AtuartigukSuliffeqarfiutilinnut ikiorsiissutit akuersissutigineqarput
Naalakkersuisut suliffeqartunut ikiorsiissutit, namminersortut suliffeqarfiutaat sulisuminnut Covid-19-ip kingunerisaanik napparsimanermik peqquteqartumik sulinngikkallartunut akissarsianut aningaasartuutiminnut taartisiaqarsinnaanermik imaqartut pilerseqqippaat.
Nassiussisuuvoq: Peqqissutsimut Naalakkersuisoqarfik
Namminersortut suliffiutaat toqqaannartumik Covid-19-ip kingunerisaanik sulisuminnut napparsimanermik peqquteqartumik sulinngikkallartunut aningaasarsianut aningaasartuuteqartut aningaasarsianut aningaasartuutiminnut matussutissanik taartisiatut qinnuteqarsinnaapput. Ikiorsiissutinik aaqqissuussineq suliffeqartunut ikiorsiissutinik siusinnerusukkut aaqqissuussinerusumik ingerlatitseqqinneruvoq 2020-imi upernaakkut atuuttuusumik, kiisalu takornariartitsinermik inuussutissarsiutilinnut 2021-imi atuuttuusumik.
”COVID-19-imut tunngatillugu pissutsit maanna atuuttuusut annertuunik aningaasaqarniarnikkut inuttullu kinguneqaleriartorpoq, sulinermik inuussutissarsiortut nappaassuup tuniluunneratigut aningaasarsiassaminnik annaasaqartartut nunarput tamakkerlugu amerliartornerisigut. Taamaattumik Naalakkersuisuni aalajangerpugut namminersortut suliffeqarfiini sulisuusunut suliffeqarnermi ikiorsiissutit maanna tunillaassornikkut pissusiulersunut naleqqussarneqassasut, inuiaqatigiinni amerlasuunik tunillaassuisoqarnerani, taamalu suliffiutillit namminersortut suli ingerlaavartumik sulisuminnik covid-19-ip kingunerisaanik nappaammik peqquteqartumik sulinngitsunut akissarsiaqartitsisinnaaqqullugit”, taama oqaaseqarpoq Isumaginninnermut, Suliffeqarnermut Nunamullu Namminermut Naalakkersuisoq, Mimi Karlsen.
Inatsisartut Aningaasaqarnermut Akileraartarnermullu Ataatsimiititaliaat suliffeqarnermi ikiorsiissutinik aaqqissuussinermut immikkoortitsipput 50 mio. kr.-inik, atuuttussamik 17. Januar 2022-imiit 6. april 2022 ilanngullugu. Suliffeqarnermi ikiorsiissutit marlunnik immikkoortunik siunnerfeqarput, taamalu immikkoortunik marlunnik malittarisassaqarlutik:
1) neqeroorutigineqarpoq namminersortut suliffeqarfiutaat sulisuminnik Covid-19-ip kingunerisaanik tunillatsittunik angerlartitsigallartut aningaasarsianut aningaasartuutinut taartisiaqartinneqarnissaannik.
2) neqeroorutigineqarpoq umiatsiaararsortut aalisariarsinnaanngitsut tunisaqarsinnaanngitsullu Covid-19-imik tunillatissimanermikkut aningaasarsiassaminnut taartisiaqartinneqartarnissaannik.
Aningaasarsiallit covid19-imik eqqugaasut angerlartitaasimasutut isigineqarput. Taamaalilluni suliffimmit coronamik attuumassuteqartumik sulinngittoqarnermut attuumassuteqartillugu oqaaseq angerlartitaaneq atorneqarpoq.
Suliffeqarfiit aammalu umiatsiaararsortut akissarsianut januarimi aningaasartuutinut matussutissanik tunineqarsinnaasut februarimi imaluunniit marsimi 2022 Sullissivik.gl aqqutigalugu qinnuteqarsinnaapput.
Qinnuteqarnermi immersugassaq aamma qinnuteqarnissamut, tapiiffigineqarnissamut aammalu allaffissornermut malittarisassat Sullissivik.gl -imi nassaarineqarsinnaapput. Taakkua maanna suliarineqarput, naatsorsuutigineqarporlu tamanit takuneqarsinnaalissasut 10. februar 2022-ip kingorna.
Ersarinnerusunik paasisaqarniaraanni attavigineqarsinnaavoq Naalakkersuisup Allattaa Naja Lynge Petersen e-mail: nlyp@nanoq.gl imaluunniit tlf. + 299 34 56 11