AtuartigukUumasorsiuut nalunaarsugaat upperaakka
Nassiussisuuvoq: Aalisarnermut Piniarnermullu Naalakkersuisoqarfik
Naalakkersuinikkut sulinitsinni ilisimasassat pingaarutillit tamaasa tunngavigalugit aalajangersaasassaagut. Tamanna Naalakkersuisooqatigiit apeqqusersunngilaat, taama Aalisarnermut Piniarnermullu Naalakkersuisoq Karl Tobiassen erseqqissaavoq.
KNR. gl apriilip 21-anni 2022-mi ilaatigut allappoq Naalakkersuisup Ilulissani qalerallit milliartunnginnerarlugit uumasorsiuullu nalunaarsugaat illua-tungerluinnaanik inerniliinerarlugu.
Erseqqissaqqissavara radioaviisimut apriilip 19-ianni unnukkut sinerissap qanittuani qalerallit pillugit issuarneqarninni oqarpunga, Aningaasaqarnermut Akileraartarnermullu Ataatsimiititaliaq aqqutigalugu Avannaani angalatilluta suliffeqarfimmit aalajangersimasumit ilisimatinneqarsimasugut, Ilulissat qanittuanni qalerallit pisarineqartartut alliartortut. Ajuusaarnartumik apersorneqarninnut atatillugu ilanngunneqarsimanngitsumik aamma oqarpunga, “biologit killormut oqariartornerat ilanngullugu ilisimaaralugu”.
Aamma maluginiarpara tusagassiuutitigut sammineqalerneranut atatillugu qulequtsiunniarneqartoq, biologit oqariartuutaannut akuersaanngitsunga akerliuniartungalu.
Erseqqissaassutigissavara, Avannaani qalerallit pillugit oqaaseqarnera ilisimatinneqarsimaninnut atatillugu oqaaseqarnerummat, allamik naamik. Aamma biologit ilisimasaat Naalakkersuinikkut akerlilersorniarneqanngimmata, Aalisarnermut Piniarnermullu Naalakkersuisoq Karl Tobiassen erseqqissaavoq.
Attavigineqarsinnaavoq Aalisarnermut Piniarnermullu Naalakkersuisoqarfik APN@nanoq.gl