaarnermik, erinarsornermik, kalaallisuunik annoraanillu ulikkaarpoq, Nuummi najugaq qimannagu Perorsaanermik Ilinniartut 18-it naammassimmata.

Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Peter Olsen ullormi persuarsiorfiusumi najuuppoq:

• Ulloq manna immikkut illuinnarpoq, mannalu ulloq kingumut eqqaasarumaarparsi. Anguniagaq siunniussimasarsi anguarsi – perorsaasunngorpusi. Tamatsinnut ulloq pingaaruteqaqaaq. Maani ilinniarfimmi ilinniarnersi i-ngerlapparsi, teoriit assigiinngitsorpassuit ilikkarlugit, suliffissinnut ilisimasat nutaat angerlaattarlugit sakkussallu nutaat misilittartarlugit. Taakku piginnaasat nutaat ulluni suliffigisassinni iluaqutaajumaarput kiisalu inuiaqatigiinnut, meeqqanut inuusuttunullu iluaqusiiumaarlutik, Peter Olsen oqarpoq nangillunilu:
  
  
• Ilinniaqatigiit ilissi piginnaasatigut nukittuffeqartusi ilisimatinneqarpunga. Kajumissuseq pimoorussinerlu annertooq takutissimavarsi. Ilissinnut ilisimasassat pigiliunnissaannut piareersimallusilu upalungaarsimasimavusi. Taamaattumik sulilluarnersi pillugu qutsavigerusuppassi, perorsaasutullu ilinniakkamik naammassisaqarnissinni qamannga pisumik pilluaritsi – nunatsinnut pingaaruteqarpusi, nalunngilaralu piginnaasat pigiliutasi suliffeqarfinni kommuninilu mikinngitsumik pisariaqartinneqartut, taakkunanimi meeqqanut, inuusuttunut inuttaasunullu pingaarutilinnik suliaqarpusi – nuannaarutigaaralu ullumi ilinniakkassinnik naammassisaqarnersi.

Nunagisaq/najugaq qimannagu perorsaasunngorniarneq maani Nuummi takornartaanngilaq, massakkummi holdit tallimassaat naamassimmata.