Nunat Avannarliit qaffasinnerusunik ilinniartitaanernik akuersaaqatigiinnerannik isumaqatigiissut Naalakkersuisup atsiorpaa

Ilinniartitaanermut, Kultureqarnermut, Timersornermut Ilageeqarnermullu Naalakkersuisup Peter P. Olsenip nunat avannarliit ilinniartitaanermut ilisimatusarnermullu ministeriisa Trondheim-imi 5. maj ataatsimiinnerat iluatsillugu nunani avannarlerni ilinniartitaanermut ilisimatusarnermullu ministerit allat peqatigalugit qaffasinnerusunik ilinniartitaanernik akuersaaqatigiinnermik isumaqatigiissut atsiorpaa.

Reykjavikimi isumaqatigiissut maanna atuuttoq taamatut nutarterneqarpoq. Nunarput isumaqatigiissummut atuuttumut 2016-imi atsioqataanikuuvoq.

Isumaqatiissutip nutartikkap nunat avannarliit imminnut tatigeqatigiillutik suleqatigiinnissaat qulakkeerpaa, tamannalu pisariaqarluni qaffasinnerusunik ilinniartitaanerit ingerlaannartumik akuerineqartalernissaata atuutilersinneqarnissaanut. Aammalu nunat avannarliit nunani avannarlerni piginnaasanik naliliineq pillugu allaffissornikkut aamma periuserineqartut pillugit suleqatigiinnerat qulakkeerneqarpoq, soorlu suleqatigiissitanik pilersitsinikkut aamma qaffasinnerusunik ilinniartitaanernut paasissutissanik periutsinillu pitsaasunik ataavartumik paarlaasseqatigiittarnissaq.

Ministerit ataatsimiinneranni maanna ajornartorsiutigineqartut pillugit ministerit qulequttanik marlunnik immikkut oqallipput. Qulequtaq ataaseq ilinniagartuut killilersugaanngitsumik oqaaseqarsinnaanerannut aamma piginnaasanik tatiginninnermut tunngavoq, aappaalu meeqqat inuusuttullu immikkut alaatsinaataralugit inuiaqatigiinni naligiinnginnerup millisarniarnerani ilinniartitaanerup inissisimaneranut tunngalluni.
Nunani avannarlerni kultureqarneq pillugu ministeriisa 4. maj Oslomi ataatsimiinneranni Naalakkersuisoq Peter P. Olsen aamma peqataavoq. Tassani suleqatigiinneq VOLT-imik taaguuteqartup ingerlaannarnissaa ministerit aalajangerpaat, taannalu meeqqat inuusuttullu nunani avannarlerni nunatsinnilu kulturi oqaatsillu pillugit suliniutaavoq. Kultureqarnermut ministerit nunani avannarlerni eqqumiitsuliornerup kulturillu kiffaanngissuseqarnerat aamma oqallisigaat. Naalakkersuisup Peter P. Olsenip eqqumiitsuliortunut avataanit akulerutinnginnissamik ileqqoqarnissap pingaaruteqarnera erseqqissarpaa, soorlu Nunatsinni Eqqumiitsuliornermut Aningaasaateqarfiliornermi tamanna pilersinneqarsimasoq.
Nunani avannarlerni ministerit ataatsimeeqatigineqarneranni ilinniartitaanermut, ilisimatusarnermut aamma kultureqarnermut suliniutinut tapertassanik pingaartunik pissarsiaqarsimavoq periarfissarlu iluatsillugu nunatsinni misilittakkat nunanut allanut Naalakkersuisup Peter Olsen-ip ingerlateqqissimallugit. Naalakkersuisoq oqarpoq:
”Nunat avannarliit suleqatigiinnerat aqqutigalugu ilinniartuutitta killilersugaanngitsumik nunanut allanut ilinniariartorsinnaanerat Reykjavik-imi isumaqatigiissutip nutarterneratigut qulakkeerneqartoq annertuumik pingaaruteqarpoq, tamannalu ilinniartuutitsinnut nuannaarutaajumaassaaq.

Nunani avannarlerni ministereqatima oqaloqatiginerisigut ilinniartitaanikkut, ilisimatusarnikkut kulturimilu politikkikkut nunatsinni suliniutigineqartussanut pingaaruteqartunik immersorneqarpunga, taakkulu nunani avannarlerni tamani ajornartorsiutigineqartartut unammilligassanik kinguneqartarnerannut tunngassuteqarput.”