Misissugassarpassuit misissueqqissaarnerpassuillu akinissamut piffissamik sivisunerulersitsivoq

Peqqinnissaqarfik innuttaasunit misissugassat tigusat – tunillatsissimanermut tunillatsissimannginnermullu takussutissiisut – misissoqqissaarnerisa inernerisa piareernerini pilertornerpaamik akineqarnissaat anguniarlugu ulapittorujussuuvoq. Misissuinerit inerneri oqarasuaatip normuanut paasissutissiissutigineqartumut sms-ikkut nalunaarutigineqartarput, taamaattumillu misissortinninni oqarasuaatip normuata eqqortup peqqinnissaqarfimmut nalunaarutiginissaa pingaaruteqarpoq.

Misissueqqissaarnerit sivisusarput
Nuup avataani misissueqqissaarnissamut pisinnaasat killeqarput, taamaattumillu misissugassarpaaluit misissoqqissaartinniarlugit Nuummut nassiunneqartarput. Taamaattumik misissortinnermiit misissoqqissaakkap inernerata tigunissaanut ullut arlallit ingerlasinnaapput. Ersiuteqaruit akissummik pissarsinissavit tungaanut angerlarsimaannartariaqarputit.

Inuit ilaat sianerfigineqartanngillat
Tunillatsissimasut aatsaat taama amerlatigimmata, innuttaasut ilaat sianerfigitinngitsoorsinnaapput. Nunatsinni misissugassanik tigusisarneq suli annertoorsuuvoq, aammalu misissugassanik tigusisarneq, misissueqqissaartarneq nalunaartarnerlu annertoorsuarmik suliarineqarput. Innuttaasut minnerpaamik misissortinnerup inerneranik SMS-ikkut nalunaarfigineqartussaapput, kisiannili misissugassamik tigusivigitinninniit kingusinnerpaamik nal. ak. 72-it qaangiunnerini SMS-ikkut akissutigisisimanngikkuit, tamatumani qaqutigoortumik teknikkikkut kukkusoqarsimasinnaavoq. Kisianni ulluinnarni nal. 9.00 aamma 14.00 akornanni sapaatillu akunnerisa naanerini nal. 12.00 aamma 13.00 akornanni misissortinnerpit inernera paasiniarlugu oqarasuaat nr. 34 40 20-mut sianersinnaavutit.

Coronaqalersimaguit
Imminut misissorninni imaluunniit PCR-imik misissortinninni tunillatsissimallutit paasigukku imminut mattutissaatit. Sakkortuunik ersiuteqaleruit najukkanni peqqinnissaqarfik attaveqarfigissavat.

Qanoq ilinerani aaqqittutut nalunaarutigineqassavit?

Coronamik tunillatsinneq – ersiutilimmik:

Mattusimanerit unitsissinnaavat:

• Nalunaaquttap akunnerini 48-ni ersiuteqanngikkuit (kissarnermut apparsaatinik – soorlu paracetamolinik – atuisimatinnak) aamma peqqinnerujussuartut misigisimaguit.
• Ersiutit aallartinneriniit ullut qulit kingorna ulluni marlunni kissarneqarsimanngikkuit (kissarnermut apparsaatinik nakorsaatitorsimanak.

Ersiutinut sinneruttunik, soorlu annikitsumik quersornermik, mamassutsinik malussarsinnaajunnaarnermik naamasaarunnermillu, niaqorlunnermik qasoqqanermilluunniit malugisimasaqarnermi mattusimanerup unitsinnissaa akuersaarneqarpoq.

Coronamik tunillatsinneq – ersiuteqanngitsumik:
Misissugassamik tigusisoqarneraniit ullut arfineq aappaanni mattusimaneq unitsinneqarsinnaavoq.
Paasissutissat amerlanerujussuit corona.nun.gl-imi nassaarisinnaavatit