AtuartigukArnanut nakuusertarneq unitsinneqassaaq
Inuiaqatigiit nakuuserfiunnginnerusut aqqutissiuullugit, Inatsisartut pingaarutilinnik marlunnik aalajangeeqqammerput.
Nassiussisuuvoq: Meeqqanut, Inuusuttunut Ilaqutariinnullu Naalakkersuisoqarfik
Ajoraluartumik inuiaqatigiiffigisatsinni suli annertuumik nakuusertoqartarpoq. Arnanut nakuusertarnerup nunarsuaq tamakkerlugu unitsinneqarnissaanut ullumi ulloq Naalagaaffiit Peqatigiit ullorititaraat.
Qanigisariinni nakuusernerup malunnaatilimmik annikillisinneqarnissaanik, kiisalu siunissami nakuusernerup pitsaaliorneqarnissaanik siunertaqartumik, Naalakkersuisut pilersaarummik ukiuni tallimani atasussamik suliaqassasut aalajangerneqarpoq. Qanoq annertutigisumik angerlarsimaffinni qanigisariinnillu nakuusertoqartarnera naluarput. Arnarpassuit angerlarsimaffimminni nakuusernermik eqqugaasarput, kisitsisitaqartinngilagulli. Nakuuserfigineqarnerit agguarneqarneranni qanoq amerlatigisut ikitsigisulluunniit nalunaarutigineqartarnerat eqqoriaannarsinnaavarput.
Tamatta killilerneqanngitsumik qiimasaarsinnaanissarput toqqissisimasumillu tunngaveqarnissarput pisariaqartipparput. Angerlarsimaffimmi nakuusertarneq iliuusissanut pilersaarummi annertuumik ukkatarineqassaaq suliassaqarfimmullu ilisimasallit tamaasa innuttaasullu qanimut suleqatigalugit suliarineqassalluni.
“Arnat kikkulluunniit nakuuserfigineqarnissamik ersiorlutik inuussanngillat. Arnanut nakuusertarneq kialluunniit akuersaarsinnaanngilaa, aamma suut tamaasa atorlugit iliuuseqassaagut, taamaalilluta ataatsimoorluta nipangersimaneq kipitissagatsigu nakuusernerlu unitsillugu”. Meeqqanut, Inuusuttunut Ilaqutariinnullu Naalakkersuisoq Paneeraq Olsen oqarpoq.
Kalaallit Nunaata Istanbul-imi isumaqatigiissut ilaaffigilissagaa Inatsisartut akuersissutigaattaaq. Tamanna 2022-mi Upernaakkut ataatsimiinnermi pissaaq. Istanbul-imi isumaqatigiissummi arnat nakuuserfigineqartarnerisa akiorneqarnissaat pineqarpoq tassanilu aamma arnat nakuuserfigineqarnerinik suliat eqqartuussisutigoortumik sulissutigineqartarnissaat pisussaaffiliunneqarpoq. Nunat isumaqatigiissummut ilaasut, arnat nakuuserfigineqartarnerisa akiorneqarnissaat pillugu ataqatigiissaakkanik politikkeqarnissaat isumaqatigiissummi pineqarpoq.
Tamatuma peqatigisaanik nakuusernerit suiaassutsimik aallaaveqartut suugaluartulluunniit pinerluttuliornertut isigineqaqqullugit nunat peqataasut isumaqatigiissutip pisussaaffilerpai, imaappoq nakuuserneq tarnikkut, aningaasaqarnikkut aamma kinguaassiutitigut nakuuserneruppat nakkarsaaneruppalluunniit pinerlunnertut isigineqartussaapput.
“Arnat nakuuserfigineqartarnerisa akuerineqanngilluinnarnissaa piviusumik naligiissitaanerup anguneqarnissaanut pingaaruteqartorujussuuvoq. Taamaammat Kalaallit Nunaata Istanbul-imi isumaqatigiissumik ilaalernissaa Inatsisartut tamarmiusut tapersersormassuk nuannaarutissarujussuuvoq. Arnat nakuuserfigineqartarnerat akiorniarlugu Inatsisartut Naalakkersuisullu ataatsimoorput, arnanullu nakuusertoqarsimatillugu nakuusernermik suliap eqqartuussisutigut sulissutigineqartarnissaata qulakkeerneqarnissaanut immitsinnut pisussaaffilerpugut. Ajornartorsiut atuutsillugu nakuusernermut akiliuneq ingerlajuassaaq.” Aningaasaqarnermut, Aatsitassanut, Inatsisinik Atuutsitsinermut Naligiissitaanermullu Naalakkersuisoq Naaja H. Nathanielsen oqarpoq.
Inuiaqatigiiusugut ataatsimoornitsigut nukittunerpaasarpugut. Tamatta ataatsimoorluta sulissaagut aamma sapinngisarput malillugu, ingammik arnanut nakuusertarnerup akiorneqarnerani tamatta immikkut peqataassaagut. Kalaallit Nunaanni ajornartorsiutip kisimi piunnginnera nunarsuatsinnili tamani piunera, nunarsuarmi tamarmi arnat nakuuserfigineqartarnerisa akiorneqarnissaata ulloqartinneqarnerata erseqqissarpaa. Iliuusissanut pilersaarut nutaaq aqqutigalugu Istanbul-imilu isumaqatigiissutip ilaaffigineqalerneratigut, nakuusernerup – arnanut innuttaasunullumi allanut – unitsinneqarnissaanut amerlanerusunik sakkussaqalissaagut.
Paasisaqarnerorusukkuit Naalakkersuisup allattaa Inûna Davidsen e-mailikkut inda@nanoq.gl-ikkut imaluunniit oqarasuaatikkut +299 25 78 54-ikkut attavigiuk.