AtuartigukAqagumiit kommunini arlalinni imigassanik aalakoornartortalinnik nioqquteqarneq imigassartortitsinermullu inerteqquteqarallarneq
Nassiussisuuvoq: Peqqissutsimut Naalakkersuisoqarfik
Naalakkersuisut kommuninit arlalinnit piumaffigineqarput imigassanik aalakoornartortalinnik nioqquteqarneq imigassartortitsinermullu inerteqquteqarallarnissamik. Qinnuteqaatit akuerineqarput unnuap qeqqaniillu Kommune Kujallermi, Qeqqata Kommuniani aamma Kommuneqarfik Sermersuumi atuutilissapput. 9. februar 2022 ilanngullugu Kommune Kujallermi aamma Kommuneqarfik Sermersuumi inerteqquteqarneq atuutissaaq Qeqqata Kommunianilu 1. februar 2022 ilanngullugu inerteqqut atuutissaaq.
Neriniartarfiit imerniartarfiillu siusinnerusumik matoqqatinneqartarnissaanut piumasaqaateqarnerata nalaani pisortat tungaaninngaanniit angerlarsimaffimmi imigassartornerup nakkutigineqarnerulerput angerlarsimaffinnilu "fiisterneq" annertusiartuaarnikuuvoq.
Angerlarsimaffimmi imernerulerneq meeqqanut aamma ilaqutariinnut kisimi eqquinngilaq, Covid-19-imilli tunillaassuisinnaaneq annerulersippaa, imigassartortillunimi tunilllaassuisinnaaneq equmaffigineqarnera annikillisarmat inuillu qaninnerulertarmata.
Annertuumik angerlarsimaffimmi fiisternermi imigassartorsimatilluni amerlanertigut Peqqinnissaqarfimmut nukinnik atuingaatsiartarpoq aamma politiinut suliassanik arlalinnik kinguneqartarpoq, taakkulu imigassartorpallaarnermik tunngaveqartarlutik.
Ilaatigut makku pineqarput:
- Perulluliornerit
- Sakkortusaarneq
- Aqqusinermi aalakkunneq
- Aqqusinermi eqqissiviilliortitsinerit
- Kinguaassiuutitigut atornerluisarnerit
- Imigassartorsimalluni biilerneq – tassani ilaalluni aquttup imigassartorsimalluni biilerluni ajutoornera
Tamanna tunngavigalugu tuniluunnerullu annertunera pissutigalugu, Naalakkersuisut 25. januar aamma 26. januar 2022 unnuaani imigassanik aalakoornartortalinnik nioqquteqarneq imigassartortitsinermullu inerteqquteqarallarnissamik qinnuteqaatit akuersissutiginiarlugit aalajangerput.