AtuartigukQaqortumi mittarfissaq nutaaq aamma Kujallermut kapitali nutaaq
Nassiussisuuvoq: Ineqarnermut Attaveqaasersuutinuullu Naalakkersuisoqarfik
Qaqortumi mittarfissaq pillugu
Naalakkersuisuniit aningaasat amigaataasut iluatsinneqarneri, taamaalillunilu Qaqortumi mittarfissap sananeqarnissaannut aalajangersimalluinnartunik alloriartoqarsinnaalernera nuannaarutigineqarput. Matumuuna Naalakkersuisuniit partiit, Aningaasanut Inatsimmut isumaqatigiissummi atsiortut, kusanartumik angusaqarnissap qulakkeerneqarnissaanut tapertaasut qutsavigineqarput.
Inissiiniarnermi suliami naggat inaarutaasoq naqissuserneqarpoq, taamaalillunilu nalornissutit, piffissami sivisuallaami suliap sunniutigisimasai inernilerneqarput, aammalu Kalaallit Nunaata kujataani innuttaasut toqqissisimatinneqalerlutik. Aningaasaqarnermut, Aatsitassanut, Inatsisit Atuutsinneranut Naligiisitaaanermullu Naalakkersuisoq Naaja H. Nathanielsen oqarpoq:
”Naalakkersuisuniit naalakkersuisooqatigiit illuatungiliuttullu akornanni isumaqatigiissut siammasissoq qulakkeerneqarpoq. Isumaqatigiissutit siammasissumit ikorfartorneqartut aalajangiinitsinnik siunissamut qulakkeereqataapput, maannalu Kalaallit Nunaata kujataani innuttaasut kiisami siumut isigisinnaalerput”.
Narsarsuaq
Tamatuma peqatigisaanik inissiiniarneq maanna ulloq Narsarsuup atuuffianik appaaffissaq, kiisalu nunap immikkoortuani attaveqaatit allat pillugit apeqqutinik arlalinnik pilersitsivoq. Ineqarnermut Attaveqaasersuutinullu Naalakkersuisoq Mariane Paviasen oqarpoq:
”Kalaallit Nunaata kujataani angallannerup ineriartornerani killiffik nutaaq anguarput. Tamatuma peqatigisaanik Narsarsuaq saattariaqalerparput. Taamaattumik Borgmester Stine Egede suleqatigalugu Narsarsuup siunissaa pillugu suleqatigiissitap aallarteqqinnissaanut suliniuteqarpunga. Ataatsimoorluta innuttaqatigut tamaasa ikorfartussavagut, aammalu siunissami oqaloqatigiinnissarput, Kommune Kujalliup tamarmiusup Qaqortumi mittarfissaq pillugu Naalakkersuisunut inassuteqaataannik aallaaveqartoq tatigeqatigiiffigaarput.”
Siunissami Kalaallit Nunaata kujataani angallannissaq pillugu
Missiliuinerit takutippaat, Qaqortumi mittarfiup 2025-mi naammassinissaa naatsorsuutigisinnaagipput, tamatumunngali Kalaallit Airports Domestic A/S-ip entreprenørillu neqerooruteqartussat akornanni isumaqatiginninniarnerit aalajangersimasut apeqqutaassapput.
Kalaallit Nunaata kujataani qulimiguulimmik timmisartuussineq pillugu Air Greenlandimut kiffartuussinissamut isumaqatigiissut 2024-p tungaanut atuuttussaavoq. Kisiannili taanna piumasaqaatit atuuttut atorlugit mittarfissap atulernissaata tungaanut sivitsorneqarsinnaavoq. Naalakkersuisuniit piffissaalluarallartillugu isumaqatiginninnerit ingerlanneqarnissaat, aammalu Qaqortumi mittarfiup atulernerata kingorna kiffartuussinermut isumaqatigiissutip angallannikkut pissusiulertussanut naleqqussarneqarnissaata qulakkeerneqarnissaa sulissutigineqassaaq.
Siunissami attaveqaatit nutaat aallunneqarnissaat
2022-mi Ilulissat, Nuup aamma Qaqortup avataanni attaveqaatinik ineriartortitsineq pillugu politikkikkut oqallinnerit aallartinneqassapput, ataqatigiissitsinissap pissarsisinnaanerullu qulakkeerneqarnissaat siunnerfigalugit. Isumaqatiginninniarnerit taakku tamatumalu kingorna suliassat 2023-p naanissaata tungaanut ingerlanissaat naatsorsuutigineqarpoq.
Ineqarnermut Attaveqaasersuutinullu Naalakkersuisoq Mariane Paviasen oqarpoq:
”Nuummi, Ilulissani Qaqortumilu mittarfissat suliarineqarneri 2015-imili Inatsisartut ukiakkut ataatsimiinnerminni mittarfiit pillugit tunngaviusumik aalajangiinerisa kingorna ingerlasimapput sammineqartorujussuusimallutillu. Taamaattumik sutigut tamatigut nuannaarnarpoq, mittarfiliortiternissat tamakkerlutik maanna aallartinneqartussanngormata, taamaalilluni attaveqaatini suliassanut pingaarutilinnut allanut nukissanik isumalluutinillu atuisoqarsinnaalissammat. Kalaallit Nunaata kujataani sammisamik, ukiuni qulikkaani arlalinni oqallisigineqarsimasumik inissiisoqarnera tamanit pingaarnerpaavoq.
Taamaalilluta siumut pilersaarusioqqissinnaalerpugut.”
Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl