Misissuutinik (antigentgest) agguaaneq annertusineqarpoq

”Misissuutit pisariaqartitsisunut ingerlatinneqassapput”, Isumaginninnermut, Suliffeqarnermut Nunamullu Namminermut Naalakkersuisoq Mimi Karlsen oqarpoq. Taassuma Kirsten L. Fencker napparsimalluni sulinngiffeqarnerani taarserpaa.
”Misissuutit marloqiusanngorlugit ingerlateqqinneqassapput. Siulliit kommuninut nassiussuunneqarput, kommunillu namminneq suliffeqarfiutiminnut ingerlateqqissavaat, soorlu utoqqaat illuinut, atuarfinnut il.il.”
Taassuma saniatigut aamma innuttaasut akeqanngitsumik misissuutinik aallernissaminnut periarfissinneqassapput, soorlu usuup puui aamma peqqinnissaqarfimmut akeqanngitsumik aaneqarsinnaasartut. Usuup puui aamma pisiniarfinni pisiassaasarput.
”Aaqqiissutissamik suliniuteqarpugut, ilaatigut misissuutit akeqanngitsumik peqqinnissaqarfimmut aaneqarsinnaanissaat suliniutigaarput, nunaqarfinnilu peqqinnissaqarfeqanngitsuni misissuutit Pilersuisup pisiniarfiinut aaneqarsinnaanissaat suliniutigaarput. Misissuutillu suli aamma pisiniarfinni pisiarineqarsinnaassapput”, Mimi Karlsen oqarpoq.
Erseqqissaassutigineqassaaq misissuutit pillugit innuttaasut namminneq peqqinnissaqarfimmut Pilersuisumullu saaffiginnissanngimmata. Qaqugorpiaq misissuutit illoqarfinni nunaqarfinnilu pissarsiarineqarsinnaanersut piffinni taakkunani nalunaarutigineqarumaarpoq. Misissuutit illoqarfinnut nunaqarfinnullu nassiussuunneqarput, angallannikkut pissutsit silallu unammillernartoqarnera apeqqutaajumaarpoq qaqugorpiaq apuutissanersut.