AtuartigukKommuneqarfik Sermersuup Naalakkersuisullu akornanni suleqatigiinnissamik isumaqatigiissutip nutarterneqarnera
Nassiussisuuvoq: Peqqissutsimut Naalakkersuisoqarfik
Naalakkersuisoq Kirsten Fenckerip aamma Borgmester Charlotte Ludvigsenip peqqinnissamut tunngatillugu Kommuneqarfik Sermersuup og Naalakkersuisullu akornanni isumaqatigiissutissaq suleqatigiinnermik pitsanngorsaataasussaq decembarip 27-ani 2021-mi atsiorpaat.
”Suliffinni sulisussaaleqiffiusuni qulakkiikkamik sulisussaqartarnissaq innuttaasullu pitsaasumik sullinneqartarnissaat isumaqatigiissuteqarnermi siunertarineqarpoq. Nunaqarfinni, illoqarfinni mikinerusuni isorliunerusunilu innuttaasunut iluaqutaasussamik susassaqarfiit akimorlugit suleqatigiissinnaagatta nuannaarutigaara. Naalakkersuisut uunga assingusumik kommunit allat isumaqatigiissuteqarfigineqarsinnaanissaat neriuutigaara” taamak oqarpoq Peqqinnissamut Naalakkersuisoq Kirsten Fencker.
Isumaqatigiissutikkut siunniunneqarpoq Kommuneqarfik Sermersuup aamma Peqqinnissaqarfiup akornanni nukittunerusumik attaveqatigiinnermik pilersitsisoqarnissaa. Suleqatigiit isumaqatigiissummi suliniutaat misilittakkat angusallu eqqarsaatigalugit illuatungeriit siusinnerusukkut isumaqatigiissumminni piffissami 2017-imiit 2021-ip tungaanut pilersissimasaanniittut ingerlariaqqinnissami pitsanngorsaatitut ipput. Paamiut pillugu isumaqatigiissut assersuutitut eqqaaginnarneqarsinnaavoq. Tassani kommunimiit paaqqutarisarialinnut angerlarsimaffik nutaaq peqqissaaviup ataaniittussanngorlugu pilersinneqarpoq, siunertarineqarporlu kommuni peqqinnissaqarfiullu akunnerminni suleqatigiinnerat qaninnerulersinniarlugu pisariaqartitsinerlu naapertorlugu nukitsigut imminnut ikioqatigiittarnissaq.
Peqqinnissaqarfiup iluani suleqatigiinnissamut isumaqatigiissut nutaaq 2022 januaarip aallartinnerani atuutilissaaq piffissallu ingerlanerani nutarterneqartassalluni.
"Peqqinnissamut tunngatillugu suleqatigiinnissami siunissamut isumannaarusuppagut nutaamik eqqarsarneq susassaqartullu akimorlugit suleqatigisinnaanissaat innuttaasunik sullissinissatsinni. Taamaaliortariaqarpugut innuttaasut utoqqaliartormata sulisussallu amigaataasalernikuullutik. Paamiuniittunik peqqissaasumik angerlarsimaffinnut orniguttartumik aamma angerlarsimaffimmi ikiortimik suleqateqarnikkut suleqatigiinnissaq aallarnisalereerparput. Nutaamik suleqatigiinnissamik isumaqatigiissuterput naapertorlugu suleqatigiinnerup annertusarneqarnissaa nuannaarutigaara qilanaarutigalugulu Naalakkersuisut Peqqinnissaqarfiullu pitsaasumik suleqatiginissaat” taama oqarpoq borgmester Kommuneqarfik Sermersooq Charlotte Ludvigsen.
Peqqissuseq pillugu Isumaqatigiissummi Peqqinnissaqarfiup aamma Kommuneqarfik Sermersuup akornanni suleqatigiinnerup ineriartornissaatut kissaatigisaq allaaserineqarpoq, suliassaqarfiit suliamullu piginnaasat assigiinngitsut pillugit annertuumik suleqatigiinneq ingerlanneqassaaq, innuttaasut peqqissusiannik tapersersuiumalluta pisortallu innuttaasunut sullissinertut neqeroorutaat pitsanngorsarumallugit. Neriuutigaarput suleqatigiinnissamut isumaqatigiissut siunissami suleqatigiinnissatsinnut sinaakkutissanik nukittuunik aamma anguniagaqarluni siunnerfeqarnermik aqqutissiuussissasoq.
Sukumiisumik paasiniaavissaq: Peqqissutsimut Naalakkersuisoqarfik PN@nanoq.gl