AtuartigukInuussutissarsiortunut ikiorsiissutit nutaat
Inuussutissarsiortunut ikiorsiissutit nutaat, ”50-nit ikiorsiissutit” aamma ”Ukiuunerani ikiorsiissutit”, suliffeqarfinnut qatserisartut inoqarsinnaassutsimut akuerisaannit 50%-iinnarmik isersimasoqarsinnaanermut killilersuinernut imigassanullu aalakoornartutalinnut tuniniaasinnaannginnermut sassaalliisinnaannginnermullu eqqugaasunut atuuttut.
Nassiussisuuvoq: Nunanut Allanut, Inuussutissarsiornermut Niuernermullu Naalakkersuisoqarfik
Naalakkersuisut nunarsuaq taakkerlugu tunillaassuunneq Kalaallit Nunaannut sunniuteqalermalli, inuussutissarsiortunut Covid-19-ip kingunerisaanik eqqugaasunut suliniuteqarput.
Omikronimik kingullertigut tuniluuttoqalermalli killilersuuterpassuarnik kinguneqartitsivoq, inuussutissarsiornermut malunnaatilimmik killilersuisitsisumik taamaattumillu aningaasaqarnerliortitsisumik.
Taamaattumillu Inatsisartut Aningaasaqarnermut Akileraartarnermullu ataatsimiititaliaanit akuersissuteqarnermikkut, Naalakkersuisut inuussutissarsiortunut killilersuutinit eqqorneqartunut ikiorsiissutinik nutaanik marlunnik pilersitsipput.
”50-nit ikiorsiissutit”
Suliffeqarfiutilinnut qatserisartut inoqarsinnaassutsimut akuerisaannit 50%-iinnarmik isersimasoqarsinnaanermut killilersuinernut eqqugaasunut 50-nit ikiorsiissutit siunertaritinneqarput.
50-nit ikiorsiissutinik januaarip tallimaaniit apriilip tallimaat tikillugu, imaluunniit killilersuutit atuutsinneqarunnaarnissaata tungaanut qinnuteqartoqarsinnaavoq.
Aningaasartuutinut aalajangersimasunut iluanaarutissaagaluanullu annaasanut tapiissutissanik qinnuteqartoqarsinnaavoq, pilersaarutaasumillu aaqqissuusanik taamaatitsisariaqarnernut aningaasartuutinut taarsigassanut qinnuteqartoqarsinnaavoq.
Taamatuttaaq aningaasanik tigoriaanarnik uninngasuuteqannginnermi ikiorsiissutissanik qinnuteqartoqarsinnaalluni.
”Ukiuunerani ikiorsiissutit”
Suliffeqarfinnut namminersortunut, imigassanik aalakoornartutalinnik tuniniaanissamut sassaalliinissamullu killilersuutinit kalluarneqarsimasunut atuuppoq. Kalaallit Nunaanni sassaalliisarfinnut, imerniartarfinnut assigisaanilu tamani akunnerni 22:00-miit 05:00-mut matoqqaqqusaasunut, suliffeqarfinnullu tuniniaaffinni sassaalliisarfinnilu kommunini imigassanik aalakoornartutalinnik tuniniaaqqusaaffiunngitsuni sassaalleeqqusaanngitsunilu atuuppoq.
Kommunini inerteqquteqarfiusuni suliffeqarfiit piffissani ukunani qinnuteqarsinnaatitaapput:
- Qeqqata Kommunia: januaarip aqqarnganiit februaarip aallaqqaataa ilanngullugu
- Kommuneqarfik Sermersooq aamma Kommune Kujalleq: januaarip 26-aniit februaarip qulingiluaata tungaanut
- Kommune Qeqertalik: januaarip 27-aniit februaarip qulingiluaata tungaanut.
Ukiuunerani ikiorsiissutinik aalajangersimasumik aningaasartuutinut aningaasanillu tigoriaanarnik uninngasuuteqannginnermi tapiissutissanut qinnuteqartoqarsinnaavoq.
Ikiorssiissutinit marluusunit qinnuteqartoqarsinnaavoq, taamaattorli aningaasartuutit aalajangersimasut aappassaaneerluni ikiorsiissutinit tapiiffigineqarsinnaanngillat.
Ikiorsiissutit atuutsinneqareersimasut assigalugit, ”50-nit ikiorsiissutit” aamma ”Ukiuunerani ikiorsiissutit” Innovation Greenlandimiit allaffissornikkut ingerlanneqassapput.
Ikiorsiissutinut iliuusissatut pilersaarutit www.big.gl -imi atuarneqarsinnaapput.
Sukumiinerusumik paasisaqarusuttut Inuutissarsiornermut Niuernermullu Naalakkersuisoqarfimmut, isiin@nanoq.gl -imut saaffiginnissinnaapput.