AtuartigukNarsarsuaq pillugu pilersaarutit maanna aalajangersarneqartussanngorput
Nassiussisuuvoq: Ineqarnermut Attaveqaasersuutinuullu Naalakkersuisoqarfik
Qaqortumi mittarfiliortoqarnissaanik aalajangermut malitsigitillugu Ineqarnermut Attaveqaasersuutinullu Naalakkersuisoq Mariane Paviasen kiisalu Borgmester Stine Egede decembarip ulluisa aappaanni 2021 ataatsimiipput, Narsarsuullu siunissaa pillugu alloriarnerit tulliit isumaqatigiissutigalugit.
Narsarsuup siunissaa pillugu suleqatigiissitanut suliassarititaasut nutarterneqassapput, pilersaarusiornermilu Narsarsuarmiut peqataatinneqarnissaat qularnaarneqassalluni.
Taamaammat januaarip qeqqani Narsarsuarmi innuttaasunik ataatsimiititsinissaq siunniunneqarpoq, tassanilu Naalakkersuisut attuumassuteqartut kommunimilu qinikkat peqataassallutik.
Borgmesteri Stine Egede ima oqarpoq:
"Innuttaasunik peqateqarluta Narsarsuup siunissaanik pilersaarusiornerput kiisami nangissinnaanngoratsigu assut nuannaarpunga. Suleqatigiissitat siulii suliarpassuaqarput aallaavigisinnaasatsinnik, innuttaasunillu ataatsimeeqateqarnermi Naalakkersuisut suliassaqarfinnit assigiinngitsuneersut peqataanissaat assut qujanarpoq."
Naalakkersuisoq Mariane Paviasen ima oqarpoq:
”Innuttaasunik piviusumik peqataatsitsineq aallaavigalugu Narsarsuup siunissaata aalajangiivigineqarnissaa Naalakkersuisunut pingaaruteqarpoq. Kujataani mittarfik avataaniillu isaaffik Qaqortumiissasoq kommunalbestyrelsimit aalajangerneqarsimalermat, Narsarsuarmi innuttaasut sunnigaasussat pitsaasumik ataqqinnittumillu oqaloqatigineqarnissaat ataatsimoorluta qularnaagassarilerparput.”
Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl