AtuartigukAtuariartortunut atuartut angerlarsimaffianiititsisarneq pillugu nalunaarut pillugu tusagassiuutinut nalunaarut
Nassiussisuuvoq: Ilinniartitaanermut, Kultureqarnermut, Timersornermut Ilageeqarnermullu NaalakkersuisoqarfikNaalakkersuisut kommunit suleqatigalugit nalunaarusiorput, meeqqat inuusuttullu kommunit atuartunut angerlarsimaffiini najugaqarnerannut malittarisassanik aalajangersaaffiusumik.
Atugassarititaasut pitsaasut toqqissisimanartullu inersimasunit isumassuilluartunit tapersersorneqarfiusut meeqqat atugarissaarnerannut, ineriartornerannut, kajumissuseqarnerannut ilinniarnissaannullu periarfissiisut pingaaruteqarluinnarput. Taamaattumik nalunaarummi atuartut angerlarsimaffiini perorsaanikkut atugassarititaasut, sulisut piginnaasaqarfii, atuartut angerlarsimaffimmut tikinnissaannut piareersartarneq kiisalu atuartut najugaqarnerminni tapersersorneqarnissaat angajoqqaanullu attaveqartarneq pingaartinneqarput.
Ilinniartitaanermut, Kultureqarnermut, Timersornermut Ilageeqarnermullu Naalakkersuisup nalunaarut nutaaq nuannaarutigaa neriuutigalugulu nalunaarutip atuartut pitsaanerusumik isumagineqarnissaat, atugarissaarnerunissaat ilinniagaqarnissaallu kinguneriumaaraa, taakkuami ilaquttatik najukkatillu sungiusimasatik atuarnertik naammassiniarlugu qimattariaqartarpaat.
”Meeqqat inuusuttullu amerlasuut atuartut angerlarsimaffiini najugaqartarput - amerlasuutigut ilaquttaminniit ikinngutiminniillu ungasittumi najugaqartarlutik. Meeraanermi inuusuttuunermilu inersimasut saqqumisut isumassuilluartullu pisariaqartinneqartarput, ulluinnarni inuunermi ikiuisinnaasut tapersersuisinnaasullu. Nalunaarummi meeqqanut, atuartut angerlarsimaffiini najugaqartariaqartunut, atugassarititanik peroriartornermilu atugassanik peqqinnartunik toqqissisimanartunillu taama ittunik kommunit pilersitsinissaannik pisussaaffilerneqarput.”
Annertunerusumik paasisaqarusukkaanni saaffigisassaq: Ilinniartitaanermut Aqutsisoqarfimmi pisortaagallartoq, Kaali Olsen, oqarasuaat: +299 346158, email: kaol@nanoq.gl