AtuartigukInunnut innarluutilinnut attaveqaqatigiiffik
Inunnik innarluutilinnik allanik naapitsisarneq inunnut innarluutilinnut ulluinnaat pitsaanerulersinneqarnissaannut periaatsit ilagaat. Taamaammat Naalagaaffiit Peqatigiit Inunnut Innarluutilinnut Ulloqartitsinerannut atatillugu Tiliup kaffillernerani Meeqqanut, Inuusuttunut Ilaqutariinnullu Naalakkersuisup Paneeraq Olsenip attaveqaqatigiiffinnik pilersitsineq qitiutippaa.
Nassiussisuuvoq: Meeqqanut, Inuusuttunut Ilaqutariinnullu Naalakkersuisoqarfik
Inuusuttut innarluutillit amerlasuut innarluuteqarnertik pissutigalugu kiserliortarput inooqatigiinnillu avinngarusimasutut misigisarlutik. Pitsaasunik qanittunillu ikinnguteqarnissat inunnut tamanut pingaaruteqarpoq. Taamaattoq innarluuteqaraanni tamanna ajornakusoornerusinnaasarpoq. Assersuutigalugu autismeqaraanni, inunnik nutaanik naapitsinissaq ajornakusoorsinnaasarpoq. Innarluuteqarnermik qanoq qisuariarfigineqarnissaa ilaasa nalornissutigilertarpaat. Taamaanneq inuit innarluutilinnut naggataagut kiserliornermik kinguneqarsinnaavoq.
Taamaammat Kalaallit Nunaanni tamarmi inuit innarluutillit attaveqaqatigiittarfissaannik pilersitsinissamut periarfissat pillugit Meeqqanut, Inuusuttunut Ilaqutariinnullu Naalakkersuisup Paneeraq Olsenip Inuit Innarluutillit Illersuisuat Anja Hynne Nielsen oqaloqatigaa. Illoqarfinni mikinerusuni nunaqarfinniluunniit najugaqaraanni attaveqaqatigiittarfinni ataatsimoornerit attaveqaqatigiittarfiit digitaliusut soorlu Facebook, Messenger imaluunnit Whatsapp atorlugit ingerlanneqarsinnaapput.
“Inuusuttut innarluutillit amerlasuut ikinngutinik inooqatigiinnilu attaveqaqatigiiffinnik sanngisuunik amigaateqarput. Taamaammat attaveqaqatigiiffinnik taamaattunik pilersitseqataasinnaasumik inuusuttullu innarluutillit imminnut tatiginerannut kivitsisinnaasumik inunnut innarluutilinnut illersuisoqaratta nuannaarutigeqaara” Paneeraq Olsen oqarpoq.
Inuit innarluutillit ulluinnarisaat pillugit ilisimasanut Tiliup qaammarsaanermik suliaqarnera pingaarutilerujussuuvoq. Piffissap sivikitsup iluani inuit innarluutillit ulluinnarisaasa pitsanngorsarneqarnissaannik suliaqarnermi Tilioq suliffeqarfinngorsimavoq pingaaruteqartumik peqataasoq. “Ilisimasaqalernerup ingerlateqqissavaatigut. Innarluuteqaraluarutta innarluuteqanngikkaluaruttaluunniit immitsinnut ilisimasaqarnerujartortilluta inissaqartitsinerujartussaagut”. Paneeraq Olsen oqarpoq.
Naalagaaffiit Peqatigiit Inunnut Innarluutilinnut Ulloqartitsinerannut atatillugu Tiliup kaffillernerani Paneeraq Olsen peqataasimavoq. “Innuttaasut allat pisinnaatitaaffiinik inuit innarluutillit pisinnaatitaaffeqarnerat ullumikkut nalliuttorsiutigivarput. Ullumi inunnut innarluutilinnut ulloritinneqartumi Inunnut Innarluutilinnut Illersuisoq aamma Tilioq pulaarsinnaasimagakkit ilorrisimaarutigaara. Inuit innarluutillit ulluinnaasa pitsanngorsaavigineqarnissaat qamaniititaraara. Innarluuteqarluni nalinginnaasumik nuannaarutissarpassuaqarluni inuusoqarsinnaasariaqarpoq – pingaartumik inunnik qanilaartunik pitsaasunillu ilaqarsinnaanermik nuannaarutiginnilluni, soorlu uanga ullumikkut taamaassimasunga”, Paneeraq Olsen oqarpoq.
Paasisaqarnerorusukkuit Naalakkersuisup allattaa Inûna Davidsen e-mailikkut inda@nanoq.gl-ikkut imaluunniit oqarasuaatikkut +299 25 78 54-ikkut attavigiuk.