2022-mi imminut isumassornissat eqqaamajuk – pingaartumik angutinut kaammattuut

Allattut Naligiissitaanermut Naalakkersuisoq, Naaja H. Nathanielsen, Peqqinnissamut Naalakkersoq, Kirsten L. Fencker aamma Isumaginninnermut Naalakkersuisoq, Mimi Karlsen

Ukioq naajartulerpoq, erniinnarlu 2022 allattarnissaanut sungiunniartussanngorparput. Juullisiorneq aamma ukiortaarsiorneq isumaliutiginninnermik aamma inunnik allanik isumassornissamik nassataqartarpoq.
Taamaammat piffissaq Naalakkersuisut angutit ”imminut isumassornissaat” – tassa imminut paarinissaat - sammerusuppaat.

Nunarsuup sinnerani anguterpassuit novembarip qaammataa angutit peqqissusaannik ukkatarinniffigisarpaat. Tamanna ’movember’-ikkut pisarpoq, tamannalu qaammataalluni angutit peqqissutsikkut ajornartorsiutaannik, soorlu issummigut kræfternermik, quup aqqutaatigut kræfternermik aamma tarnikkut nappaatinik ukkatarinniffiusoq. Qaammammi anguterpassuit kakkivissami ummattarput ajornartorsiut ukkatariniarlugu. Oqaaseq ‘Movember’ oqaatsit ‘moustache’ aamma ‘november’ ataatsimoortillugit oqaasiliaavoq.

Maani nunatsinni aamma angutit peqqissusaat immikkut sammineqarnissaat pisariaqarpoq. Ukioq manna aamma kræftimut angutinik immikkut eqquisartumut annaasaqarpugut. Tamatuma saniatigut angutinik imminut toquttunik annaasaqarpugut kiisalu angutit ilai tarnimikkut ajornartorsiutinik kiserliornermillu sorsuuteqarlutik.

Naalakkersuisut kræftimut pilersaarutaata misissorneqarneranit ilisimavarput, angutit kræftimut ersiutinik nalaataqaraangamik Peqqinnissaqarfimmut saaffiginnittannginnerat sivisunerusartoq. Taamaattumik ersiutit maluginngitsuusaaginnarnagit, tamatumunnga isumaalunnermik oqaasertaliisarnissaq aamma ikiortissarsiortarnissaq kaammattuutigerusupparput. Tassami nalunngilarput kræftimik nappaateqalernermi piffissaq aalajangiisuulluinnartuusoq.

Naalakkersuisut angutit aamma arnat peqqissusai pingaartippai, misissuinerilli ersersippaat, angutit isumaalunnertik misigissutsitillu oqaluuserisinnaasanngikkai nakorsiartannginnerullutillu. Tamatuma saniatigut ilisimavarput, angutit amerlasuut inuuniarnikkut ajornartorsiortut, angerlarsimaffeqanngitsullu amerlanerit angutaasut. Taamaammat angutit peqqissusaannik aamma angutinik isiginnittariaasitta ilai allanngortittariaqarpavut.

Qujanartumilli suliniutigisinnaasatsinnik aaqqiissutissarpassuaqarpoq:

Siullermik angutit imminut isumassortarnissaat pingaaruteqarpoq. Anniaateqaruit napparsimavimmukarit. Kanngugissanngilat. Timit pissusissamisuunngitsutut misigigukku, tamanna inoqatinnut oqaluuseriuk. Inuttut allanngornissaq kisivit akisussaaffigivat, aappaatigulli tamanna inuunermik imaluunniit toqumik kinguneqarsinnaavoq.

Nuanninngitsunik misigissuseqarnissaq artornartikkukku, tamanna sungiunniarsariuk, misigissuserlu suminngaanneernersoq paasiniarlugu. Inuunermi aqqusaagassat allat artornartutulli aamma tamanna ilikkarneqartussaavoq. Eqqarsaatitit tatigisannut oqaloqatigiissutigikkit. Kiserlioruit Tusaanngamut 801180-ikkut sianerlutit imaluunniit 1899-imut SMS-erlutit saaffiginnigit.

Tamatuma saniatigut innuttaasut isiginnittariaasiat aamma allanngortariaqarpoq. Assigiinngissutsit akuerinissaanut ilinniartariaqarparput kiisalu angutinik misigissutsiminnik oqaasinnguisartunik isiginnittariaaserput allanngorlugu. Tamannami kanngunanngilaq sanngiissusaananilu, sapiissusaavorli akisussaanerullunilu.

Ataatavut, qatanngutigut angutit ernivullu pinngitsoorsinnaanngilavut. Taamaammat angutit aammalu peqqissutsikkut ajornartorsiutit nipangiutigiinnassanngilavut. Tamatta kukkuneqanngitsuunngilagut. Tamatta kukkusarpugut. Ilaannikkut tamatta nuanninngitsunik eqqarsaateqartarpugut. Ilaatigut napparsimasarpugut. Inuuneq taamaappoq. Inuunissarli, uatsinnut pilluta aammalu inuit maqaasilertussat pillugit pingaaruteqarpoq.
Ukiortaami anguniagaqarnissamik pilersaaruteqartarneq ileqquusoq taamaatitsigu ataanilu allaqqasut neriorsuutigiinnarlugit:

- Imminut paarilluarnissara peqqinngikkumalu ikiortissarsiornissara neriorsuutigaara
- Eqqarsaatikka artornaraluartut ulloq nutaamut ingerlaqqinnissara neriorsuutigaara
- Allat assuarinnginnissaanut neriorsuivunga – inuimmi assigiinngillat

2022 angutit peqqissusaannut neriuuteqarfigilersillarput aamma ammanerulersillugu. Tamatta allannguisinnaavugut. Immissinnut tapersersoritsi toqqissisimatitsillusilu.
Ukiortaami pilluaritsi peqqillusilu

Sukumiinerusumik paasisaqarusuttut A/C fuldmægtigi Najaaraq Josefsen, Aningaasaqarnermut Naligiissitaanermullu Naalakkersuisoqarfimmiittoq, ugguuna attaveqarfigisinnaavaat: najn@nanoq.gl