Namminersorlutik Oqartussat suliffissuarnut gassinik misissuinissamut akuersissutinik nutaanik maligassiuiviusussanik akuersissuteqarpoq

Aatsitassarsiorluni misissueqqaarnissamut akuersissut aamma aatsitassarsiorluni misissuinissamut akuersissut pillugu tuluit ingerlatseqatigiiffiannit Skyfire Ltd-imit qinnuteqaatit marluk Naalakkersuisut akueraat. Skyfire suliffissuarnut gassinik, soorlu helium aamma hydrogen, Tunumi sumiiffinni akuersissuteqarfiusuni misissuinissamik anguniagaqarpoq. Qinnuteqaatit asseqanngitsuupput, tassami Kalaallit Nunaanni suliffissuarnut gassinut aatsitassarsiorluni misissuinissamut akuersissummik siusinnerusukkut tunniussisoqarsimanngimmat. Suliffissuarnut gassinut aatsitassarsiorluni misissuinissaq, Kalaallit Nunaanni ikummatissiassarsiorluni misissuisarnerup unitsinnissaa pillugu Naalakkersuisut aalajangiinerannut, akerliunngilaq. Tamatumunnga pissutaavoq suliffissuarnut gassit ikummatissiassatut innginnerat. Ikummatissiassat uumassusilinnit (quajaatit qeqqussallu aamma naasut sinnikui), nunap iluani matoorunneqarsimasunit aammalu ukiuni miliuunilikkaani naqitsinermik nalaanneqarsimasunit kissassutsinillu sunnerneqarsimasunit pilertarput. Suliffissuarnut gassit nunarsuup qaavani uumassuseqanngitsut pileriartortarnerat tunngavigalugu pinngortarput (taamaattumillu uumassusilinneersuunatik, taamaattumillu aamma ikummatissiassanik akoqaratik). Suliffissuarnut gassinik aatsitassarsiorluni misissuineq aatsitassarsiorluni misissuinertuut allaffissornikkut aqunneqassaaq. Aatsitassanut akuersissutinit allanit allaanerussutaasumik, suliffissuarnut gassinik aatsitassarsiorluni misissuineq qanoq suliaqarnikkut ingerlanneqassanersoq pillugu piumasaqaatinik immikkuullarissunik ilanngussinissamut Aatsitassanut Aqutsisoqarfik annertusisamik piginnaatinneqassaaq.

Annertunerusumik paasisaqarusunnermi saaffigineqarsinnaavoq allaffimmi pisortaq Rannvá Clementsen, oqa. +299 34 68 23 eller e-mail: racn@nanoq.gl